¹ Niini njaji Iraelitanai nawacaacawa pjiomiwa pada capishotsa atsia, Dan nakjoite Beerseba nacojle, coshoca njaji yofacapewa Galaad lrico, nawacaacawa Wa Minalri ipeyajle Mizpa lrico. ² Naapiyawalre njaji Iraelnai, njite naapiyawajle njaji Iraelnai iipaneta nacoamitsa, nawacaacawa Dio ipeyajle njaji lrinaikite, Coatrociento mil atsianai yeemawa, nawapaketsa namatsetan nainoacá carro. ³ Njite njaji Benjamí poco njemi nanaco njaji nakitsiñape Iraelnai nawacaacacao Mizpa lrico. Njite njaji inaiki aimadan Iraelnai naaco: ''Picaite femi lrinaco jliaji maatsídalritsa jiyapalrio.'' ⁴ Niini jliaji Levita, roinirrim rsoaji iinarro yaaco narso, ''Noocawa Guibeá lricojle, njepaite rico njaji Benjamín poco, njoa, njite rsoaji yaamamashopa noino, wemaa carrotoa niini.'' ⁵ Njite deepi ricojlena, njaji Guibeá yaapiyawanai naoca nainó-carro njoa. Nadaanata jliaji panti nainó carrotja njoa. Nadee nooya jiidati rico rsoaji noinaidarro, njite oopi myamino. ⁶ Njite njopa nocadowá rodakim rsoaji noinaidarrom, njite nomeenaca njaji rsopadapem pjiomi naofacawa lrico njaji Iraelnai, ima nanaitjaca pada maatsidalri caretsa Irael lrico. ⁷ Pnaya shaa Iraelnai, icaitena panaya coanca icaiteca lrinaco.'' ⁸ Njite pjiomi njaji inaiki aimadan njenico nacaite pada capishotsa inaiki, naaco: ''Corriotsa pada wanakjoite idiacaotsa wapanaita lricojle, corriotsa pada idiacaotsa lriipana lricojle. ⁹ Njite cayoatsa wanaitjaca narso njaji Guibeá lricope: Waawatsa nakjoete coajicadaa lricañjataca wacapa jliaji wawiaca shopa. ¹⁰ Waniwa caotsa die atsianai cien atsianai nakjoite nacoamitsa njaji Irael poco pjiomi, njite waniwacaotsa cien atsianai mil atsianai nakjoite, njite mil atsianai die mil atsianai nakjoite, nadee-carro naijao njaji inaiki aimadan, niini naacadanacoenaotsa Guibeá lricojle Benjamín lricoda, njerrapiteetá-carro njaji inaiki inaitjalri maatsi Irael lrico.'' ¹¹ Niini pjiomi njaji oowinai Irael lricope nawacaacawa pada capishotsa atsia, lrikjoete jliaji yacaalre. ¹² Njaji Iraelnai nameenaca nanaikite naikjaolre pjiomi njaji Benjamín poco, naaco narso: ''¿Coandalrio jliaji imatsicanaati nanaitjalri njaji inakjoité-perri? ¹³ Panaya icadaa warso njaji atsianai maatsiperritsa Guibeá lricope wainí carrona, niiniotsa fetaca pjiomi jliaji imatsicanaati naoya njaji Iraelnai.'' Mitsa njaji Benjamín poconai corrin njemica narso njaji nakitsiñape iraelnai. ¹⁴ Njite njaji aimadan Benjamín poco naawa padenirri nayacalre Guibeá lrikjoite nainoacá-carro nakjoete njaji aimadan Iraelnai. ¹⁵ Njaji Benjamín poco nawaketa pia jliawajli ventisiete mil atsianai nacanantaji nainoacá-carro matseetasho. Njite niini pja seteciento atsianai naniwaji Gubeá lricoperri. ¹⁶ Nanakjoite njaji atsianai niini pia seteciento tsolrodaonai naniwanaji caatoperri. Pjiomi njaji fiití-perri iocaca jiipada sho, corrin namatada. ¹⁷ Njawacatsa njaji Iraelnai, naoya njaji Benjamín poconai, coatrociento