¹ Niini pia pada atsia, Micaía lriipitana, yofacada awacada cawa naofacawa njaji Efraín poco. ² Micaía iaco jlidoa irso: ''Njaji mil cien moneda palrataitape nañaitoji pia pioya, njaji picaitelri maatsi inaco caaco cádanaco pjia, njite njomi coanca picaiteca. ¡Njoa irso nja palraata! Njoatsa iñaito pioyana.'' Njite jlidoa iaco lrirso: ''¡Dio inaitjaotsa matsia pirso, noenipe! ³ Lridieta jlidoa irso njaji mil cien moneda palrataitape, njite jlidoa iaco lrirso: ''Nocadaa nja palraata wa-Minalri irso, nirri inaitjá-carro njenapjiami lriyoajipe njite lrinaitjá-carro tsakja narroapjipe tsípalra sho. Niini panaya nodietaca pirsona. ⁴ Lridieta cádanaco jlidoa irso njaji palraata, rsota njite dociento palrataitape, njite roani pada irso idejicada tsípalra sho lrinaitjá-carro rorso njemapjiami lriyoaji, njite narroapjipe tsípalra-sho, njite Micaía ideena lriipana lricojle. ⁵ Micaía ipakjanta padapana panti idolonai sho, lrinaitja tsakja pada tsayana njite idolonai nacadaope panti ricó, njite lricaoña pada lrienipe nakjoite sacerdote-carro lrirso. ⁶ Jliawajli pia corrin pacapa piatoa talricanaati Irael lrico, niini nacoamitsa nanaitjaca cocacatsa matsia nacapaca nanaitjaca. ⁷ Niini pia pada atsia yempetitoa Belén ricó Judá lricoda, Judá poco inakjoite-dalri, pada Levita. Lriofáa niinio lrinaitja-carro lridejicalre sacerdote sho. ⁸ Njitédalri lriawa Belén lrikjoite Judá lricoda lriomá-carro pafe lriofacawa. Njite lriacayao toa, lriocawa Micaía iipana lricojle awacadacawa Efraín poco iofacawa lrico. ⁹ Micía iaco lrirso: ''¿Kjaite pinoji?'' njite jliepani: Pada Levita-ca njoa Belén-dalri Judá lricoda, njite noajica nooma apaafe noofacawa lricoatsa.'' ¹⁰ Micaía iaco lrirso: ''Piofawa noinai atsaji piacarroatsa norso yaacoti njite sacerdote-crro pjia. Noawatsa pirso die mil moneda palrataitape pawalria icoami, papoco tsayape njite ijaodati pjaa.'' Ikena jliaji Levita sheewawa lriipana lricojle. ¹¹ Catiima Levita shofacawa Micaía iinai lriipana lrico, njite Micaía icapaca jliaji Levita lrienipe nakjoite capi-sho. ¹² Micaía icadaa lridejicalreo jliaji Levita padatsa matsiaperri naco, njite lrisacerdotecani Micaía iipana lrico lriofalritsa niiniwa. ¹³ Njite Micaía iaco: ''Panaya dekja noajii matsiacaotsa Dio inaitjaca norso, ima nosacerdoteca jliaji Levita.''