¹ Jimi norso, jia yufacape jipai inomapinaco! panaya yapaca jimiwa matsia norso, jia tecoperi yacajle. nominajli iwanaca nua nomotocadanaco nocaapa jliwanaca nua noipitanaco, nodua imotueta nocaapa jejledauca. ² Cai jlicadaca nonomawa caaiji matseta quemetesho; jlidawa nua jlicaapi idanamiite; jlipadameta nua caiji iyaitiapofisho mashiefi; jlidawaca nua matseta yaropajlico ³ Jliaco norso: pia norsodajli, Israel, pinacuiete nocada nacapa jliaji matsaidajli. ⁴ Nite nuepacani; nowaopiapia nodenica macuadatsa, maidaca nua micapantsa, mitsa, nominajli inai nocapa jliaji nomatsiaca, noDiote watsa icaoñaca nua. ⁵ Nite panaya cacoca jliaji nominajli jlia jinaitacada nuua nomotocaujliwa jlirsodariwa, noquitsidatacaro jliaji Jacob tsenaca, Israel iwaquetacacaro jlinaiwa, ima matsiadajli Dio icapaca norso, nite jlica nuidawa. ⁶ Nite jliaco: tsotsa pirso pia norsodajli pinaitacaro matsia narso napji Jacob inaiquite nite piquitsidatacaro napji manacoperin Israel ricuite. nocadawatsa camarraiwa pia narso napji mepacaperin, pimanacota caruatsana piomi jajledaucarico. ⁷ Cai jliaco jliaji waminajli, jliacatsa iquitsindatacaita Israel, jliaji maopitadajlitsa. Norsowajle napji namacudatanin, napji curim perri naoma napji yacajle icuan, nite natsaca napji idejicape narso itajlicanatinai irso: nemawatsa nacapa pia napji itajlicanatinai, natodawatsa naorsipadawa pirso napji itajlicanati ienipe. jilma jliaji waminajli imatsiaca, nite jliatsaca mamatsica nadajlitsa Israel, jliaji iniwanacada pia. ⁸ Cai jliaco jliaji waminajli: jliadanacoatsa nocañata piicapa nomatsiaca nomiwatsa irso, nite jliawaliotsa nomanacotaca pia noquitsidatawatsa pia; nowapaotsa pia, nocadawatsa paada yacoti pirso yacajle iapiya, nomatsieta caotsatsena jliaji jipai maminajlinadarin ⁹ Picaitewatsa narso napji nadanataji imotocao: imotua pantinomajle, piomi napji yufacape cadaucapiriico: icañatacao. nacapaotsa inipojlico tecuietee; nite piomi napji majlitsi catinacaotsana. ¹⁰ Curin watsa mawitacai o metajlico narso, curin watsa jeeri imatsicacana, ima jliaji quenadajli icapa narso jlianicaotsawa nainai; jlidecaotsa shiaa ooni jajlamiwerico ¹¹ Nite nonaitaotsa inipoca piomi noipananaco, nite nomatsietawatsa jliaji nonipote. ¹² Icapa jlinowatsa tecoite, apadapena inoca jliparramete apepena peemete nite apepena ashiemete nite apadapena Sinim jipaitenacoite. ¹³ Icanta, eeno, icatimatacao, jipai icanta queema, shiaa jipananape! ima waminajli icatimataca jliaji iyacajle, quenawatsa jlicapaca napji coyojleperin. ¹⁴ Nite jliaco jliaji Sion: oopi jlimacaca nua jliaji waminajli, nite curim jliwaopiaquetsa nua. ¹⁵ ¿Capanta apama inaaru imawadaca ienipe iooya, jliaji roadatoa irra roinia, ima curica quena rocapaca jlirso jliaji roenipeda? ajadajli rotaita romawadacaca jlioya, nite nua curin nomawacaca ioya. ¹⁶ Icapa, nodana ipitanana noinewa; jliaji picorarani acaniaji nopeyajle ¹⁷ Naqueyapitaca nadiacao napji pienipe, mitsa napji imatsicacapena nawatsawa. ¹⁸ Picaapa pipocoode, piomi nawaquetacacao nite naocaotsa picaojle. ajadajlica cafidajlica nuaa cai jiaco jliaji waminajli piadecawatsa pietacaotsa naine caiji patipisho matsiacai, nite pinacocaotsani caiji inarro icasacadasho. ¹⁹ Ninitsa napecondaca pia nite namacandan, caiji namacacani apada jipai jliwaquetsa, panaya tsonatsa naofacaroda mitsa napji ifietacapena oopi nawa tecoojle. ²⁰ Namotocao nacapa jajledauca napji nenipe narapitacadano, nacaite pirso: tsoapicajlena jliaji waofajli nini, picadapa waofacarodawa, wataitacaro wafacao jliricoapi. ²¹ Nite watsa pitataca piwacatsa: ¿cooca imueta nacapa jadeuca napji yenpetipe? norapitacadano nite curin notaita quenipeca nua, napecondan nite imacacadan inirri. ¿ cooca itaoñaca napji yenpetipe? picapa, nacada pia apametsa nua ¿ caiiteri inoca napji? ²² Cai jliaco waminajli: icapa, noretaca nocapi nanaco napji naiquinai, noretaca nowanderan nanishopa napji yacajleta. Nadecaotasa nenipe nanapanaco nite naitonaipe nanapicaotsana. ²³ Itajlicanati naiwatsa naniricana, nite rsuaji jlino yapacaitacaotsa yenpetipeno; natodaotsa naosri padao pirso jipainacojle nite naperrowatsa jipai naipanacoite; nini watsa pianica nuaaca jliaji iminajliti; curim watsa nopaimanietaca napji iapacape nuaa. ²⁴ ¿Capantanta pataitaca pataca naoya npji tsojludaonai jliaji nananida, capanta pataita parraca napji napanin napji matsiperi? ²⁵ Icatsa jliaji jlicaitejlica jliaji waminajli: nataita nataca naoya napji napanin nite jliaji nanani yofacaroda; ima nuemacaotsa pipodape icuema nite nomanacotaotsa pienipe. ²⁶ Nowatsa naiñao nadaqui napji jirrapitetacape pia;nadewanaotsa nairanasho, caiji vinoasho, nini watsa nanaica noaca jliaji naminajli, imanacocaita pia matsiri ioya noa Jacob iDiote.