¹ Njite Jefté, Galaad inakjoite-dalri oowi kjaidete, mitsa apama iinarro cawilredarron ienipecani. Galaad pia jliaji jlinirri. ² Niini rsoaji Galaad iino keenipe lrisono paana lrienipeo. Njite nataoña cádancoena njaji lrienipe lriino irsoperri, nameenaca napjerri Jefté lriacacarro naoya jiidatí rico naapana lrikjoite, ima naaco lrirso: ''Corriotsa cocá carroca pirso fanirri irsompe nakjaoite.'' ³ Icaamitsa Jefté iawa lriwenaipe ioya lria-carro lriofawa Tob jipaite ricojle. Jefté iwaketa lrikitsiñapewa inaiki maatsí-perritsa iwaopiakje naacarro lriinai ⁴ Njite papia nacojle jalredaoca, njaji amonitanai neema Irael ikjoete. ⁵ Niini nano cádanacopiena njaji amonitanai nainoacá carroena Irael ikjoete, njaji pekipenai Galaad lricope naa naoma Jefté nadietá carron Tob jipaite rikjoiteni. ⁶ Naaco Jefté irso: ''Pino wainai pjia-carro waapiyawalre wataitá-carro wainoacawa nakjoete njaji Amón lricope.'' ⁷ Njite Jefté jiepaca njaji caconaperri Galaad lricope, ''Shaa piatsa maatsi icapaca norso njite imeenaca noá ioya njonirri iipana lrikjoite maatsicalri rico. Njite coadenakja ino ioma njoa irso cádanacoena maatsicalri?'' ⁸ Mitsa njaji caconaperri Galaad lricope naaco Jefté irso: ''Niinicapa wadia waoma pjia lrikjaote jliaji maatsicalri warsolri, pinoena wainai pinoacá-carro nakjoete njaji amonitanai, niiniotsa pjia watsa naapiyawalre pjiomi njaji iofacapeo Galaad lrico. ⁹ Jefté iaco narso njaji pekipenai Galaad lricope, ''Idieta cadaa njoa noopana lricojle noinoacá-carro amonitanai ikjoete, njite wa-Minalri icadaa faamacana, njoa watsa iapiyawalre.'' ¹⁰ Niini naaco njaji pekipenai Jefté irso: ''Wa-Minalri ipjeya wacaiteca pjia corri-cadaa wanaitja cayoji wacaite capisho pirso.'' ¹¹ Niini Jefté íno nainai njaji pekipenai Galaad lricope, njite njaji inaiki aimadan nacadaa naapiyawalreoni, njite na-comandantecani. Naa cádanacoa Mizpa lricojle nacaité-carro Dio irson, Jefté icaite narso pjiomi coanca nanaitjaca yaacoti lriapiya. ¹² Niinina Jefté imeenaca iacoti narso njaji talricanaatinai Amón lricope: ''¿Cocao jliaji maatsirri irsolri wakjoete? ¿Coada íno maatsicalri rico jipá-carro waoya wepaite?'' ¹³ Njite jliaji amonitanai italricanaa idieta yaacoti Jefté irso: ''Ima nano caojli pia Egipto lrikjoite njaji Iraelnai, njeta pia waoya fepaite, Armón nakjoite Jaboc nacojle, lriocawa Jordán nacojle. Panaya, idieta fepaite matsiacalri rico.'' ¹⁴ Jefté imeenaca tsenakja yacoti Amón italricanaa irso, ¹⁵ lriaco lrirso cayoji: ''Cayo Jefté icaiteca irso: corrin Irael jitaca amonitanai jipaite, corrin tsakja jepaite njaji Moab lricope, ¹⁶ ima namoto caojli piawa Egipto lrikjoite njaji Iraelnai, nayoeta jliaji Manoa Irraipawan njite naawa Cades ikjaolre. ¹⁷ Irael imeenaca pia yaacoti lrirso jliaji Edom italricanaa, cayoji: 'Pinaitja matsiacalrim picadaa feyapawa pjipaite rico, mitsa corrim Edom italricanaa shaapani. Nameenaca tsakja yacoti lrirso jliaji Moab italricanaa, corrin tsakja jliepa. Niini atsa naofawa njaji Iraelnai Cades rico. ¹⁸ Niini naacawa jalrapocolri rico teeco Edom njite Moab jipaite ioya, naawa jeerri imotokema Moab irso, njite naofa pjatoawa Armón pemajle. Mitsa corrin njewacawa Moab jipaite rico, ima Armón piaca jliaji Moab jiapite yocacawaca. ¹⁹ Irael imeenaca yacoti Sehón irso, amonitanai italricanaa, italricanaatacada pia Hesbón lrico, Irael iaco lrirso: 'Pinaitja matsiacari picadaa feyapacawa pjipaite naco waocá carro wayada nacojle.' ²⁰ Mitsa corrin Sehón icadaa Iraelnai jiyapacawa jlipaite naco. Niini Sehón iwaketaca pjiomi njaji lri-tsolrodaonai, njite lrimeenacana Jahaza lricojle, icatsa lrinoacacawa Irael ikjoete. ²¹ Niini jliaji wa-Minalri, na-Diote njaji Iraelnai, lricadaa Irael icaapi rico Sehón