¹ Ninpia ape atsia Benjamín poco inacjoité dalri, ape atsia nacapanda njaji inaiki, lriipitana Cis, Abiel irrí, Zeror irrí, Bercorat irrí, Afía irrí, Benjamín poco ibacjoité dalri tsacja. ² Lrishopia ape lrirrí lriipitana Saúl, matsiadalri icapacanaa. Corripia pacapa ape atsia napecolrico njaji Iraelnai matsiadalri pantja icapacanaa Saúl iuya. Atsia jalripaapalri. Corripiatsa coca jiyapani, icaamipiatsa naocaca lriteda naco. ³ Papia nacojle maanalre pia njaji Cis iburron. Niini Cis inaa lrirrí Saúl lriá carro lriomana, lriaco lrisho:''Pjipa pidee paana nanacjoite njaji washoperriiá carro ioma njaji waburron. ⁴ Nini Saúl iaca iomana awacada caawa rico nayaclre iemalri niini njaji Efraín poco, lria tsaja Salisa jipaite rico, mitsa corrim naoketana. Njitédalri naawa Saalim jipaitena rico, mitsa corrim tsacja naokeeta niinina. Njiite dalri njeyapawa njepaite rico njaji Benjamín poco, mitsa coriim tsacja naokeeta niinina ⁵ Naoca cádanacoa Zuf jipaite ricó, Saúl iaco nasho njaji lrishoperri lriinaiperri: ''Inoena wadiawa, wadetsantja njonirri jitaca icaolre waicjaote nacja corrintja lriborron naco.'' ⁶ Mitsa lrishodalri iaco lrisho: ''Lri ricoda yacaalreca jliaji, niini ape atsia Dio ishodalri. Ape atsia caconaadalri; Coancada lricaiteca lrimoto cayoji lricaite capisho. Picadaa waa carró liderse, wadetsanta lricaiteca femi cjaiterricja inipo fepa waa carró pjawa. ⁷ Njite Saúl iaco nasho njaji lrishoperri: ''Waa cada lriderse, ¿Cocaotsa waa lrisho? Ima opina wainjaope iwayacao, cotsa coca washo waoda lrisho jliaji Dio ishodalri. ¿Cocantja waa lrisho?'' ⁸ Jliaji lrishodalri iaco isho:" A nshoji madalrida gramo palraatape noaope lrisho jliaji Dio ishodalri, lricaité carroatsa coanjerrica inipoca washolritsa fépaca waacarroá.'' ⁹ (Oopi pia Israel ricó, pada ioma cadaa itatjaca lriicao Diu iinai, lricaite mana cayoji: ''Píno, waa tatatja waicao lriinai jliaji inoparrotacaita.) ¹⁰ Niini Saúl iaco lrisho jliaji lrishodalri: ''Matsia njomi picaiteca, pino waa wacapa lriicjaolre ''. Ikeena naaca nacapa lriyacalre ricojle yeenondalrida nacó lriofaalri nirse jliaji Dio ishodalri. ¹¹ Njerra cádanaco jliaji jiipanada lriemalri niini jliaji yacaalre, nacapa pana inaitjepe yempetipe toa idiacapena iacapem jita ooni; Saúl njite lrishodalri naaco nasho, ''¿Capja aaca lriofao jliaji inoparrotacaita?'' ¹² Njite njaji inaitjepe iempetipe toa njeepana, naaco: ''Icatsa anji; icatsa jliarra iemalri ipeyajle. Cjeya iaca lriicjaolre, ikeenaotsa lriacawa ajaiteji ima njaji inaiki aimadan nainoca maaficalri Dio isho panaya lrípolrico nacó jliaji jiipanada. ¹³ Atsaotsa iokeetani pjeewa cawatsa yacaalre ricó, iokeetaotsani lripjeya toa lriaca lrinja lrípolrico nacó jliaji jiipana. Njaji inaiki aimadan corriotsa nainjá carroca lripjeya, ima jliacaotsa itatjá lrinaco jliaji maaficalri nainonda nainjá carró; jliapodamjite naotsa nainjaotsa njaji nawananipe inja nainai. Ienawa iokeetá carron caicatoa''. ¹⁴ Ikeena njeewacao yacaalre ricó. Cayo cadaana toa nacapena Samuel inoca naicjaolre, lría carroenawa yeenondalri nacojle. ¹⁵ Padaa toa Saúl inoca ipjeya Samuel icjaolre, Diu icadaa piena Samuél ianjíi lrinaco, lriaco lrisho: ¹⁶ ''Tjeewenaotsa, cayo kenaotsa jeerri No meenacaotsa picjaolre ape atsia njepaite ricjoite dalri njaji Benjamín poco, pinjetaotsa lrinaco aceite jliá caroatsa italricanaata nanaco njaji nonaikite aimadan Israelnai. Jliá watsa imanacota njaji nonaikite aimadan nacaapi ioya njaji filisteonai. Kjenaa nocapaca nasho njaji Nonaikite aimadan, ima naoca keena Noicjaolre jliaji natatjanda Noinai naiya caaya.'' ¹⁷ Samuél icapacadanaco Saúl, wa Minalri iaco lrisho: ''¡Icatsa jliarra atsia nocaiterri pisho! Icatsa jliaji italricanaatalriotsa nanaco njaji nonaikite aimadan.'' ¹⁸ Saúl itsoomita Samuél pantinomajle, lriaco lrisho: ''Picaite njomi cjerreca lriofawa jliaji inoparrotacaita.'' ¹⁹ Niini Samuél jiepani, lriaco: ''Icatsa njoa pitatjalri inaco. Pjirrena nopjeya lrinacojle jliaji panti Dio iyada yeenondalri naco, ima jliadaotsa jeecoapi cajliaji pinjacaotsa noinai. Tjewenaotsa nocadaa pidiawa, njite nocadaotsa pianjíi pjiomi njaji piomalri pianjíica noinai. ²⁰ Mjtenatsa picaolre nanaco njaji burro manalrerri ioya madalrideena jalredaoca, ima opiina naokeetana. Panaya jliaji naomanda pjiomi njaji Iraelnai pinaco watsa naokeetan njite pipaneeta naco tsacja.'' ²¹ Njite Saúl jiepa Samuel, lriaco lrisho: ''¿Cuajentja nonacoca naokeeta jliaji naomalri? Benjamín poco inacjoité dalrica njoa, icatsa faa tsooperri pjaaca imaimaca nanacjoite njaji Irael iipaneta. ¿Coada cai piaco nosho?'' ²² Ikeena Samuél ideeca Saúl njite jliaji Saúl ishodalri, lricadaa naofaawa nawacaaca carroda lrico napeyajle njaji apaana lriwananji injacape lriinai, wadeepe trentaca namaimaca pjiomi. ²³ Njite Samuél iaco lrisho jliaji iyanacada nainjao: ''Pidee nosho jliaji iipethi noalri pisho. Nonaalri pjieniitaca teecojletsa.'' ²⁴ Niini jliaji iyanacada jlipa lridee nasho peemam lricotsipam jliaji maaficalri nainondam, corri tsoo coca jlita lrioya, njite lriyacan Saúl isho lrinjacarron. Njite Samuél iaco lrisho: ''¡Picapa jliaji wacadaalri pipía! Pinjani ima wacadandaca pishowalrepe, cayoada icaoya panaya sho; jliada nacotsa nocaite cádanaco: ''Oopina noinai njaji inaiki aimadan noinaiwa''. Ikeena Saúl inaja keetsa Samuél iinai jliadaa jeecoapi''. ²⁵ Nadía cádanaco naorroco njiteo yacaalre ricojle, caaco Samuél Saúl iapiya panti capatsiite naco. ²⁶ Njite deepitoa, Samuél iwana lriicjaolrewa Saúl panti capatsite naco tsenacja, lriaco lrisho: ''Panaya pjinicoa, picaité carroena piaconao''. Niini Saúl jinico iemao, njite neema keena yamadape namoto naawa yacaalre ioya. ²⁷ Namoto caayao yacaalre ioya, Samuél iaco Saúl isho: ''Picaite pishodalri isho lría carró wapeyajle (niini jliaji lrishodalri lriaca napjeya), mitsa atsa pjia noinai, nocaité carró pjimi njaji iacoti Dio inaalri njoyapetaca pisho''.