¹ Le au uso e, o le manao o lo'u loto ma la'u tatalo i le Atua mo Isaraelu, ina ia maua e i latou o le faaolataga. ² Aua oute molimau atu ia i latou e i ai lo latou naunautaiga i le Atua, ae leai so latou malamalama. ³ Aua o le le malamalama i le amiotonu e mai le Atua, ma latou saili ina ia galueina la latou lava amiotonu, ua latou le talia ai le amiotonu a le Atua. ⁴ O Keriso le atoaga o le tulafono mo le amiotonu o i latou uma o e talitonu. ⁵ Aua na tusi e Mose o le amiotonu e maua i le tulafono. O le tagata na te usitaia e ola ai o ia". ⁶ A o le amiotonu e maua i le faatuatua e faapea ane; "Aua e te fai ifo i lou loto, "O ai o le a alu a'e i le lagi" (o lona uiga ua faapea atu ina ia auina mai Keriso i lalo). ⁷ aua fo'i le faapea ane, "O ai se alu ifo i le mea maualalo?" (o lona uiga ua faapea atu ina ia auina a'e o Keriso nai e ua oti). ⁸ A o le a le mea o fai mai ai?. "O lo o latalata mai ia te oe le Upu, i lou gutu ma lou loto". O le Upu lena o le faatuatua o lo o matou tala'i atu. ⁹ Afai e te tautino i lou gutu o Iesu o le Alii, ma e talitonu i lou loto na toe faatuina mai e le Atua Iesu mai le oti, e faaolaina ai oe. ¹⁰ Aua o le loto e talitonu ai, e oo mai ai le amiotonu, a o le gutu e tautino ai e oo mai ai le ola. ¹¹ Aua ua faapea mai le Tusi "O i latou uma o talitonu ia te Ia e le faamaina i latou". ¹² Aua e leai se eseesega i le Iutaia ma le Eleni, aua o le Alii e toatasi o tagata uma, ma e tele lona alofa ia i latou uma e valaau atu ia te Ia. ¹³ Aua o i latou uma e valaau atu i le Suafa o le Alii e faaolaina i latou. ¹⁴ E faafefea ona latou valaau atu ia te Ia, ae latou te le talitonu i ai?. E faafefea ona latou faatuatua ia te Ia, ae latou te le i faalogo faatasi i ai?. E faafefea ona latou iloa pe afai e leai se tasi na ia faailoa atu ia te i latou?. ¹⁵ E faafefea ona latou tala'i atu, ae seiloga e auina atu?. - E pei ona tusia, "E ese le matagofie o vae o i latou e tala'i atu le Talalelei." ¹⁶ Ae e le i usitaia e i latou uma le Talalelei. Aua ua fai mai Isaia, "Le Alii o ai ea ua talitonu i la matou Upu e taulogologo atu. ¹⁷ "E tupu mai le faatuatua i le faalogo, o le faalogo fo'i i le Upu a Keriso ¹⁸ Ae oute fai atu "Latou te le i lagona?" O lea lava. "Ua oo atu lo latou leo i atunuu uma, ma a latou Upu ua oo atu i soo se itu o le lalolagi" ¹⁹ Ae oute fai atu "Pe na le i iloa ea e Isaraelu". Na muai fai mai Mose "Oute faatupu lou loto tiga i se mea e le o se Nuu. Ae foliga mai o se Nuu e leai sona malamalama, ma oute faatupu fo'i i ai lou ita" ²⁰ Na matua lototele lava Isaia ina ua fai mai, "Na maua a'u e i latou e le i sailia mai a'u. Na ou faaali atu ia i latou e le i mananao mai ia te a'u." ²¹ Ae ua fai atu o Ia ia Isaraelu, "O aso uma e aapa atu ai o'u lima i se nuu faalogogata ma le loto maaa o ona tagata"