¹ Ina ua fanau Iesu i Peteleema i Iutaia, i ona aso o avea Herota ma Tupu, na taunuu ai makoi mai sasa'e i Ierusalema ma latou faapea ane, ² "O fea o i ai le ua fanau mai, o Ia o le Tupu o tagata Iutaia? Na matou vaaia lona fetu i le itu i sasa'e, o lea ua matou o mai ai e ifo atu ia te Ia." ³ Ina ua faalogo Herota le tupu i la latou tala, ona atuatuvale ai lea o ia atoa ma Ierusalema uma. ⁴ Na faapotopotoina uma e Herota o ositaulaga sili, atoa ma le au tusiupu o le nuu, ona ia fesili atu lea ia te i latou, "O fea o fanau ai le Keriso? ⁵ Ona latou tali mai lea ia te ia, "O Peteleema i Iutaia, aua na tusia e le au perofeta. ⁶ A o oe Peteleema, i le nuu o Iuta, e le faatauvaa oe i alii uma o Iuta, aua e mai ia te oe le o le a avea ma faipule, ma ia leoleoina lo'u nuu o Isaraelu" ⁷ Ona fe'au faalilolilo atu lea e Herota o le au makoi, ma ia fesili atu ia te i latou, po o le a le taimi na vaaia ai le fetu. ⁸ Ona ia auina atu lea o i latou e o i Peteleema ma ia fai atu, "O ma sailiili malie le pepe. A outou maua o Ia, ia outou faailoa mai ia te a'u, oute fia alu atu fo'i e ifo atu ia te Ia." ⁹ Ina ua mae'a ona latou faalogo atu i le tupu, ona latou malaga ese ai lea, ona muamua mai lea ia te i latou le fetu lea na latou vaaia i sasae, se'ia oo ina tu le fetu i luga o le nofoaga o lo o i ai le tamaititi. ¹⁰ Ina ua latou vaaia le fetu ona latou fiafia ai lea ma le olioli. ¹¹ Ua ulufale i latou ma latou vaaia ai le pepe ma Maria lona tina. Ua latou faapa'u'u fao ma latou vivii atu ia te Ia. Ona latou talaia lea o mea sili ona taua ia i latou ma latou ofoina atu i le pepe o meaalofa o auro, o le pulu lipano, ma le pulu muro. ¹² Ua faailoa e le Atua ia te i latou i le miti ina ia aua ne'i toe fo'i atu ia Herota, ona latou ui atu lea i le isi auala e toe fo'i atu ai i lo latou atunuu. ¹³ Ina ua o ese atu i latou, ona faaali ai lea o le agelu a le Alii ia Iosefa i le miti ma faapea atu "Tula'i ia i luga, ia e ave le tamaititi ma lona tina, ma o outou sosola atu i Aikupito. Ia outou nonofo ai ina se'iloga oute fai atu ia te oe, ona o le a saili Herota i le tamaitti e fasioti. ¹⁴ O le po lava lea na tula'i ai Iosefa ma ia ave le tamaititi ma lona tina, ma latou o atu i Aikupito. ¹⁵ Na latou nonofo ai lava se'ia oo ina oti o Herota. O i na taunuu ai le fe'au na fetalai ai le Atua e ala i lana perofeta faapea, "Na ou valaauina lo'u Atalii a o i ai i Aikupito". ¹⁶ Ua manatu Herota, ua pelogia o ia e le au makoi, ona ita tele ai le o ia. Ua ia auina atu fo'i fitafita ma latou fasiotia tamaiti tama uma i Peteleema ma le na aai, mai le lua tausaga le matutua aga'i i lalo, e tusa ma le taimi na ia filifilia e pei o le au makoi. ¹⁷ Ua taunuu ai lea o le fe'au na folafola mai e Ieremia le perofeta, na ia faapea mai, ¹⁸ "Ua lagona le leo i Rama, o le fetagisi tele, ma le laue leotetele, ua tagi aue Rasela mo lana fanau, ma ua musu o ia ina ia faamafanafanaina o ia, aua ua leai se tasi o totoe. ¹⁹ Ina ua oti Herota, faauta, ona faaali ai lea o le agelu a le Alii ia Iosefa i le miti i Aikupito ma faapea ane, ²⁰ "Tula'i ia ma e ave le tamaititi ma lona tina ma outou o atu i le nuu o Isaraelu, aua ua feoti i latou na taulamalama e fasiotia le tamaititi." ²¹ Ua tula'i Iosefa, ua ave le tamaititi ma lona tina, ma latou o mai i le nuu o Isaraelu". ²² Ua faalogo o ia ua avea ma tupu i Iutaia Arekilao le atalii o Herota, ona fefe ai lea o ia e alu. Ae mulimuli ane ua faailoa e le Atua ia te ia i le miti, e alu atu i Kalilaia. ²³ ma nofo i le aai ua ta'ua o Nasareta. Ona taunuu ai lea o le upu a le Atua na folafolaina e ana perofeta, o le a ta'ua o Ia o le Nasareta.