¹ Aima jalredaoca shaapodam, naniwacarroa lrico napania trigo, Sansón jipa idee apana cabra ienipena lriáa-carro lricapa lrino iderse. ''Ima lriaco lrirsowaaca,'' Njoewaotsa romaacawa lrico rsoaji noino.'' Mitsa rsonirri corrin icadaa Sansón sheewaca ninio. ² Rsonirri yaaco Sansón irso: ''Nowadacantja corrica piomano, niini noacano lrirso jliaji pikitsindaji imatsiaca. Mitsa matsiadarro pjaaca rsoaji roweedoa, picapjentsa. Rsoenakja pjita pinoano.'' ³ Njite Sansón yaaco narso: ''Panaya jliaji corriotsa njoaca irso maatsicalri nanaco njaji filisteonai nonaitja cadaa narso maatsi ima njaaca inaitja norso maatsi.'' ⁴ Niini Sansón yaa jipa trecinto-naa zorro, njite lripapina yaamanape neetipiwaaca-sho. Njite lripapi neetipiwaca naco lamparina. ⁵ Njite kerraa cádanacoena njaji lamparina, lrifieta njecoa njaji zorro nanacojle njaji trigo nawaketajina njaji filisteonai, niini kerraca njaji trigo nawaketajina njite njaji corri perritoa naniwaca nakinkerre lricopetoa, nama tsakja njaji oovapji njite olivoapji tsakja. ⁶ Niini natatjacawa njaji filisteonao cocaca jliaji inaitjalri cayo, njite nacaite njemi Sansón-ca jliaji inaitjalri cayo, lritsimarre jliaji yofacada Timnat lrico. Lrinaitja cayo ima lriñjawerri iaca Sansón iino lrikitsindaji imatsiaca irsoenakja lrioya. Niini njaji filisteonai naa namjaita rsoaji iinarro njite rsonirri tsakja. ⁷ Njite Sansón yaaco narso, ''Lrikjaote jliaji inaitjalri, njoa watsa yooma nacoadao iinai, njite yamiotsa njoa kjerreca nonaitja cayoji nocaite capisho.'' ⁸ Ikena lricadowaa nawarrodale, nacotsipa irroati rico. Njitedalri lria lriofawa jiipana taji lrico jalraapeco cawa Etam lrico. ⁹ Ikena njaji filisteinai namatsietacawa oowi icaona Judá lrico, niini namatsietaacawa njaji tsolrodaonai Lehi rico. ¹⁰ Naaco njaji atsianai Judá lricope: ''¿Coadao iino inoacá acrro wakjoete?'' njite naaco narso, ''Cayo wanaitjaca waomá carrotsa Sansón imotocao lridawaacalri njiteo fepá-carroni, wanaitja-carro lrirso cayotsa lrinaitja capisho faa lripjeyao.'' ¹¹ Njite tre mil atsianai Judá lricope iawa Sansón idawacalri nirse, Etam lrico, njite naaco Sansón irso, ''¿Capja corrica piajíi filisteonaica njaji italricanaatalrica wanaco? ¿Coada pinaitja wamatsicanao narso?'' Njite Sansón yaaco narso: ''Nja inaitja norso maatsi, niini nonaitja narso cayo.'' ¹² Njite naaco Sansón irso tsenakja: ''Wanoca wapapí-carro pjia wadee-carro narso njaji filisteonai.''Sansón iaco narso, ''¿Capja corrica shaa catsa ioma iinoca njoa? ¹³ Niini naaco lriso, ''Cotsa wainó carroca pjia, icaamitsa waoma wapapica pjia wacadaa-carro pjia narso njaji filisteonai. Wacaite pirso, cotsa wainó carroca pjia.'' Ikena napapicani yamakjaa jinorroti walrikjaisho, njite nadeeni tekjoite lridawaacalri njite. ¹⁴ Lrioca cádanacoa Lehi lricojle, njaji filisteonai nawanetaacawa nanocayawa naoketa capoa Sansón. Ikena Dio Icaolrini iorroco kjeyapenatsa Sansón naco Jiidati-sho. Njaji jinorroti napapishopa lrinaapa naco namacawa cayoji yamacati ima capishoa, njite njawacatsa jiwawa lricaapi ioya. ¹⁵ Sansón ioketa paita borro icacoapii, niini jlipacani, lriino lrisho mil atsianai. ¹⁶ Sansón yaaco, ''Paita borro icacoapii sho, nowaketa aima nadakim njaji mayamperrim, paita borro icacoapii sho noino mil atsianai.'' ¹⁷ Yaami cádanaco caacoca Sansón, lripeeco jliaji borro icacoapii njite lricadaa lripitanao niini Ramat Lehi. ¹⁸ Njite meeta Sansón icaolre njite lriaco Wa-Minalri irso: ''Pjiatsa icadaa pirsodalri jiametá-carro njaji filisteonai. Mitsa panaya mayamicaotsa njoa meeta capoa nocaolre, njite njawatsa jipa njoa njaji inaiki corriperritsa yaa matsiadalri pirso.'' ¹⁹ Niini Dio icadaa ooni imotocawa jalraacawa ricó jiipai lrikjoite Lehi rico, ikena ooni imotocao njiteo. Niini kjaidani, pomena tsenakjani lriira cayami ooni. Njite lricadaa lriipitanao niini En Hacore, Lehi rico catsani panashete. ²⁰ Sansón icaite Irael naco filisteonai jiawajli wente walria icoa.