¹ Pekirri cadanacoena jiaji Samuel, Lrikeepitanata pia njaji lrienipe icaite caope Israel iacona. ² Jliaji ipjeriti nanacjoite naji lrienipe lripitana pia Joel, Njite jliaji jliapodada lripitana pia Abdias. icapiatsa njaaca icaite cape naacona aji Beerseba rico. ³ Mitsa njaji lrienipe corrim nanaitja cayoji njanirisho njite namjepata pia tsaca Dio, ima njaji piaca palrata jiapodam njite njaji regalo matsiperritsa, njite corim pia nanaitjaca jliaji matsiadalri. ⁴ Njite njaji caconaperi pekipenai nawaketacawa Samuel iapiya aji Rama rico. ⁵ Nacaite lrisho cayoji: "Picaocje, pekirina pjia, njite njaji pienipe corrim nanaitjaca cayoji pinaitja capisho. Pia washo apada talricanati icaitecaoda wacona caiji nacaisho pjiomi naji pana jipai nacope. ⁶ Corrim Samuel ipeyo jimica nacaite cadanaco lrisho cayoji: "Pia washo apada talricanati icaitecaoda wacona." Caicarro Samuel itatjaca Dio inai. ⁷ Njite Dio iaco Samuel isho: "Pia nasho njaji inaiki aimadan jliaji natatjalri pinai; ima njoaca jliaji namenatalri natalricana sho corri tsantja pjiaca. ⁸ Coampiaca nanaikíka Njota caojli piana Egipto lricjoite, cayo tsenacja nanaikíka panaya, namenataca Njoa naacarró matsiadalri nasho nja corriperritsa Dioca. Icatsa nanaitjalrica noapiya paanaya. ⁹ Pinaitjena nasho cayoji natatja capisho piinai; mitsa picadaotsa nanjii coancaotsa lrinaitjacana jliaji talricanaati italricanaatalriotsa nanaco. ¹⁰ Ikeena Samuel icaite njemi njaji inaiki aimadan, itatjacape lriinai natalricanaawa pjiomi njaji iacoti wa Minalri icaiterri lrisho. ¹¹ Lricaite nasho cayoji: ''Cayoatsa lritalricanaata inaco jliaji talricanaati. Lrideotsa ioya nja ienipe njite lricadaotsa njaa carroatsa jiecoa oowifiá ricó, njaa carroatsa iofaa caballo naco, njeecó carró napjeya nadaanatá carró njaji oowifiape talricanaati iyaape. ¹² Jlienitaotsa lrishowao nja paana capitamá carrona lritsolrodaoperre isho, panaotsa ianjíi miles tsolrodaonai naco, njite njaa paana cincuenta trolrodao naco. Lricadaotsa nja paana njecá carró jiipai namatsietá carro naapanaca ipjeya talricanaati isho, paanaotsa iniwa lrisho nja lripania, paanaotsa inaitja nainoacashoapao oowi ricó njite nanaitja tsacja njaji canacaiperri oowifiá isho. ¹³ Lrideotsa nja iitonaipe nanaitja carró lrisho pomenianjaipe, paana iyanacaope lrisho, paana inaitjacaope lrisho pan. ¹⁴ Jlitaotsa ioya jipaite, ipaniapji, ikinkerriapji matsiaperri pja lricadaa carró nasho njaji lrishoperri. ¹⁵ Jlitaotsa ioya diezmo shodalri ipania iniwanda ioya, njite ipaniapji ioya tsacja, lricadaa carrotsa nasho njaji trolrodaonai italricanaa naapiya njaji nashoperri. ¹⁶ Jlitaotsa inacjoite njaji matsiaperri pja idenjica atsianai, inaitjepe tsacja, jlita tjacjaotsa ioya njaji pomená perri iempetiapape, njite naburrón tsacja lricadaa carro nadenjica lrisho pjiomina. ¹⁷ Jlitaotsa iipirra ioya diezmo shodalri lrishowao, njite lricadaotsa idenjíi carro lrisho macoadatsa maatsicalri ricó. ¹⁸ Njite jliadaotsa jeecoapi, jiemataotsa iiya cjeti rico lriicjaote jliaji talricanaati iniwandatsa ishowao; mitsa jliaji wa Minalri corriotsa jlimí carroca isho jliadaa. ¹⁹ Mitsa njaji inaiki aimadan corrin naoma njemica Samuél isho, naaco lrisho: ''¡Corrina! Waoma pada watalricanao jliá carró ianjíi wanaco ²⁰ waoma pacoaca cafa nacayosho njaji apacoa ricoperri jiipai, jlia carró icaite waacona, lriá carró wapeyajle oowi ricó lriinoacá carró waicjaote wacoema iapiya. ²¹ Samuél jimi cayami coanca naaco njaji inaiki aimadan, lricadaa wa Minalri jimi lritatjanialre ricó. ²² Niini wa Minalri iaco Samuél isho: ''Pjiepena naaco, piniwana nasho pada natalricanaawa.'' Njite Samuél iaco nasho: ''Idiatoa pjiomi iyacalre ricojle.''