¹ Abimelec jiapodam, Tola, Púa irri jinicoa, Dodo irri, lriyomjetá-carro Iraelnai; pada atsia Isacar nakjoite-dalri iofacadawa Samir lrico awacada cawa Efraín lricoda. ² Icapiatsa jliaji icaitecadaca nanaco njaji Iraelnai ventitre walria icoa. Njite mayamini, nadawan Samir lricotsa ³ Jliapodamjite, Jair, Galaad inakjoité-dalri jimawa. Icapiatsa jliaji icaiterrica nanaco njaji Iraelnai ventido walria icoa. ⁴ Lrirsopia trenta lrienipe, njite nacoanaa najicawa borro naco. Narsopia tsakja trenta nayacalre Galaad poco jipaite rico, Havot Jair najicana atee panajiete. ⁵ Mayami Jair njite nadawani Camón lrico. ⁶ Njaji inaiki aimadan Iraelnai namaimata pjatoa namatsicanawa Dio ipeyajle, nacadaa nacaolre Baalnai naco, Astarot, nadiote naco njaji Aram lricope, nadiote naco njaji Sidón lricope, nadiote naco njaji Moab lricope, nadiote naco njaji Amón lricope, njite nadiote naco njaji Filisteonai. Oopi namaca WAMINALRI, corrinatsa naaca lrirso matsiadalri. ⁷ Njite kerroaca matsinaa jliaji wa-MInalri niini lricadaacana Filisteonai njite Amonitanai icaapi ricona. ⁸ Nainonaataca njite namatsiketaca aimatsa njaji Iraelnai jliawajli pia, dieciocho walria icoa njerrapiteetaca njaji Iraelnai iofacapewa Jordán idanajle, amorreonai jipaite rico, Galaad lrico. ⁹ Njite njaji amonitanai nayoeta jliaji Ooni Jordán nainoacá-carro Judánai ikjoete, Benjamínai ikjoete, njite nakjoete njaji Efraín iipaneta. Aimatsa njerrapitaca njaji Iraelnai. ¹⁰ Ikena nawanaca Dio ikjaolre njaji Iraelnai, naaco cayoji: ''Oopi wanaitja maatsi pikjoete, wamaca capoa wa-Diote njite wakenakja matsiadalri Baalnai irso.'' ¹¹ Niini wa-Minalri iaco narso njaji Iraelnai, ''¿Capja corrica yaajíi njoaca imanacota jia naoya njaji Egiptonai, Amorreonai, Amonitanai, Filisteonai, ¹² njite Sidonionai ioya?'' Njaji Amalecitanai, Maonitanai namatsiketa piaca shaa aimatsa, njite iwana noikjaolre njite nowataca shaa nacaapi ioya. ¹³ Njite cayomitoa imaca Njoa iáacarro matsiadalri narso nja apaanatsa dionai. Cayoshopa, corrinatsa nomanacotá-carroca shaa panaya. ¹⁴ Warsa iáa iwana narso njaji dionai icadaalri icaolreo inaco. Icadaa namanacotaca shaa irso cádanaco maatsidalri. ¹⁵ Mitsa njaji aimadan iraelitanai naaco Dio irso: ''Ajádalri wanaitjaca maatsi. Pinaitjena waapiya coancatsa piomaca. Icaamitsa waoma pimanacotaca faa jliadaa jalredaoca ca jliaji. ¹⁶ Namaca njaji dionai narsolri pia naacarro matsiadalri Dio irso naoya. Njite corrinatsa Dio ioma njerrapitaca minitsa njaji Iraelnai. ¹⁷ Njite njaji Amonitanai nawacaacawa naofacatoa Galaada lrico. Njite njaji Iraelnai nawacaacawa naofacatoa Mizpa lrico. ¹⁸ Niini njaji Galaad iapiyawanai naaco narsowaca, ''¿Coandalriotsa atsiaca jliaji initalriotsa inoacawa nakjoete njai amonitanai?'' Niiní jliacaotsa naapiyawalreca njaji iofacapewa Galaad lrico.