¹ O ona po ia na sau ai Ioane le papatiso ma lauga i le vao o Iutaia ua faapea mai, ² "Ia outou salamō, aua ua toeitiiti ona oo mai lea o le malo o le Atua". ³ O ia lenei na ta'ua mai e le perofeta o Isaia o loo faapea mai, "O le leo o lē o loo tala'i atu i le vao, ia outou teuteu ma faasa'osa'o le ala o le Alii". ⁴ O le ofu o Ioane, sa fai mai i le fulufulu o le kāmela ma lona fusipa'u na fusi ai i lona manava. O ana meaai o le sē akerise ma le meli vao. ⁵ O i latou uma mai Ierusalema ma Iutaia, faapea foi ma ē o loo nonofo latalata ane, ua omai uma ia te ia. ⁶ Ua ia papatisoina i latou i le vaitafe o le Ioritana, ma ua latou faailoa atu a latou agasala. ⁷ Na iloa atu e ia, ua toatele le au Satukaio ma le au Faresaio ua omai ina ia papatisoina i latou, ua ia faapea atu, "O outou na o fanau a gata feai, o ai ea na faailoa atu ia te outou le mālaia o le a oo mai? ⁸ Ia outou fa'ailoa mai, ua outou salamō. ⁹ Aua nei outou faapea ifo, o outou o fānau a Aperaamo. E mafai lava e le Atua ona faatupuina mai i maa nei ni fānau mo Aperaamo. ¹⁰ Ua tu nei le to'i (matau) i le a'a (tafu'e) o le laau, o lona uiga, o laau uma e lē fua mai ni fua lelei, e tāina i lalo ma susunuina i le afi. ¹¹ Ou te papatiso atu ia te outou i le vai ina ia outou salamō, ae o lē o loo mulimuli mai, e sili atu o ia ia te a'u, e oo lava i nonoa o ona se'evae e le aoga ona ou aveina. O ia lēna o le a papatisoina outou i le Agaga Paia ma le afi. ¹² O loo ia te ia foi le tui e faamamaina ai le faaputugasaito. E aoina ma faaputuina i le falesaito, ae susunuina le lapisi i le afi e lē pe. ¹³ Na sau Iesu mai Kalilaia ina ia papatisoina o ia e Ioane i le vaitafe o Ioritana. ¹⁴ Sa taumafai lava Ioane e taofi Iesu, o lea na ia fai atu ai, "E tatau ona e papatisoina a'u ae le aoga ona ou papatisoina oe (Iesu)". ¹⁵ Ae ua tali atu Iesu ia Ioane, "Ia e papatiso mai ia te a'u, auā e tatau lava ona fai le mea sa'o". Ua papatisoina foi e Ioane o Iesu. ¹⁶ Ua uma ona papatisoina Iesu, ona alu a'e ai lea o ia nā i le vai, ua faafuase'i ona ia iloa atu le lagi ua avanoa, ma le Agaga Pāia ua alu ifo mai le lagi, ua foliga pei se lupe, ma faapepepepe i ona luga. ¹⁷ Na lagonaina foi le leo o loo faapea mai, "O lo'u atalii pele lenei, ua ou fiafia ia te Ia".