¹ Jliawajlia, corricaojli piatoa narso natalricanaawa njaji Iraelnai, niini pia pada atsia, pada Levi, lriofaa piatoa awacadacaawa nayada njaji Efraín poco. Jlita lriinoa yaamamashopa, apama inarro Belén darro Judá lricoda. ² Mitsa rsoaji lriino yaamamashopa rorso ronapjerri roinirri ioya; romaca roinirri njite rodiawa lrioya rsonirri iipana lricojle Belén-rse Judá lrico. Roofa niini coatro-pi keerri. ³ Njite roinirri yaawa rsoapodam lricaité-carro rorso rodiá-carro lriinai tsenakja. Lridee lrinaiwa pada lrirsodalri njite yaamada borro. Rsoaji iinarro rocoadatani njite rocada jliewao rsonirri iipana lricojle. Njite rsonirri rsoaji iinarro lricapa cádanaconi, catiimani pekirritsa. ⁴ Jliñjawerri, rsonirri rsoaji iinarro, lricaite lrirso lriofaa carrotoa lriinai lriipana lrico madalridaa jalredaoca. Naija, nairra nainai, njite nemaatoa nainai niini. ⁵ Njite coatro jalredaoca naco nacafiawa piyompinacotoa njite namatsietacawa naacarroena, mitsa lriñawerri iaco lritsimarre irso, ''Iñja pjatoa wainai kjaida-carro shaa, njitenaotsa itaita yaacawa.'' ⁶ Niini njaji naofacawa yamadapewa naiñja-carro nairrá-carro tsakja. Njite lriñjawerri iaco lritsimarre irso, ''Piofaa pjatoa pimaa wainai, imaa carrotoa matsia.'' ⁷ Lricafia cadanacoenawa jliaji Levita lria carroenawa, lriñjawerri icaite lrirso lriofaa carro pjatoa, niini tecojle nakja lriwaopiakje jliaji lritsimarre niini lriofaa catoa nainai tsenakja. ⁸ Cinco jalredaoca naco, jliaji Levita icafiawa piyompinacotoa lria carroenawa, mitsa lriñawerri iaco lrirso, ''Piñjatoa wainai kjaida-carro pjia, njite dainojle naotsa piawa.'' Icaamitsa naiñjaca yamadape tsenakja. ⁹ Levita icafia cadanaco, lriino tsakja njite jliaji lrirsodalri naacarroenawa, lriñjawerri iaco lrirso, ''Picapa, dainomakena iicao. Yofaatoa imaa carrotoa padeenatsa deepi, imaa carrotoa matsia. Tjewenaotsa icafiawa piyompinacotoa idia carroenawa iipana lricojle.'' ¹⁰ Mitsa jliaji Levita corrinatsa lrioma lriofaaca lrimaa niini, icaamitsa naacawa. Lriawa Jebús lricojle (Jerosalén panaya). Lrirso njaji lriborron yaamanade irsocape naofacarrona nanaco, njite rsoatsa lriinai rsoaji yaamamashopa lriino. ¹¹ Njite tsoomi cadanacoena Jebus ioya, njite dainoma kena naicao, lrirsodalri iaco lrirso, ''Warsa waawa nayacalre ricojle njaji jebuseonai wemaa carro niini'' ¹² Niini lriminalri yaaco lrirsodalri irso, ''Cotsa waa carroca nayacalre ricojle njaji apanatsa inaiki corriperritsa Iraelnaica. Warsa waawa mayacan Guibeá lricojle.'' ¹³ Njite jliaji Levita yaaco lrirso jliaji lrirsodalri yeepetitoa, ''Warsena waawa wemaacarro Guibeá rico o Ramá lrico.'' ¹⁴ Ikena naacawa, mitsa deepiketsa naicao nacayao toa Gabaa lricojle, njepaite njaji Benjamín poco. ¹⁵ Naocawa Gabaa lrico nemaacarro niini. Naoca naofaawa Gabaa iyacalrecoa lrico, mitsa corrin pada yaa icoadatana nainai-carrontjana nemaacarro naapana lrico. 