¹ Ikeena Samuél jipaca apjeco aceite lriarró carró Saúl jiwida nacó, njite lriarro caami lrinaco lri tsootsoni lricacoda naco, njite lriaco lrisho: ''Wa Minalritsa iniwana pjia pitalricanaatá carró nanaco njaji lrinaikite aimadan. ² Pidia cádanacoatsa nooya, pioketaotsa yaame atsianai Raquel iicaonam icodapi, njepaite ricó njaji Benjamín poco, Selsa ricó. Njite nacaiteotsa pisho cayoji: ''Njaji burro pianjerri pioma, oopina naokeetana. Corritsa pjinirri jita icaolreo nanaco, panaya jlitenacja lricaolreo pinaco, lriaco cayoji: ''¿Cuanjeotsa nonaitjaca noenipe iapiya?'' ³ Teeco cádanacoenaotsa pjia, piocaotsa Tabor ricojle, lriemalri niini jiaji jaico macani. Pioketaotsa niini madalrida atsianai iacape ia matsiadalri Dio isho Betel ricojle, padotsa idee madalrina cabra ienipe pamoyoapena, pada ideotsa madalriita peetje, njite pada ideotsa jaico tjeda iana maaficalri iyam rico nanaitjanda lriarrodao, ⁴ natatjaotsa nacapacadanaco pjia, njite naotsa pisho yamaita peetje. Pjipaotsa napjeyan. ⁵ Njiteotsa, piawa lrinaco jliaji awacada Dio iyada, nawapacawa ricó njaji tsorodao Filisteonai. Pioca cádanco yacaalre ricojle, picapaotsa papoco inoparrotacape idiacape iorrocoa, iacapem iá matsiadalri Dio isho nirse, njite nadee arpa, tambor, flauta, lira tsacja; njite nanoparrotacaotsa. ⁶ Njite Dio Icaolre iorroco watsa kjeyanadatsa pinaco, njite pinoparrotacaotsa nainai, njité dalriotsa teecojleotsa pinaikika. ⁷ Pinaitja cayami naotsa pjiomi njaji nocaiterri pisho, pinaitjaotsa cocacatsa pioma pinaitjaca, ima piinai catsa Diu. ⁸ Pinowatsa piokeetaca noapiya aji Gilgal rico. Noacarro watsa picjaolre, wamjaita carroatsa ofrenda njite waino carro maaficalre ofrendao wamaodacashopa. Piwapaotsa siete jalredaoca kjerrecatsa noa nokeetaca piapiya nocaite carrowatsa pisho jliaji pisholritsa pinaitjaca. ⁹ Saul icaboco cadanaco lridiacarro Samuel iuya, Dio icambia lriwaopiakje. Njite jliada jlredaoca nanaitjacawa pjiomi njaji lricaiterri. ¹⁰ Naoca cadanacoa awacadanaco, papoco inoparrotacape iwacaacawa, njite jliaji Dio icaolre lriorroco cjeyanaadatsa lrinaco lrinoparrota carro nainei. ¹¹ Njaji iajicapeni oopitsa nacapa coanca lrinoparrotaca nainei njaji inoparrotacape, njaji inaiki nacaitepe nashowaca: "¿Coajicao jliaji Cis irri? ¿Pjao inoparrota cadaca jliaji Saul panaya?" ¹² Ape atsia niini dalritsa lriaco jliepaca:"¿ Cjaiterrio jliaji jlinirri? Caicarro panaya, corri cadanaco njepa coandalrica nacapa naaco mana: "¿Pjao inoparrota cadaca jliaji Saúl?" ¹³ Iami cadanacoena lrinoparrotaca, lriawa aji ienondalri naco. ¹⁴ Jliapodamina, Jliaji Saúl ikjirri jlico lrisho njite lrishodalri isho tsacja: "Kjerre piao piwaji? njite jlico jliepacani: " Wa piaca waoma njaji burro; mitsa corri cadanaco waokeetana, wa wacapa Samuel ideshe." ¹⁵ Lriaco Saúl isho tsenacja jliaji lrikjirri: "pinaitja matsiacalre, picaite njumi jliaji Samual icaiterri pisho." ¹⁶ Saúl iaco jiepaca lrikjirri: "Lricaite catsa washo oopi kena naokeeta njaji burro." Mitsa corrim lricaite lrikjirri isho lrinacoapana jliaji talricanati, Samuel icaiterri lrisho. ¹⁷ Njite piena, Samuél inaa nawacaacawa njaji inaiki aimadan Dio ipeyajle Mizpa ricó; ¹⁸ lriaco nasho njaji iraelitanai: ''Cai lriaco jliaji wa Minalri, na Diote njaji Iraelnai: Nomanacotá pia njaji Iraelnai Egipto lricjoite, nacaapi iuya njaji Egiptonai, naoya tsacja nja apana talricanaatinai jirrapiteeta capepiana. ¹⁹ Mitsa panaya, iménata jliaji Dio imanacotalri jia naoya njaji maatsiperri njite naoya njaji iinonaatalri pia jia icaitecadanaco lrisho cayoji: Piniwana pada italricanaatacaoda wanaco. Niini iwacaacawa Dio ipjeyajle inaikica nacó icoanaa njite ipaneeta naco tsacja. ²⁰ Samuél iwakeeta nanaikica nacó pjiomi njaji Iraelnai poco, njite Samuél iniwana njaji Benjamín poco. ²¹ Lrinaa Benjamín poco itsoomitacani napaneeta icoam nacó; niini Matrí iipanetaca jliaji lriniwanalri, niini lriniwanaca Saúl, Cis irrí. Njite nawana cádanacoenani, corrim nacapan. ²² Njite njaji inaiki, naoma pjaa natatjeta pjaaca iacoti Dio iinai: ''¿Capja lriokenao jliaji atsia?'' Njite Dio jiepani: ''A lridawacaorra ideecalre ipecolrico''. ²³ ''Niini njeecoa njaji inaiki naomá carro Saúl nadeecarron lridawaacalri njiteo, niini jlinico cádanaco lriemao napecolico njaji inaki jliyapa pjáana ima jalripani pjaaca naoyana, icaamipiatsa naocaca lrisho lritéda naco. ²⁴ Njite Samuél iaco nasho njaji inaiki aimadan: ''¿Icapjenina jliaji atsia Dio iniwanalri? ¡Corrin pacapa apada caidalri lricaisho pjiomi yacalre rico. Njite njematjaketsa cjaida njaji inaiki aimadan: "¡Owia watsa lriofacawa wa talricana!" ²⁵ Caicarro, Samuel Icaite nasho njaji inaiki aimadan cuaji caotsa nashotsa naofacawa njite njaji nasholri tsaotsa nanaitjaca, lridanana pada libro rico, njite lricañjatana Dio ipjeyajle. Jliapodamina Samuel imenaca nadiao njaji inaiki aimadan, nacoanatsa nadiaca napana ricojle. ²⁶ Saúl idia tsacjao lripana ricojle Guibeá rico, njite naa lrinai njaji apepena atsianai cjaidaperri, Dio inotaji icaolre ricó. ²⁷ Njite apepena matsiperritsa icaolre naaco lrinaco: "¿Cojintja lrimanacotaca faa jliaji?" Njaji inaiki cayolri iaco corrim naomaca Saúl njite corrim tsaca coca nadee lrisho. Mitsa corrim caacoca Saúl.