¹ Ia usiusitai tagata uma i faipule silisili, auā e leai se pule pe a lē mai le Atua. O pule o loo iai ua tofia e le Atua. ² O lea o ia o lē e fouvale faasaga i lena pule ua tetee atu o ia i le poloaiga a le Atua; o i latou fo‘i e tetee i ai, e fa‘amasinoina i latou lava. ³ Auā o alii/faipule e lē o se faamatau i latou i ē fai amio lelei, a o ē amio leaga. E te le manao ea e te lē fefe i lē ua iai le pule? Fai le mea e lelei, ona e maua ai lea o lona viiga. ⁴ Auā o ia o le auauna a le Atua ia te outou mo le lelei. Ae afai e te faia le amio leaga, ia e fefe ai; auā e lē ave fua e ia le pelu. Auā o ia o le auauna a le Atua, o lē na te taui ma sui le toasa i lē ua fai mea leaga. ⁵ O le mea lea e tatau ai ona outou gauai, e lē gata ona o le ita, ae ona o le lotofuatiaifo foi. ⁶ O le mea foi lea tou te totogi ai lafoga. Auā o ē pule, o auauna ia a le Atua, o ē tausisi i lenei lava mea e lē aunoa. ⁷ Ia outou totogi atu ia te i latou taitoatasi le mea e tatau ia te i latou; ⁸ Aua nei outou aitalafu se mea i se isi lava, tau lava o le alofa o le tasi i le isi. Auā o lē e alofa i lē lua te tuaoi, ua faataunuuina e ia le tulafono. ⁹ O poloaiga foi, “ Aua e te mulilua, aua le fasioti tagata, aua le gaoi, aua le matapeapea; afai foi e i ai se isi poloaiga, o lona aotelega lenei, “‘Ia e alofa atu i lē lua te tuaoi e pei o oe lava ia te oe.” ¹⁰ E lē agaleaga le alofa i lē lua te tuaoi. O le mea lea, o le alofa o le faataunuuina lea o le tulafono. ¹¹ O le mea lea, ua outou iloa ai le taimi, ua o‘o nei i le itula e ala ai e na momoe. Auā ua latalata mai lo tatou faaolataga i le taimi na tatou uluai faatuatua ai. ¹² Ua alu atu le pō, ua lata mai foʻi le ao. O lenei, ia tatou tuu ese galuega a le pouliuli, a ia tatou oofu i ofutau o le malamalama. ¹³ Ia tatou savavali ma le tatau, e pei o le ao, aua le poula po o le onā; aua fo‘i nei o tatou savavali i le faitaaga, po o le tuinanau lē pulea, aua foi le misa ma le fuā. ¹⁴ A ia ofu i le Alii o Iesu Keriso, aua foi nei sauni le tino e faamalie ai ona tuinanau.