1 ¹⁶ Mitsa pada atsia pekirrina lridiacawa lridejicalre ioya dainomenatsa. Iofacada pia jiipana taji naco awacada cawa lrico njepaite rico njaji Efraín poco, lriofaa piatoa Guibeá lrico. Mitsa Benjamín poco inakjoité perrica njaji yoofalri niinio. ¹⁷ Niini jliaji pekirri jlirreta lricapa jliaji yaacadawa lriofacawa yacalrecoa lrico. Njite pekirri iaco lrirso, ''¿Kjaite ínoji? ¿Kjerre yaawa? ¹⁸ Njite Levita yaaco lrirso, ''Wadiacawa Belén lrikjoite Judá lricoda, pikeetemrse cawajle awacadacawa lrico njepaite rico njaji Efraín poco, icatsa noaca nirse. Noa piawa Belén lricojle Judá lricoda, njite panaya noacawa Dio iipana lricojle, mitsa corrin pada icoadata njoa njoewá-carro lriipana lrico. ¹⁹ Warsoentsa naiñjao njaji waborron, njite warso tsakja waiñjaope. Cotsa coca canacai warso.'' ²⁰ Ikena lritatjacana jliaji pekirri, ''¡Imaodaca catsawa! Njoawatsa icoadata shaa, wadee yofaacawa imaa ajíi yacalrecoa lricotsa.'' ²¹ Ikena lrideeca jliaji Levita lriipana lricojle njite lriá naiñjawa njaji lriborron. Nacotso njaipa lrico naiñjá-carro njite nairrá-carro tsakja. ²² Nacatimataaca cadanatoa pjiomina, paana atsianai macadawanaitsa lri-ricodape yacaalreca, nadaanata pekirri iipana njite nañaaca pantinoma, naaco lrirso jliaji pekirri, ''Pimotoita pemajle jliaji atsia shewalri piipana lrico, wadakitaaca-carrro lriapiya.'' ²³ Njite jliaji pekirri, panti iminalri imoto naikjaolre pemajle, lriaco narso: ''Corrina nokitsiñape, ¡Manaitjatsa warsowao jliaji imatsicanaati maatsidalri calretsa! Ima jliaji atsia imaacadaca catoa noopana lrico. ²⁴ Norso aapama noito mjeyapa cadarrotoa atsia iinai, atsakja aapama lriino jliaji atsia. Naapiya dekja itaita inaitjaca coancatsa yoomaca, Mitsa manaitjatsa jliaji imatsicanaati maatsidalri calretsa lriapiya jliaji atsia.'' ²⁵ Niini jliaji Levita jipa jiidati rico rsoaji aapama lriino njite lripiajletano naikjaolre. Ikena njepajica rsoaji iinarro maatsicalri rico depjite, njite namacano jaalrekenani. ²⁶ Jaalre cadanacoena rono rsoaji iinarro mitsa atsa rsowawa lripananoma lrico jliaji pekirri, lrimaalri niini jliaji roinaidalri, icatsa rorsowacawa niini akjerreca jaalreca roicao matsia. ²⁷ Jliada naco jlimoto jliaji Levita pantinomajle lria-carro pjawa. Njite lricapa niinimcatsa rorsoawa rsoaji aapama lriino pantinomajletsa. ²⁸ Niini jliaji Levita iaco rorso, ''Pjinicoenao waa-carro.'' Mitsa corrin rsoepani. Jlirretano lriborron nacó, njite lrimatsietaacawa lriá carroenawa lriipana lricojle. ²⁹ Lrioca cádanacoena lriipana lricojle, jlipa paita malriye lricadowaa carrono doce-wajle, njite lrimeenaca naawa njaji rsopadapem piomi naofacawa lrico njaji Iraelitanai. ³⁰ Njite njaji icapacape jliaji lrinaitjalri, naaco: ''Namota cayami Egipto lrikjoite njaji Iraelnai, corripiatoa paca caidalriji, atee panashete. Iwaopia lrinaco, njite icaite coanca wanaitjaca.''