¹ Sansón iawa Gaza lricojle njite lricapa apama cawilredarro nirse, niní lridakitaca roapiya. ² Nacaite Sansón naco narso njaji Gaza lricope: ''A Sansón wayacalre rico panaya.'' Ikena nadanataca jliaji panti, nawapa dawacalri ricotsa yacaalre ipananoma lrico. Maacotsa nawapacani depjite.Nacaitiaca cayamiwa nawapá carroni akjerreca jeeri imotoa tjewaijlena nainó carroni. ³ Sansón iorsoawa roapiya rsoaji iinarro pamoyoa deepi nacojle. Njite deepi pamoyoa lricoena lricafiawa lriacarroa niiní jlipaca jlirráa njaji yaamana yacaalre ipananoma irrocarrona jiipai rikjoite, lriwakje lrideena jiipanada ípolrico nacojle, Hebrón icoemjete. ⁴ Jliapodamjite nakja, Sansón ipeyoenakja aapama iinarro Dalila darro iipitana yofacada jiipai yoyawaca Sorec lrico. ⁵ Niini njaji talricanaaatinai filisteonai iyape naa roikjaolre, naaco rorso: ''Picashataotsa jliaji Sansón wajíi-carro kjaitecaaca lrirso jliida, njite wajíi-carro coanca faamacani, wapapí carroni ritaitá carro lriajíi faa pjaaca lrioya. Pinaitja cadaotsa cayo, waotsa pirso wacoanaa mil cien monedaita palraata.'' ⁶ Niini Dalila yaaco Sansón irso: ''Pinaitja matsiacalri picaite njomi coadaca kjaida-calretsa pjia, njite coajintja pada itaita inaitjaca lritaitá-carro lripapica pjia.'' ⁷ Napapi cadaa njoa sietekjaa yawitjiapo iiñada-sho walrikjaipe toa corripetoa meerica, icaamitsantja mjaidaca njoa, cayoetsantja njoa coandalrisho-catsa nanakjoite njaji atsianai.'' ⁸ Njite njaji caconaperri filisteonai nadee rorso sietekja yawitjiapope iiñada walrikjaipetoa corripetoa nametata, njite Dalila ipapi Sansón nasho. ⁹ Rodawa cadanenatsa atsianai romaacawa lrico. Njite roaco Sansón irso: ''¡Sansón, piikjaolre filisteonai!'' Mitsa Sansón jita mjotjomi njaji yawitjiapope iiñada cayoji tawalrekja imácapisho tiyee rico . Cayotsa corrin najíi coanca kjaidacani. ¹⁰ Njite Dalila iaco Sansón irso: ''Icatsa cayo picashataca njoa, ishaatitsa njaji picaiterri norso. Pinaitja matsiacalri picaite njoa coajintja panaitja mjaidaa-carro pjia. ¹¹ Njite lriaco rorso: ''Napapi cadaa njoa jinorroti walrikjai shotoa corrperritoa napai isho, icaamitsaotsa mjaidaca njoa, coyoenatsaotsa njoa nacayoshotsa njaji atsianai coanperricatsa.'' ¹² Niinina Dalila ipapini jinorroti walrikjai shotoa, njite lriaco rorso: ''¡Sansón, Piikjaolre filisteonai!'' Nawapa cadanetsa njaji atsianai rodawaji icao romaacawa lrico. mitsa Sansón jita mjotjomi lrinaapa yooya pjeta capisho mjotjomi tawalrkja. ¹³ Njite Dalila iaco Sansón irso: ''Panashete toa picashataca catsa njoa, ishaatitsa njaji picaiterri norso. Pipicaite njomi coajintja panaitja mjaidaa-carro pjia. Njite Sansón yaaco rorso: ''Pitsipata cadaa sietekjaape njaji notsicolre, njite pitsipata notsicolre iinaitsa yamacatikjaape, njite pipapi nasho njaji yamacatikjaa jaico nacojle, icaamitsaotsa mjaidaca njoa, coyoenatsaotsa njoa nacayoshotsa njaji atsianai coanperricatsa.'' ¹⁴ Niini Sansón imaacapjite, Dalila itsipata nja lritsicolre yamacatikjaape sho njite ropapina matsia jaico nacojle, njite ikeena roaco lrirso: ''¡Sanasón, pikjaolre filisteonai!'' Niini lricafiacawa jliaji imaacada njite jlita mjotjomi njaji yamacatikjaape njite jlirra tsakja jliaji jaico ropapishopan inaco. ¹⁵ Roaco lrirso tsenakja: ''Coada picaite norso pipeyoca njoa, njite corrin picaite norso jliaji noomalri noajica piinai coadaca kjaida pjia. Icaamitsa picaaca noicao madalripiena. ¹⁶ Jalredaoca icoam ropiajletan roaco sho kjaidape, njite cayo cádanaco lriomatja mayamican. ¹⁷ Icadekjena Sansón icaite pjiomi njaji roomalri roajiica inaco coadaca kjaidani, lriaco rorso: ''Crrin coancaojlica noyoa njaji notsicolre malriye sho ima Dio shenitandaca njoa lrirsowao njodoa iwawa lrikjoite toa. Nayoa cadaa njaji notsicolre icaamitsa yaamica kjaidaca njoa, corrinatsa kjaidá-carroca njoa, cayoenatsaotsa njoa nacayosho njaji atsianai pjiomi.'' ¹⁸ Dalila icapa cádanaco Sansón icaiteca rorso ajádalri sho pjiomi, ronaa nanoca njaji talricanaatinai filisteonai, roaco narso: ''Inoenaotsa pjiomi shaa, panaya dekjena lricaiteca norso pjiomi coadaca kjaidani.'' Ikena nanaoca njaji talricanaatinai roderse, njite nadee rorso njaji palraata nacaoñashopano. ¹⁹ Rocadaa pia Sansón imaaca ropoita-naco, njite ronaa pada iyoacada natsicolre lriyoá-carro njaji sietekjaape lritsicolre rotsipataji jliwida nacó, panaya dekjena corrinatsa kjaidani, atee rsoatsa shaamani. ²⁰ Njite roaco lrirso: ''¡Sansón, piikjaolre filisteonai!'' Ikena lricafiacawa jliaji imaacada njite lriaco lrirsowaaca: ''Cayoatsa nonaitjaca nonaitja cappisho manatsa, mitsa corrin lriajíi oopica wa-Minalri imacani, corrinatsa kjaidani. ²¹ Icaamitsa filisteonai jipacani, njeca lritji yameemape. Nadee Gaza lricojle njite napapi lricaapi broncekja sho. Icapiatsa jliaji icabocoetalrica jliaji jiipada nawitita shopa caana presodapana lrico. ²² Mitsa njaji lritsicolre napieta tsenakja nataoñacawa nayoa cayami pia lrioyana. ²³ Njite nawacaacawa njaji filisteonai italricanaa naacarro pada ofrenda nadiote Dagón irso, njite nacatiima-taaca carroa.Naaco cayoji: ''Wa diote shaamaca jliaji wacoema Sansón niini lricadaacani wacaapi ricon.'' ²⁴ Nacapa cádanacon njaji inaiki, naamatsiadalri nadiote irso, naaco: Wa diote shaamaca jliaji wacoema niini lricadaacani wacaapi ricon, jliaji imatsiketacada wayacalree njite lriinoca aima wakitsiñape.'' ²⁵ Nacatiima-taaca cádanacoa, naaco: ''Iwana Sansón lrinó-carro wecaa-carro lriicao.'' Niini naaca nawana Sansón lrimotó-carro napresotacawa lrikjoiteni njite necaaca lriicao. Nacadaa lriemawa napecolrico njaji panti ipje jipacada pjiomi jliaji panti. ²⁶ Niini Sansón iaco lrirso jliaji yempetida jipa cada lricaapi rico lridee carroni: ''Picadaa nonotaca njaji pantiipje jipacada pjiomi jliaji panti, notaitá-carro njopaacacawa nanaco.'' ²⁷ pakjami cadaana jliaji panti inaiki sho, inaitjepe, atsianai. Niini cadana nawacaacawa pjiomi njaji talricanaatinai filisteonai. Tre mil inaiki atsianai, inaitjepe yofawa panti capatsite itapje naco icapacape nadejitaca Sansón. ²⁸ Ikena Sansón iwanaca Dioikjaolre, lriaco lrirso: ''No-Minalri Dio, piwaadatsa njoa! Pinaitja matsiacalri Dio, picadaa njoidawa papienatsa, notaitá-carro noomaca nocoadao papiatsa nainai njaji filisteonai njeta capoa notji yameemape.'' ²⁹ Ikena Sansón jipaacawa nanaco njaji yaamanade pantiipje pamoyoaperri lriorsoalri inaco jliaji panti, lridoitá-carro njaji pantiipje, aapana atsialriemasho, njite aapana inarroema sho. ³⁰ Sansón yaaco cayoji: ''¡Picadaa mayamica njoa nainai njaji filisteonai!'' Lridoita kjaida njaji pantiipje, ikena jliwacao jliaji panti yenondapana nanaco njaji inaiki pjiomi iwacaacalrio niini. Aima pjaa njaji inaiki lriinolri mayami cadanacon naoya njaji lriinolri caafi catoani. ³¹ Naawa njaji lriweenai njite pjiomi njaji lrikitsiñape jlinirri nacope, naacarro njepa nadietá carro Sansón idakim. Nadawani Zora njite Estaol ioyawaaca lrico, nadawacarromtsa jlinirri Manoa. Sansón yaají pia nanaco njaji Iraelnai vente walria icoa.