mil atsianai padenirri, nacanantaji inoacacawa matseetasho. Inoacacapewa oowi rico padeenirrina. ¹⁸ Ikeena naacawa njaji Iraelnai Betel lricojle, njite natatja njemio yaacoti naicao Dio iinai, naaco: ''Coandalriotsa wanakjoite iinitaotsa inoacawa nakjoete njaji Bemjamín poco?'' Njite Dio sheepana: ''Judá poco watsa njaji iinitalriotsa inoacawa nakjoete.'' ¹⁹ Ikena naacawa njaji Iraelnai piyompinacojletoa, njite naatoa naofawa tsoomi Guibeá ioya. ²⁰ Ikena naacawa njaji Iraelnai nainoacá-carro Benjamín poco ikjoete. Naa nawapana, neema nawapana nacoadatá-carrona oowi-rico Guibeá lrico. ²¹ Namotoa njaji Benjamín poco njite naino venti do mil tsolrodaonai Iraelitanai jliadaa. ²² Mitsa njaji Iraelitanai nakjaidataacawa nakjoetewaaca, niini neemacawa pkjaawa nakjoete neemacarromtsa nainita cadaa nainoacacawa. ²³ Mitsa njaji Iraelnai neema naiya Dio ipeyajle dainoma nacojle. Naoma coanca Dio icaiteca narso, naaco: ''¿Capja wainoaca catsawa nakjoete njaji wakitsiñape Benjamín poco?'' Njite Dio icaite narso: ''Inoakena nakjoete.'' ²⁴ Njite njaji Iraelnai naawa nakjoete njaji tsolrodaonai Benjamín poco iyaarrope yamadaa naco jalredaoca. ²⁵ Yamadaa naco, njaji Benjamín poco nanao nakjoete Guibeá lrikjoite njite naino dieciocho mil atsianai iraelitanai. Pjiomi nacantaji piana nainoacá-carro matseetasho. ²⁶ Pjiomi njaji tsolrodaonai iraelitanai njite pjiomi njaji inaiki naawa Betel lricojle naiya-carro nirse, icatsa naofacawa niini Dio ipyajle, maijacaca niinina madalridaa jalredaoca atee dainoma naicao. Namjaita Lrirso ofrenda njite naa tsakja ofrenda imaodacakjeti naco Dio irso. ²⁷ Njaji Iraelnai natatja njemio naicao tsenakja Dio iinai, ima jliaji Dio iarcani, lriacoam iarroda Belén ricocani jliawajli, ²⁸ Njite Finees, Eleazar irri, Aarón irri icatsa nasacerdotecani jliawajli, naaco Di irso, ''¿Capja warso catsenakja waaca wainoacawa nakjoete njaji wakitsiñape aimadan Benjamínai, o corritsa?'' Njite Dio sheepana, lriaco narso: ''Yeena inoacawa, ima tjewaotsa nokitsindata shaa shaamá carroatsana.'' ²⁹ Njitedalri njaji Iraelnai namatsieta njaji tsolrodaonai nadawaaca-carro nawapa Guibeá iwaida nacó. ³⁰ Ikena nainocacawa njaji Iraelnai nakjoete njaji Benjamín poco madalridaa nacojle tsenakja. Neema pakjaawa nacoadatá-carro njaji Guibeá lricope nainoacá-carro nakjoete cayotsa neemacaji manatsa napeyajle mana. ³¹ Nano njaji aimadan Benjamín poco nainoacá-carro nakjoete njaji Iraelnai, njite njaji Iraelnai naawa napeyajle yacaalre ioya. Ikena nainita nainoacacawa oowi ricó njite nainopadapena iraelitanai. Naino trenta Iraelitanai nainoacalri niini njite inipolrico tsakja. Pakja inipo iawa Betel lricojle, njite pakja iawa Guibeá lricojle. ³² Njite naaco njaji aimadan Benjamín poco: ''Corriketsa nataita wakjoete niini napitoca waoya, cayotsa napitocajitsa waoya.'' Mitsa naaco njaji oowi Iraelita: ''Warsaotsa feeco naoya nanocarroatsa faapodam teeco