¹ O i tatou foi o ē malolosi, e tatau ona tatou onosai i vaivaiga o ē vaivai, ae lē tatau ona faafiafia i ai tatou lava. ² Ia tatou taitasi ma faafiafia i lē la te tuaoi mo le lelei, ina ia atiae ai o ia. ³ Auā e oo lava ia Keriso e lei faafiafiaina o ia e ia. ‘Ae e pei ‘ona tusia, “‘Ua pa‘u mai ia te a‘u le tauemuga a ē na agaleaga mai ia te oe. ⁴ Auā o mea uma foi na tusia muamua, na tusia ia e aoao mai ai ia te i tatou, ina ia tatou maua le faamoemoe i le onosai ma le faamafanafanaga mai i tusi. ⁵ O lenei, ia foaʻi atu e le Atua o le onosai ma le faamafanafanaga ia outou maua le loto gatasi e tusa ai ma Keriso Iesu. ⁶ Ia faia e ia lenei mea ina ia outou vivii atu ma le gutu e tasi i le Atua ma le Tamā o lo tatou Alii o Iesu Keriso, ma le manatu e tasi. ⁷ O lenei, ia outou talia e le tasi le isi, faapei ona talia foi o outou e Keriso, ia viia ai le Atua. ⁸ Auā ou te fai atu, ua avea Keriso ma auauna a le peritomeina ona o le upu moni a le Atua, ina ia faamaonia ai folafolaga na tuuina atu i augātamā, ⁹ ma ia vivii atu ai tagata o Nuu ese i le Atua ona o lona alofa mutimutivale. E pei ona tusia, “O le mea lea ou te vivii atu ai ia te oe i luma o Nuu ese, ma fai pesega i lou suafa.” ¹⁰ Ua toe fai mai fo‘i, "Ia olioli outou Nuu ese, faatasi ma lona nu‘u.” ¹¹ O lenei foi, “Ia vivii atu ia Ieova outou o nuu ese uma; ia vivii atu ia te ia o nuu uma lava.” ¹² Ua toe faapea mai foi Isaia, “E oo mai le aa o Iese, o le na tulai e pule i Nuu ese, e faamoemoe ia te ia o nuu ese.” ¹³ O lenei, ia faatumuina outou e le Atua o le faamoemoe i le olioli uma ma le manuia i le faatuatua, ina ia faateleina ai lo outou faamoemoe i le mana o le Agaga Paia. ¹⁴ Le au uso e, o aʻu foʻi, ua ou talitonu ia te outou. Ua ou mautinoa, ua tumu foi outou i le agalelei, ua tumu i le poto uma lava. Ua ou mautinoa e mafai foi ona outou aoaoina e le tasi i le isi. ¹⁵ A ua ou tusi atu ma le loto tele ia te outou i nisi o mea, ina ia toe faamanatu atu ia te outou, ona o le alofa tunoa na foaiina mai e le Atua ia te a‘u. ¹⁶ O le alofa tunoa lenei ina ia avea a‘u ma auauna a Keriso Iesu, ua auina atu i Nuu ese, e fai ma ositaulaga o le Tala Lelei a le Atua, ina ia talia le taulaga a Nuu ese, ua faapaiaina e le Agaga Paia. ¹⁷ O Keriso Iesu ua ou mitamita ai i laʻu auaunaga i le Atua. ¹⁸ Auā ou te lē mafai ona tautala atu i se mea sei vagana ai mea ua faia e Keriso ia te a‘u, ina ia usiusitai ai Nuu ese. O mea ia ua faia i upu ma galuega, ¹⁹ i le mana o faailoga ma vavega, ma le mana o le Agaga o le Atua. O le mea lea ina ia ou matuā faataunuuina ai le tala lelei ia Keriso, nai Ierusalema, atoa ma Iluriko. ²⁰ I lenei auala, o loʻu naunau e folafola atu le talalelei, ae le o le mea e iloa ai Keriso i lona suafa, ina ia ou le atiina ae i luga o le faavae o se tasi tagata. ²¹ E pei ona tusia, “O ē e lei oo i ai se tala e uiga ia te ia, ma e e lei faalogo i ai, o le a latou malamalama/iloa o ia. " ²² O le mea lea na faalavelave ia te a‘u i le tele o taimi sa le mafai ai ona ou alu atu ai ia te outou. ²³ A o lenei, ua leai se mea e nonofo ai i nei nu‘u, ma ua tele tausaga ua ou faanaunau/manao ai ou te alu atu ia te outou. ²⁴ O lo'u faamoemoega tatou te feiloai pe a ou ui atu i Sepania, ma ia outou fesoasoani mai i la‘u malaga, ma tatou fiafia faatasi ai mo sina taimi. ²⁵ Ae mo le taimi nei, ou te alu i Ierusalema, e auauna i le au paia a le Atua. ²⁶ Auā ua loto Maketonia ma Akaia ina ia avatu se foai mo ē matitiva o le au paia a le Atua o i Ierusalema. ²⁷ Ioe, sa latou loto foi i ai, aua sa nofo aitalafu iā i latou. Auā afai ua tofusia tagata o Nuu ese i a latou mea faaleagaga, ua tatau i tagata Iutaia ona auauna ia te i latou i a latou mea faaletino. ²⁸ O lenei, pe a uma ona faataunuuina lenei galuega, ma ua ou mautinoa ua maua e i latou mea uma na faaputuina, ona asia atu lea o outou, i le ala i Sepania. ²⁹ Ua ou iloa pe a ou alu atu ia te outou, ou te alu atu ma le tumu o le manuia o Keriso. ³⁰ Le au uso e, ou te aioi atu ia te outou i lo tatou Alii o Iesu Keriso, ma le alofa o le Agaga, ia outou finafinau faatasi ma a‘u i a outou tatalo i le Atua mo a‘u. ³¹ Ia outou tatalo ina ia laveaiina a'u mai i ē lē usiusitai i Iutaia, ina ia talia foi e le au paia o le Atua la‘u galuega mo Ierusalema. ³² Ia outou tatalo ina ia ou alu atu ia te outou ma le olioli i le finagalo o le Atua, ina ia ou maua fo‘i le malologa faatasi ma outou. ³³ Ia ia te outou uma lava le Atua e ona le manuia. Amene.