¹ Ou te faailoa atu ia te outou lo tatou tuafafine ia Fipe, o le tiakono lea o le ekalesia i Kenikerea, ² ina ia talia o ia e outou i le Alii. Ia outou faia e tusa ma le amio e tatau i le au paia, ma ia fesoasoani atu ia te ia i so'o se mea e manaomia ai e ia la outou fesoasoani, auā o ia sa fesoasoani tele mo le toatele o outou atoa ma a'u nei. ³ Ua ou alofa atu ia Pisila na Akuila, na la faigaluega faatasi ma a'u i le galuega a Keriso Iesu ⁴ o ē na tuuina atu o laua ola mo a'u. Ou te faafetai atu mo i laua, ua le na o a'u, ae faapea foi le ekalesia atoa i nuu ese. ⁵ Ua ou alofa atu foi i le ekalesia o i lo laua fale. Ua ou alofa atu ia Epaineto la'u pele, o le ulua'i fua (fa'apolopolo) o ia ia Keriso i Akaia. ⁶ Ua ou alofa atu ia Maria, o le na galue tele mo outou. ⁷ Ua ou alofa atu ia Aneroniko ma Iunia, o o'u aiga sa matou fa'atasi ma a'u i le falepuipui. Ua logoleleia i laua i aposetolo, sa la i ai ia Keriso e muamua ia te au. ⁸ Ua ou alofa tu ia Amepelia, o la'u pele i le Alii. ⁹ Ua ou alofa atu ia Upano, o le uso a auauna ia Keriso, ma Sataku la'u pele. ¹⁰ Ua ou alofa atu ia Apele, ua ta'uleleia o ia ia Keriso. Ua ou alofa atu i sa Arisopulõ. ¹¹ Ua ou alofa atu ia Herotiona, ma te aiga. Ua ou alofa atu i e o sa Makiso, o ē ua i le Alii. ¹² Ua ou alofa atu ia Tufaina ma Tufosa, o fafine na galulue i la le Alii. Ua ou alofa atu ia Peseti, o le pele, o le na galue tele i la le Alii. ¹³ Ua ou alofa atu ia Rufo, na filifilia e le Alii, i le ma lona tinā, o lo'u tinā foi lea. ¹⁴ Ua ou alofa atu ia Asugerito, ma Fegona, ma Herema, ma Pateropa, ma Heremea, ma le au uso o ia te i latou. ¹⁵ Ua ou alofa atu ia Filoloko ma Iulia, o Nereu foi ma lona tuafafine, ma Olumepa, ma le au paia atoa uma o ia te i latou. ¹⁶ Ia outou fealofani i le feasogi paia. O loo alolofa atu ia te outou ekalesia uma a Keriso. ¹⁷ O lenei, ou te aioi atu ia te outou, le au uso e, ia outou vaavaai i ē faatupu fevaevaeaiga, ma mea e tausuai ai, o mea e le tusa ma le mataupu ua a'oa'oina ai outou, ia outou liliu ese foi ia te i latou. ¹⁸ Auā o ē faapea, e le auauna i latou i lo tatou Alii o Iesu Keriso, ao latou lava manava; ma latou faasese i loto o tagata ua le manatu leaga, i lo latou faaneenee ma alofa fa'avivii. ¹⁹ Auā ua logo atu lo outou usiusitai e fai ma faataitaiga i tagata uma lava; o lea ou te olioli ai ona o outou. Ou te manao foi ia popoto outou i mea lelei, a ia valelea i mea leaga. ²⁰ O le Atua foi o le filemu na te nutipalaina Satani i lalo o outou vae. Ia ia te outou le alofa tunoa o lo tatou Alii o Iesu Keriso. ²¹ O lo o alofa atu ia te outou Timoteo, ma te galulue faatasi ma a'u, ma Lukio, ma Iasona ma Sosepatero, o o'u aiga i latou. ²² O a'u nei o Tesio, o le ua tusi lenei tusi, ua ou alofa tu ia te outou i la le Alii. ²³ O loo alofa atu ia te outou Kaio, o lē talia a'u ma le ekalesia uma. O loo alolofa atu ia te outou Erato, o le teutupe o le aai, ma Kuato lona uso. ²⁴ Ia ia te outou uma lava le alofa tunoa o lo tatou Alii o Iesu Keriso. Amene. ²⁵ Ia viia le na te mafaia ona faatumau ia te outou, e tusa ma la'u talalelei, ma le talaiga o le tala ia Iesu Keriso, e tusa ma le faaliga o le mea lilo sa natia i tausaga o le vavau; ²⁶ a ua faaali mai nei i tusi a perofeta, e tusa ma le poloaiga a le Atua e faavavau, o loo ua faailoa mai i nuu uma, ia iu ina usiusitai i le faatuatua. ²⁷ Ia i le Atua poto e toatasi le viiga e faavavau, e ala atu ia Iesu Keriso. Amene.