njite njaji lrinaikite, cayotsa Irael shaamacana. Caishopena Irael jipaca lrirsowao njepaite njaji Armón perri yofacape pia niini. ²² Njepa narsowao pjiomi njaji narsolri pia lri ricoda jipaica nayada njaji amonitanai. Armón nakjoite Jaboc nacojle, njite jalrapocolri nakjoite Jordán nacojle. ²³ Ninina wa-Minalri, na-Diote njaji Iraelnai, Jlita piena njepaite yooya njaji amonitanai Irael ipeyajle, niini panaya corritsa pitaitá-carroca pjitaca pirsowao jliaji jiipai. ²⁴ Icaamitsaotsa pjitaca pirsowao njaji jiipai pi-diote Quemo yaají pirso. Ima coaperricatsa jiipai wa-Minalri Dio yalriotsa warso, fepacaotsa lrikjoete. ²⁵ ¿Capja piwaada matsia pjaaca pjia Balac ioya, Zipor irri, Moab italricanaa? Ima corritsa coca lricaite nakjoete njaji Iraelnai. Corrin coancaojlica lrinaitja oowi Irael ikjoete. ²⁶ Treciento walria pia Iraelnai iofacawa Hesbón lrico njite jipaite rico, Aroer lrico tsakja, njite pjiomi nerricoda njaji yacaalre tsomiperri Armón ioya. ¿Coada corrin jita pia jliaji jiipai jliawajli pia? ²⁷ Cotsa cocaca nonaitjalri pirso maatsi, mitsa pjia dekja inaitja norso maatsi pinaitja capoa oowi nokjoete. Jliadaotsa jalredaocaca jliaji, Jliaji WAMINALRI, jliaji icaitecada pjiomi naco, lricaitecaotsa cocacaotsa lrioma nanakjoite njaji Iraelnai njite njaji Amón perri. ²⁸ Mitsa jliaji Amón italricanaa corrin jliepa jliaji Jefté icaiterri lrirso. ²⁹ Ikeena Dio Icaolrini iorroco Jefté nacó, niini jliyapacawa Galaad njite Manasenai ikjaolre, njite Mizpa Galaad lricoda tsakja, njitedalrina lriawa naikjaolre njaji Amón-perri. ³⁰ Jefté inaitja pada yacoti Dio irso niini, lriaco cayoji: ''Picadaa cadaa njoamaca njaji Amón perri, ³¹ njite coandalri cadaotsa imoto nopananomalri-kjoite lricoadatá-carro njoa, noino cayami njaji amonitanai, Dio iyadacaotsani, njite nocadaotsa Dio irso ofrenda sho nomjaitanda Lrirso.'' ³² Njitena Jefté iawa amonitanai ikjaolre lrinoacá-carro nakjoete, njite Dio icadaa jliamacana. ³³ Lrinoaca nakjoete njite aima lrinocana, Aroer nakjoite teeco jlinaa Minit nacojle, njite Abel Keramim tsakja, vente yacaalre padenirri. Cayotsa Iraelnaica yaajíi nanaco njaji inaiki amonitanai. ³⁴ Njite Jefté idia kenawa lripana lricojle Mizpa rico, lriito imoto lripana lrikjoite rocoadatá carroni, roñaa pandero njite catiima rorrapajica. Icami-cadanaatsa lrienipecano, corrinatsa lrirso pada pjantja rooya. ³⁵ Lricapa cádanacotsano, lritsafaa lritsayani, lriaco rorso: ''¡Yaa! ¡Noenipe! ¡Oopi pipakjanta nocaolre inonaacalri pekirri-dalri sho, oopi picadaa pada njotaoda nocaolre inaco! Ima nonaitjaca pada yaacoti wa-Minalri iinai, njite corrin notaita nomacoadataca jliaji yaacoti nonaitjanda lrirso.'' ³⁶ Niini roaco lrirso: ''Pjia njonirri, pinaitja pada yacoti wa-Minalri iinai corridalritsa pitaita pimacoadataca, pinaitjena norso cayoji picaite capisho Lriso nonaco, ima wa-Minalri icadaca pjiamaca njaji picoema amonitanai.'' ³⁷ Roaco rsonirri irso: ''Pai, pinaitja matsiacalri norso, picadaotsa noácarro awacada nacojle yaamapi keerri icoa, noá carroatsa noiya nirse naapiya njaji nokitsiñapeji ima corriketsa cainirri-carroca njoa corrin tskjaotsa norso carrocaotsa noenipe.'' ³⁸ Njite jliepano: ''Warsena piawa.'' Lricadaa roawa yaamapi keerri icoa. Ikena roacawa naapiya njaji rokitsiñapeji awacada nacojle, naiya nirse corri capoenatsaotsa rotaita rorsoca roinirri corrin tsakja roenipe. ³⁹ Yaamapi kerri shaapodam rodia roocawa rsonirri iderse, njite lrinaitja roapiya cayoji lrinaitja capisho yaacoti ajádalri sho. Corrin coancaojli pia rsoyapa atsia yaapiya, roikjaotena caidalri-manatsa nawaadacano njaji inaitjepe Irael lricoperri ⁴⁰ naiyacano coatro jalredaoca icoa nawada-carro coan piaca rsoaji Jefté iito Galadita-dalri.