¹ Sa ta'ita'iina Iesu e le Agaga i le vao ina ia faaosoosoina o ia e le tiapolo. ² O le taimi tonu lea, ua lagona ai le fiaai o Iesu, aua o loo anapogi o Ia, e le o ai pe inu foi mo le fāsefulu aso. ³ Na alu ane ai lea o le na faaosoosoina o Ia ma faapea atu, "Ina tago ia e fa'aliu areto nei ma'a, pe afai o oe o le atalii o le Atua". ⁴ Na tali atu Iesu ia te ia, "E le nā o meaai e ola ai le tagata, ae o upu uma e sau mai i le fofoga (gutu) o le Atua". ⁵ Sa toe ta'ita'iina foi e le tiapolo Iesu i le aai Paia, ona ia aveina lea o ia i le pito i māualuga o le falesā, ⁶ ona ia toe fai atu lea ia te ia, "Oso ia i lalō, pe afai o oe o le atalii o le Atua, aua ua tusia, "Na te fa'atonuina ana agelu e tausi ia te oe ma si'i i o latou lima ina ne'i lavea lou vae i se māa". ⁷ Na fai atu foi Iesu i le na fa'aosoosoina o Ia, "O lo'o fai mai foi, aua e te tofotofoina lou Alii le Atua". ⁸ Sa aveina foi e le tiapolo Iesu i le mauga māualuga ma fa'amatamata i mālo uma o le lalolagi, aemaise o le mamalu ma le mātagofie tele. ⁹ O lo'o ia faapea atu, "Ou te tuuina atu nei mea uma ia te oe, pe a e to'otuli ma ifo mai ia te a'u". ¹⁰ Sa fai atu foi Iesu i le tiapolo, "Alu ese ia oe Satani ma iinei, aua ua tusia, e te ifo atu i le Alii lou Atua, ua na o ia lava e te auauna iai". ¹¹ Na tuua lea o Ia e le tiapolo, ona omai ai lea o agelu ma auauna mai ia te ia. ¹² Ua fa'alogo Iesu ua lokaina Ioane i le falepuipui, ona alu ese mai ai lea o ia mai Kalilaia. ¹³ Na ia toe alu ese mai foi i Nasareta ma alu atu e nofo i Kapanaumi, e latalata ane i le sami i Kalilaia i totonu lava o le itumalo o Sepulona ma Nāfātali. ¹⁴ Na tutupu nei mea uma, ina ia faataunu'uina ai upu a le perofeta o Isaia, sa fa'apea mai, ¹⁵ "O fanua o Sepulona ma Nāfatali, e ui atu i le sami i tala atu o le Ioritana, o nu'u ese foi o Kalilaia". ¹⁶ O tagata uma o lo'o nonofo i le pōgisā, ua vaai i latou i le malamalama tele lava, ae o i latou o lo'o nonofo i le nuu ma le ātaāta o le oti, ua alu a'e i o latou luga le malamalama. ¹⁷ Sa amata loa ona lāuga Iēsu talu mai lenā taimi, ma Ia fai atu, "Salamo nei loa, aua ua latalata mai le Malo o le lagi". ¹⁸ Na savalivali atu Iesu i tafatafa ane o le sami o Kalilaia, ae ona iloa atu se au uso se to'alua, o Simona ua igoa ia Peteru ma lona uso o Anetele'a, o lo'o lafo lo lā upega i le sami o lo'o fagōgōta. ¹⁹ Ua fai atu foi Iesu ia i lāua, "Omai e mulimuli mai iā te a'u, ona ou fāia lea o oulua ma ni tagata fagogota lelei (faifaiva) i tagata uma". ²⁰ Ua tu'u o lā upega, ae mulimuli atu ia Iesu. ²¹ O lo'o fa'aāuāu pea le sāvaliga a Iesu, ae ona toe vaaia ai foi leisi au uso e toalua, o Iakopo le atali'i o Sēpetaio ma Ioane lona uso. O lo'o i totonu o le va'a ma lo la tāma o Sēpetaio, o lo'o su'i māsae o a latou ūpega. Sa valaau atu iai Iesu, ²² ona tu'ua lea e i lāua o lo la tāmā i le va'a ae mulimuli atu ia te Ia. ²³ Na alu ane lea o Iesu i le nuu uma o Kalilaia, ma a'oa'o atu i totonu o falesa, lauga atu le upu o le Mālo o le Atua ina ia fa'amalōlōina ituaiga fa'ama'i eseese ma tagata mama'i uma lava. ²⁴ Ua o'o atu le tala i itu uma o Suria, ona aumai ai lea ia Iesu o i latou uma o lo'o maua i ituaiga ma'i ma fa'ama'i eseese, e pei o ma'i temoni, ma'i lili ma tino ua pēpē. Sa fa'amālōlōina uma i latou e Iesu. ²⁵ Ua mulimuli atu foi le to'atele o tagata ia te Ia mai Kalilaia, Tekāpōli, Ierusalema, Iuta ma tala atu o Ioritana.