¹ O lenei au uso e, ou te aioi au ia te outou, ona o le alofa mutimutivale o le Atua, ia outou tuuina o outou tino e avea ma taulaga ola, e paia ma talia e le Atua. O le mea lea e tatau ai ona outou faia. ² Aua foi tou te amio faatasi ma lenei lalolagi, ae peitai ia liliuina ile toe fuataiina o outou mafaufau. Ia outou fai lenei mea ina ia outou suesue ma faamaonia pe se a le finagalo ole Atua, o mea ua lelei, ma le mālie/ma taliaina ma le atoatoa. ³ Aua o le alofa tunoa na tuuina mai ia te a'u, ou te fai atu ai ia te outou: aua le faasili le manatu o se tasi i le mea ua tatau ona manatu ai, a ia māmā le manatu ia tusa ma le tofiga o le faatuatua ua taitasi ma tuuina mai e le Atua/tofu ai mai le Atua. ⁴ Auā faapei o itu tino e tele i le tino e tasi, a e le tasi se faiva i itu tino uma. ⁵ I le itu lava e tasi, o tatou e toatele, e tasi lava le tino o Keriso, ae o tatou foi o tagata taitoatasi o le tasi ma le isi. ⁶ E eseese foi a tatou meaalofa na tuuina mai i le alofa tunoa. O le tasi meaalofa o le perofeta, ua faatauina mai le tofi o le faatuatua. ⁷ Afai ole mealofa a le tasi o le auaunaga, ia tuu atu ia te ia e auauana. Afai o le meaalofa a le tasi o le aoao atu, ia tuu ia te ia e aoao atu. ⁸ Afai o le meaalofa a le tasi o le apoapoai, ia apoapoai o ia. Afai o le meaalofa a le tasi o le foai mea, ia faia ma le matamau. Afai o le meaalofa a le tasi o le taitai, ia taitai ma le filigā. Afai o le meaalofa a le tasi o le faailoa o le alofa mutimutivale, ia faia ma le loto fiafia. ⁹ Aua nei faatagā alofa. Ia inoino i le leaga; ia pipii i le lelei. ¹⁰ Ia fefaapelepeleai i le fealofani o uso; ia tausolomua ona ava o le tasi i le tasi. ¹¹ Aua le faavaivai, i le filigā, ia malosi le loto. E uiga i le agaga, ia naunau. E uiga i le Alia, ia auauna ia te ia. ¹² Ia olioli i le faamoemoe, ia onosai i le puapuaga, ia finafinau i le tatalo. ¹³ Ia tufatufa atu ni a outou mea i le mativa o le au paia. Ia tausisi i le alofa i tagata ese. ¹⁴ Ia faamanuia atu i e faasaua mai ia te outou; ia faamanuia lava, a e aua le fetuu. ¹⁵ Ia outou olioli faatasi ma e ua olioli, ia ouotu tagi faatasi ma e ua fetagisi. ¹⁶ Ia gatasitasi o outou manatu. Aua le manatu i mea silisili, a ia feoai ma e ua faamaualalo. Aua le faafiapoto. ¹⁷ Aua le taui atu le leaga i le leaga. Ia sauniuni mea e tusa i luma o tagata uma lava. ¹⁸ Afai e mafaia e outou, ia outou nofo lelei /ola filemu ma tagata uma lava. ¹⁹ Le au pele e, aua le taui atu ma sui, a ia outou tuu atu i le toasa o le Atua. Auā ua tusia, " Ua faapea mai le Alii, O ia te a'u le taui ma sui, ou te taui atu. ²⁰ O lenei, a matelaina le ua ita mai ia te oe, fafaga ia te ia; a fia inu ia, avatu ia te ia e inu ai; auā o le amio faapea e faafaupue ai malala ola i luga i lona ulu." ²¹ Aua le faatoilaloina oe i le leaga, a ia faatoilaloina le leaga i le lelei.