¹ Jliawajli poia corri piatoa narsoca natalricanaa njaji Iraelnai. Njite njaji Dan poco inakjoite perri naaji piaca naoma naofacarroapjiwa, ima jliada nacotoa corri piatoa iraelitanai yaapiaca njepaitewa nayadao nainai. ² Njaji inaiki aimadan Dan poco inakjoite perri nameenaca cinco atsianai nanakjoite, atsianai oowi icaonaperri, yajicape matsia Zora perri njite Estaol perri, naacarro njaipa shotsa nacapa-carro naicawa jliaji jiipai. Naaco narso: ''Yaa icapa waicao jliaji.'' Njite naocawa awacadacawa Efraín jipaite rico, Micaía iipana lricojle, icatsa nemaaca niini. ³ Tsoomi cadanacoenana Micaía iipana ioya, njemi matsia pada yempetitoa Levita yaaco. Niini naoca nemawa natatjá-carroni, ''¿Cocao idee pjia ajerreji? ¿Cocao pinaitja anjíi? ¿Coada piojawa anjíi?'' ⁴ Njite lriaco jliepana, ''Cayo Micaía ikitsindataca njoa, Lricaoñaca njoa lri-sacerdoten-carro njoa.'' ⁵ 5Njite naaco lrirso: ''Pinaitja matsiacalri pioma yaacoti Dio iinai lricaitécarro pirso wanaco matsia cadaa lrimotoca warso jliaji waajirri ikjaote.'' ⁶ Jliaji sacerdote yaaco narso, ''Yeenawa imaodacatsa. Wa-Minalri icañjataotsa icapa jliaji inipo irsolritsa iaca niinio.'' ⁷ Ikena njaji cincodee atsianai naawa njite naocawa Lais ricó, nacadapa njaji inaiki ninperri namaodaca-catsa naofacawa, cayo tsakja njaji sidonionai, naofawa namaodacatsa, corrin coca ima nacapaca. Corritsa cocantja inaitja oowi nakjoeta njetá carrontja njepaite, o namacantja nacapaca. Naofapiawa teeco naoya njaji sidonionai, corrin coca yaajíi nainai lrinaco jliaji njepaite. ⁸ Ikena nadiacawa nakitsiñape ikjaolre Zora lricojle njite Estaol. Naaco njaji nakitsiñape, ''¿Coaji yaacao?'' ⁹ Naaco narso, ''¡Inoena waacarro wainona!'' Ima wacapjen jliaji jiipai, jiipai matsiadalricani. Cotsa coca inaitja, kjeyena shaa waacarro ainona fetácarro wayadao njepaite. ¹⁰ Yooca cadaotsa nirse icapaotsa macaiteca jliaji jiipai. Cotsa coca canacarri nirse, imaodacacapetsa yofawa njaji inaiki ninperri, cotsa coca nawapa yaantja iinona. Ajádalri Dio icadandaca warso jliaji jiipai.'' ¹¹ Seiciento atsianai Dan nakjoiteperri iawa nainoacashopawa iapiya oowi ricojle, naawa Zora njite Estaol lrikjoite. ¹² Naawa njite naocatoa naofawa Quiriat Yearín lrico, Judá lricoda. Lrikjaotene nacadaa lriipitanao niini Majané Dan atee panashete; jeerri jiewakema nacojle Quiriat Yearín irso. ¹³ Naawa njiteo awacada nacojlecawa nayada njaji Efraín poco njite naocawa Micaía iipana lricojle. ¹⁴ Njite njaji cinco atsianai yaacapem pia icapa naicao jliaji jiipai Lais-dalri naaco nakitsiñape irso, ''Lri-ricoda pantica jliaji niini pada tsayana, paana dionai panti ricope, pada njenapjiam nayoanda matsia njite pada njenapjiam nanaitjanda tsipalra sho. Icapena cocaca inaitja.'' ¹⁵ Niini natsomita jliaji panti lriofalri niinio jliaji yempetitoa Levita, Micaía iipana lrico, njite natatjani. ¹⁶ Njite njaji seiciento atsianai Dan lricope irsocape nainoaca shopawa oowi rico, atsa neemawa pantinomajle. ¹⁷ Njite njaji cinco atsianai yaacapem pia