¹ Njaji atsianai iraelitanai nanaitja pia pada yaacoti Mizpa lrico: ''Corriotsa pada wanakjoite yaawatsa iito nainoa njaji Benjamínai.'' ² Njite naawa njaji inaiki Betel lricojle, naofawa niinio Dio ipeyajle atee dainomalje, njite naiyaca niini kjaida iinonaacalri rico. ³ Naaco nawanaca: ''¿Wa-Minalri, na-Diote njaji Iraelnai; coada cayo jliyapacao cayoji iraelitanai iinai, ima pada wanakjoite poco iñaaca waoya?'' ⁴ Tjewaijlena piyompinacotoa njenicoa njaji inaiki aimadan njite njerreta apana altsr niini, njite namjaita maaficalri lrinaco, naa tsakja ofrenda imaodacakjeti naco. ⁵ Naaco njaji inaiki iraelitanai: ¿''Coanperri nanakjoite njaji Irael poco corrin íno iwacaacawa wainai Dio ipeyajle Mizpa lrico?'' Ima nanaitja piaca pada yaacoti nanaco tjaji corriperi yáa iwawaacawa nainai Dio ipeyajle Mizpa lrico. Naaco cayoji: ''Wainocaotsa jliaji corridalri íno iwacaacawa wainai Dio ipeyajle Mizpa lrico.'' ⁶ Njaji Iaelnai, kjenaa nacapaca narso njaji nakitsiñape Benjamínnai. Naaco cayoji: ''Oopica wayoa papoco nanakjoite njaji Irael poco.'' ⁷ ¿Cocaotsa yáa naninaiwa njaji wamacajim, ima wanaitjaca pada yaacoti Dio ipeyajle wacaitecawa corricaotsa waacarroca naninaiwa waitonaipe nakjoite?'' ⁸ Naaco cayoji: ¿''Coanperri nanakjoite njaji Irael poco corrin íno iwacaacawa wainai Dio ipeyajle Mizpa lrico?'' Njite nacapa corrica pada nanakjoite njaji Jabes Galaad lricoperri yaa iwacaacawa nainai. ⁹ Ima namatsietaaca cádanacoa nemao oowi icaona corrin nacapa pada nanakjoite njaji Jabes Galaad lricoperri. ¹⁰ Niini njaji iwacaacalrio nameenaca doce mil atsianai yajícape inoacawa, nacaite narso naacarro naino njaji Jabes Galaad lricope, nanaapja nainó-carro njaji inaitjepe njite njaji yempetipe tsakja. ¹¹ Nacaite tsakja narso, nainícarro pjiomi atsianai njite njaji inaitjepe jiyapacapemina atsia iinai. ¹² Niini njaji atsianai nameenacaji Jabes Galaad lricojle naoketa coatrociento inaitjepe walridarrope toa, corripetoa yaajíi atsia, njite nadeenana napanaitape lricojle Silo lrico, Cannan lricoda. ¹³ Pjiomi njaji iwacaacacapewa nameenaca yaacoti narso njaji Benjaminai idawaacacapeo jiipada rimón lrico namaodaca carroenawa. ¹⁴ Niini njaji Benjaminai namotoa nadawaacalri njiteo njite njaji nakitsiñape iraelitanai naaca nainoa njaji inaitjepe Jabes Galaad lricope, mitsa corrim lricoaca narso pjiomi. ¹⁵ Njite njaji inaiki kjena nacapaca narso njaji Benjamín poco lrikjaote jliaji njeyapalrio, ima Dio jienitaca naoyawaaca njaji Iraelnai. ¹⁶ Njite naapiyawanai njaji iwacaacalrio naaco cayiji: ''¿Coajiotsa wanaitja waoketá carroatsa naninaiwa njaji Benjamín poco corriperritoa irso iino, ima opica naino njaji naninai?'' ¹⁷ Njite naaco: ''Lrirsotsa niinica pada nayaadape njaji namacaji Benjamín poconai, wadeentja nawayacacao naoya njaji Irael poco. Corrin wataita waaca nainoa waitonaipe, ima njaji Iraelnai nanaitja piaca pada yaacoti, Maatsidalrica jliaji aatsia yaacada Benjamín iinoa.'' ¹⁸ Corrin wataita waaca nainoa waitonaipe, ima njaji Iraelnai nanaitja piaca pada yaacoti, Maatsidalrica jliaji aatsia yaacada Benjamín iinoa.'' ¹⁹ Niini naaco cayoji: ''Yajintsa niinica pada wacatimataaca carroda Dio naco pawalria icoamdalri-mana wanaitjaca, silo rico, inarroemjete-dalri Betel irso, jeerri imoto kema lrirso jliaji inipo yaacadawa Betel lrikjoite Siquem lricojle, inarroemajle Lebona irso ²⁰ Nanaa njaji atsianai Benjamín poco, naaco narso: ''Warsa yaawa idawaacawa matjinaatsa iwapá carroatsa oowapi rico. ²¹ Iwapaotsa icapa namoto cadanacoatsa narrapa njaji inaitjepe Silo ricope, njite kjeyapenatsa imototsa naikjaolre idawaacalri njiteo niiniotsa jipaca aapama iimarro Silo ricoda iinoa, njiteotsa idiawa Benjamínai jipaite ricojle. ²² Njite njanirrinai o napjenaipe inocadaaotsa natatja wainai nanaco, wacaiteotsa narso cayoji: ''Kjenaa icapaca narso njaji Benjaminai! Njite corrin coaji waoketaca nainowa oowi rico cádanacotoa faa. Njite corrin yaaca nainoa matsiacalri rico niini coicarron catoa jliaji yaacoti inaco, corritoa coca imatsicanaa.'' ²³ Njite njaji inaiki aimadan Benjamín poco nanaitja cayo. Njepa neñaito nainowa nacoanamtsa nanakjoite njaji inaitjepe irrapacaperri. Ikena nadeecana njepaite ricojle; njerreta tsenakja nayacalrem naofaa-carro tsenakja niini. ²⁴ Ikeena nadiaca njiteo njaji Iraelitanai nayacalre ricojle, njepaite ricojle, naapana lricojle. ²⁵ Jlaiwalri pia corri piatoa narsoca natalricanaa njaji Iraelnai. Niini njaji inaiki nanaitjaca cocacatsa matsia capisho narso.