¹ Jiimica, shiaa iacape matsiadajli jiapodan, shiaa yumacape jliaji matsiadajli: icapa napji jiipada naqueritanipia nite napji nayuani. ² Icapa jliaji Abraham, jliniri, nite Sara, imotuetacada jliaji ienpeti; curicacaojli cooca jirso, nowanacani. nobendiciacani nite noaca jorsedajli jlienipewa. ³ Ajadajli, Dio imayaquetacaotsa jliaji Sion; piomi napji maminajlinacawan, caicaotsa niaji Eden sho, piomiotsana acana napji Jordan ricopaojlico, caiji waminajli yapanacawa ipniapiwa, catiimacawa paofacawa nirse, pacawa mashaidajli cancion shoo. ⁴ Mamawadacatsa nooya jimica norso shiaa noyacajleta, ima nocadacaotsa apada yacooti, nite nocadacaotsa nacapa noaca jliaji camarrai napji naiquinai. ⁵ Tsomiquetsa jliaji nomatsiaca; jliatsaca nomanacotashopa jlimotowatsao, nite nacañataotsa nacapacaro naoyawa napji inaiquinai; piomi napji jajledauca riicope nawapacaotsa nua. ⁶ Jireta iiti yononrse, nite icapa jipainacojle, ima caiwatsa jliwayaquetacana napji itacatiisho, cai caotaniaji patojletacapisho patsayani niteotsa mayamica jlinaiquitena caiji dojliosho. mitsa caidajlicatsaotsa jliaji nomanacota shopa shia, nite jliaji nomatsiaca cadajliwaquetsacani. ⁷ Jimica norso, jia ianicape ljinaco jliaji ajadajli, jia, yacajleta, icadacape icaojewa nonaco, mawiotsao naiwana napji ashianai jinaitacape matsi irso. ⁸ Ima cañacanacaotsana camarra iñacani panani nite acorro iñawatsa nani finoda, mitsa jliaji nomatsiaca nite nonacotashopana caidajliwaquetsani. ⁹ Icafiawa, icafiawa, jietacawa jlidasho jliaji waminajli. icafiawa nacayosho napji oopimetua. ¿coritsaca piapiaca ipoa Rahab, pia iwayacacaita jliaji mawicajlina? ¹⁰ ¿curin piaca jienita ooni tewacadajli jlioyawaca, pinaitaca inipoca apji ooni macapawan tewacadajli nayoetacarowa napji pienitani pirsowajleo? ¹¹ Napji waminajli imanacotanin nacaotsa Sion nirse naiyacapite natima ipuan caidajliwetsa catimacana, jlicaotsa naoo teecojle jliaji narapitacapi ¹² Noatsa jliaji quenajli icapa irso. ¿coada ifiowa ashia iwana, napji mayamiopetsa, ashinai ienipecana, caicanaji panaitani majlitsisho? ¹³ ¿Coaada imawada jlioya jliaji waDiote inaitacada piomi napji pacapajli eeno nite jipai tsaca? jajlecacoan ifietacacao jlima jiomajli jlinaitaca jliruarico jliaji yocaita iwayaquetaca jia. ¿querre jlirua jliaji waponda? ¹⁴ Jliaji yomacaita waminajli icatsa Dio initajlicaotsa ideeca, curin watsa jlicapaca mayancajli curin tsacaotsa mafitacai inocani. ¹⁵ Ima, nuaca jliaji iDiote, icadacaita cananica jliñocasho jliaji ooni macapawan, jlipitanaca naminajli napji owinai. ¹⁶ Nocadaca noaco pinomajlico, nite nopaca pia nocapirico, notaitacaro nonaitaca jliaji eeno, piomi jliaji jajledauca, nocaitecaro Sion irso: jia catsa napji nonaquite ¹⁷ Icafiawa, icafiawa, pinuaca pia Jerusalen, pia irracaita jlicapiricuit jlirua jliaji waminajli, jlidewanetaca pia jlisho jliaji jlitemi. ¹⁸ Coritsa apada nanacoite nenipe imotoquenao jliaji idecaopenana, curin apada nanacoite piomi napji nenipe nataoñanda jipacaope nacapinta. ¹⁹ Catsa napji yamada matsiri piyapacao ¿cocanta yanica pinai coyojlewerico pia? inonacajli nite iwayacaqueti mawitacai matsetatsaca. ¿coocanta quenaca icapa pirso? ²⁰ Maidaquena napji pienipe? nanica naorsuawa inipo iparametanaco, caicanaji napanpe mayarico, pacamica Dio iruashona ²¹ Mitsa, panaya piimica jliaji, idewanacaita shoca pia curincada piira yajlaqui. ²² Pia waminajli Dios, pia Dio, jliatsa jliaji idanatacaita napji jlienipe cai jliaco: picapa notaca picapijlicoite jliaji copa, icatsa noirua yofaca nini, curica ruetsa piiraca pipieta jliricoda. ²³ Nocaotsa nacapiriconi napji imatsiquetacape, narso napji icaitecape pirso. piorsuawa, wemanicaro pinaco picadaca jliaji pidenite jipaisho nite inopsho nemanicaro jliricoda.