lrioya jliaji yacaalre naikjaolre njaji inipo.'' ³³ Pjiomi njaji aimadan Iraelnai nacarsawa neemacawa ioya neema-carro pakjaawa nacoadatá-carrona Baal Tamar lrico. Njite njaji tsolrodaonai Iraelita idawaacacapepiawa napianjenico neemawa Maareh Geba. ³⁴ Nano Guibeá lrikjoite die mil atsianai naniwanaji nanakjoite njaji Iraelnai, maatsinaa nainoacacawa jliadaa, njite njaji Benjamín poco corrin naajíi iñaakjeti itsoomitacana. ³⁵ Wa-Minalri shaama njaji Benjamín poconai Irael ipeyajle. Jliadaa pia, njaji Iraelnai naino venti cinco mil cien atsianai Benjaminai. Pjiomi njaji mayamirri nacanantaji nainoacá-carro matseetasho. ³⁶ Nacapa cádanaco corriketsa nataita Irael ikjoete njaji Benjamín poco, ikeena naacawa njapodamrsewa, njite njaji Iraelnai nacadaacatsa naawa ima naajíi niinica paana idawaacacapewa nacadaaji napia Guibeá iwaida naco. ³⁷ Njite njaji idawaacacapeo njenicoa njite kjeeyacalrim njeewawa yacaalre Guibeá lrico; njite naino matseeta sho pjiomi njaji yofacapea lri-ricoda yacaalreca. ³⁸ Njite naaco narsowaaca njaji tsolrodaonai Iraelna naapiya njaji nakitsiñape idawaacacapewa nacapacaotsa iitacati imotocaotsa yacaalre rikjoite. ³⁹ Nacapa cadanaco jliaji iitacati nawacanda njaji tsolrodaonai Iraelnai, njaji nakitsiñape tsolrodaonai yaami nainoacacawa. Njite njaji Benjamín poco kjaida nainoacacawa nakjoete njaji Iraelnai, naaco njaji Benjamín poco: ''Faatsaotsa shaamana cayotsa faama capisho manana.'' ⁴⁰ Mitsa iitacati imoto cádanaco yacaalre ioya, nacaboco nacapa njapodamrsewa njaji Benjamín poco, njite nacapa iitacati imotocawa yacaalre rikjoite. ⁴¹ Ikena njaji Iraelnai naaca naikjaolre tsenakja. Njaji atsianai Benjamín poco nafiowa pekirritsa, ima nacapaca coanca maatsirri ínoca naikjaolre. ⁴² Niini njecoca napitó-carro naoya njaji Iraelnai, macada naacawa nerricoda njaji inipo yaacapewa jalrapocolri ricojle. Namoto pemajlewa njaji tsolrodaonai iraelitanai, njitetsa naino pjiomina. 43Nadaanata ⁴³ Nadaanata njaji Benjamín poco naacarro naikjaolre. Nadaanatana Noha lrico njite nainona inipolrico yaacadawa jeerri imotokema lrikjoite Guibeá irso. ⁴⁴ Dieciocho mil atsianai njaji mayamirri nanakjoite njaji Benjamín poco, kjaidaperripia inoacacawa oowi rico. ⁴⁵ Nadia napitowa jalrapocolri ikjaolre lrinaco jliaji jiipada Rimón lricoda. Njaji Iraelitanai naino cinco mil atsianai nanakjoite nacaayao inipolrico. Napineta pjaana inipolrico Gidón lricojle, naino niini Do mil atsianai tsenakja. ⁴⁶ Naino venticinco mil atsianai Benjamín poco nakjoitepe jliadaa, yajiccaperri pia inoacawa oowi rico. ⁴⁷ Mitsa seiciento atsianai nadiá napitowa jalrapocolri ikjaolre, tsoomi lrioya jliaji jiipada Rimón-dalri. Icatsa naofacawa niinio coatropi keerri. ⁴⁸ Njaji tsolrodaonai iraelitanai nadia tsenakja naino njaji Benjamín poco iyacalre ricope, naino pjiomina, navacan, njite pjiomi njaji nacapaji. Namjaita tsakja pjiomi njaji yacaañre nacapaji naacayao.