icapa naicao jliaji jiipai naa njépa jliaji njenapjiami nayoanda matsia, jliaji tsaayana, nadiote panti-ricopetsa, njite jliaji njenapjiami nanaitjanda tsipalra sho, aacadanatoa lriemawa jliaji sacerdote nacodapi njaji tsolrodaonai seicientodee irsocape nainoaca shopawa oowi-ricó pantinomajle. ¹⁸ Njite njeewa cadanacoa njaji Micaía iipana lricojle, njépa jliaji njenapjiami nayoanda matsia, jliaji tsaayana, nadiote panti-ricopetsa, njite jliaji njenapjiami nanaitjanda tsipalra sho, niini lriaco narso jliaji sacerdote, ''¿Coada inaitja cayoji?'' ¹⁹ Njite naaco lrirso, ''Maacotsa pjia, piita pinoma picaapisho, pino wainai pjia carroatsa icaite faa njite wa-sacerdoten-carro pjia warso. Matsia pjatoa sacerdoteca pjia papoco inaiki irso, Irael inakjoite perri irso, lrioya jliaji sacerdoca pjia pada atsia irsotsa lriipana lrico.'' ²⁰ Icaamitsa catiimaca lricaolre jliaji sacerdote. Njite jlipa lridee njaji njenapjiami nayoanda matsia, jliaji tsaayana, nadiote panti-ricopetsa, njite jliaji njenapjiami nanaitjanda tsipalra sho njite lriawa nainai. ²¹ Icaamitsa nacaboco naacarro. Nacadaa njaji yempetpe naacarro napjeya, coshoca nja nawacani njite pjiomi narsompe tsakja. ²² Njite teeco cádanacoena nawa Micaía iipana yooya, Micaía iwaketa njaji atsianai tsoomi perri lripana yooya, njite naa njepa njaji danitanai. ²³ Nawana naikjaolre njaji danitanai, njite nacaboco nacapa naikjaolre, nacapa Micaía irso, njite naaco lrirso, ''¿Coada piwana waikjaolre?'' ²⁴ Njite Micaía iaco narso: ''¡Ideeca njaji nodiotenai nonaitjaji, njite idee tsakja nosacerdoteni, njite corrinatsa coca pimaca norso, njite itatja mintoa coanca njoa!'' ²⁵ Mitsa njaji danitanai naaco lrirso: ''Corrin pitaita caacoca pjia warso cayorra, wadetsantja pikerroataca pada wanakjoite, njitenantja lriino pjia njite njaji piipaneta.'' ²⁶ Icaamitsa njaji danitanai naaca lrioya mayacan. Njite Micaía icapa capoa aimadan pjaaca lrioyana icaamitsa lridiaca naoya lriipana lricojle. ²⁷ Njaji Dan poco njepa njaji Micaía naitjji, njite jliaji lri-sacerdotenim tsakja, icaamina naocacawa Lais lricojle, naikjaolre njaji inaiki imaodacacapetsa yofaacawa, njite naoca nainona, namjaita jliaji yacaalre. ²⁸ Corrin coca iyomjetana ima teecocana naoya njaji Sidón lricoperri, njite corrin tsakja narso pjaaca paana yajicape lrinaco jliaji jiipai. Jliaji jiipai paoketani jiipai yooyawaca tsoomi Bet Rejob ioya. Icatsa Dan poco inaitjaca nayacalreo naofaa-carro niinio. ²⁹ Nacada lriipitanawa jliaji yacaalre, Dan; cayotsa naferrimi iipitanasho, pada nanakjoite njaji Irael yeenipenai. Mitsa Lais piatoa lriipitana jliaji yacaalre. ³⁰ Njaji inaiki aimadan Dan poco njepa narsowao jliaji idolo Micaía inaijanda, lriyoanda matsia. Njite Jonatán, Gersón irri, Moisé irri naapiya njaji lrienipe, icapiatsa sacerdotenaica narso njaji Dan poco atee kjerreca njepa pia pjiomina oowi ricó. ³¹ Niini naaca matsiadalri lrirso jliaji idolo Micaía inaitjanda, iyoanda matsia, njite cadana Silo rico lriemao jliaji DIo iipana.