¹ O lenei, e leai se faasala i e o ia Keriso Iesu. ² Aua o le tulafono a le Agaga, o le ola ia Keriso Iesu ua faasaolotoina ai oe mai le tulafono ole agasala ma le oti. ³ O le mea na le mafaia i le tulafono, ina ua vaivai ia ona o le tino, na faia e le Atua. Na ia auina mai lona lava Alo, ua tino mai e pei o tagata agasala, o le taulaga foi mo agasala, na ia faasalaina ai le agasala i le tino. ⁴ Na ia faia lea mea ina ia atoatoa ai le amiotonu o le tulafono ia i tatou, ae tatou savavali e lē tusa i la le tino, ae i la le Agaga. ⁵ Ao latou e ola i le tino e loto atu i latou i mea a le tino, a o e i la le Agaga, e loto atu i mea a le Agaga. ⁶ Aua o le loto i la le tino o le oti lea; a o le loto i la le Agaga o le ola lea ma le filemu/manuia. ⁷ O le loto i la le tino o le ita lea i le Atua, auā e le usiusitai i le tulafono a le Atua, e le mafai foi i ai. ⁸ O i latou foi i la le tino, e le mafai ona fiafia i ai le Atua. ⁹ A o outou, tou te le i la le tino a e i la le Agaga, pe afai e nofo le Agaga o le Atua i totonu ia te outou. Ae afai ua le i ai le Agaga o le Keriso i se tasi, e lē fai ia mona. ¹⁰ Afai ua i totonu ia te oe Keriso, ua oti le tino ona o le agasala, ae o loo ola le agaga ona o le amiotonu. ¹¹ Ae afai ua nofo i totonu o ia le Agaga na faatuina mai Iesu mai le oti, o le ā faaolaina outou tino augavale e lona Agaga, o loo nofo i totonu ia te outou. ¹² O lenei, le au uso e, o tatou o tagata nofo aitalafu, a e le o i le tino ina ia tatou ola i la le tino. ¹³ Afai tou te ola e tusa ma le tino, e oti ai outou, ae afai e ola i la le Agaga e fasiotia amioga a outou tino, tou te ola ai. ¹⁴ E toatele e taitaiina e le Agaga o le Atua, o atalii i latou o le Atua. ¹⁵ Auā ua outou le maua le agaga o le pologa ina ia toe fefe ai; ae ua outou maua le Agaga o tamafai, tou te valaau atu ai, "Ava, le Tamā e!" ¹⁶ O loo molimau mai lava le Agaga i o tatou agaga, o fanau i tatou a le Atua. ¹⁷ Ae afai o tatou o fanau, ua avea foi i tatou ma suli, o suli o le Atua. O suli faatasi i tatou ma Keriso, pe afai tatou te tiga faatasi ma ia, ina ia faamanuiaina foi i tatou faatasi ma ia. ¹⁸ Aua o lo'u manatu e le tatau ona faatusaina le tiga i nei ona po ma le manuia atali e faaalia mai ia te i tatou. ¹⁹ Auā o loo faatalitali mea uma na faia ma le naunau i le faaalia mai o atalii o le Atua. ²⁰ Aua ua faatoilaloina mea uma na faia i le iu vale, e le o lona finagalo lea, ae peitai ona o ia na faatoilaloina ai, i le faamoemoe ²¹ ia tuusaunoa ia lava mea na faia ia le faapologaina e le iu vale, a e oo i le saolotoga o le fanau a le Atua e manuia ai. ²² Aua ua tatou iloa, ua oi faatasi ma oono faatasi mea uma lava na faia ua oo mai lava i ona po nei. ²³ E le gata foi i lea, a o i tatou lava ua i ai mea faapolopolo a le Agaga, tatou te feoi, o i tatou lava i totonu ia te i tatou, o loo faatalitali atu ia avea ma tamafai, o le faaolaina lea o tatou tino. ²⁴ Auā e faaolaina i tatou i le faamoemoe. Ae o le faamoemoe ua vaaia e lē o le faamoemoe. Auā pe faapefea ona toe faamoemoe se tasi i le mea ua vaaia? ²⁵ A e peitai a tatou faamoemoe i le mea ua le vaaia, tatou te faatalitali iai ma le onosai. ²⁶ E faapea foi le Agaga ona fesoasoani mai i lo tatou vaivai. Auā tatou te leiloa mea tatou te ole atu ai ma le tusa, a e peitai o le Agaga e fautua o ia mo i tatou , i le oi e le mafai ona talatalaina. ²⁷ A o lē suesue i loto ua silafia e ia le finagalo o le Agaga, auā o loo fautua o ia mo le au paia a le Atua e tusa ma le finagalo o le Atua. ²⁸ Ua tatou iloa foi, e galue le Atua i mea uma lava mo le lelei faatasi ma i latou o e ua alolofa atu ia te ia, o e ua valaauina i lona finagalo. ²⁹ Auā o e na silafia e ia anamua, na ia tofia anamua foi, ia foliga i latou i lona Alo, ina ia avea o ia ma ulumatua o le au uso e toatele. ³⁰ O e na tofia anamua e ia, ua valaauina foi i latou e ia; o e ua valaauina foi i latou e ia; o e ua ta'uamiotonuina e ia, ua faamanuiaina foi i latou e ia. ³¹ O lenei, se a sa tatou upu i nei mea? Afai ua 'au le Atua ma i tatou, o ai se e faasaga tau mai iai tatou? ³² O ia lava sa na le faasaoina lona lava Alo, a ua tuuina mai o ia ona o i tatou uma lava, e le foai fua e ia ia te i tatou mea uma lava faatasi ma ia i se a? ³³ O ai se na te molia le au filifilia a le Atua? O le Atua o lē tau amiotonuina mai. ³⁴ O ai se na te faasalaina mai? O Keriso Iesu o lē na maliu-e sili atu ma lena, na toetu mai o ia- o loo i le itu taumatau foi ole Atua, o loo fautua foi o ia mo i tatou. ³⁵ O ai se na te faateteaeseina mai i tatou i le alofa o Keriso/ O le puapuaga ea, poo le atuatuvale, poo le saua, poo le oge, poo le lē lavalavā, poo le pagatia, poo le pelu? ³⁶ Faapei ona tusia, "Ona o oe ua fasiotia ai i matou i aso uma, ua faatatauina i matou e pei o mamoe ā fasia." ³⁷ A ua tatou manumalo aiai i nei mea uma lava, ona o ia ua alofa mai ia te i tatou. ³⁸ Auā ua ou mautinoa e le mafaia e le oti, po o le ola, po o agelu, po o malō/alii, po o e malolosi, po o mea i nei ona po, po o mea atali, ³⁹ po o le maualuga, po o le loloto, po o se tasi mea, ona faateaeseina mai i tatou i le alofa o le Atua, o loo ia Keriso Iesu lo tatou Alii.