¹ Ua ui ane Iesu i Ieriko. ² Faauta, sa i ai le tagata e igoa ia Sakaio. O ia o le aolafoga sili ma sa mauoloa o ia. ³ Ua taumafai o ia e vaai po o ai Iesu, 'ae le'i mafai ona iloa atu e ia i luma o le motu o tagata, auā e pu'upu'u o ia. ⁴ 'Ona momo'e atu lea o ia i luma o le motu o tagata, ua a'e i le sukamoru ina ia iloa atu ai o ia, auā o le a ui ane Iesu i lea ala. ⁵ Ua o'o atu Iesu i lea ala, 'ona tepa a'e lea o ia i luga ma fai atu iā te ia, " Sakaio e, ia vave ifo i lalo, auā o le asō ou te nofo ai i lou fale. ⁶ O lea na ia vave ifo ai i lalo ma feiloa'i atu ia te ia ma le fiafia tele . ⁷ Ua iloa e tagata uma lenei mea, ona muimui ai lea o i latou uma, ma fa'apea ane, "Ua alu o ia e asiasi i le fale o le tagata agasala." ⁸ Ua tu i luga Sakaio ma fai atu i le Ali'i, Le Ali'i e, fa'auta, o le 'afa o a'u meatotino uma 'ou te avatu i ē ua matitiva, ae āfai fo'i ua ou fa'asese i se tasi i se mea lava, o le a ou toe taui atu fa'afaina iā te ia. ⁹ Ua fai atu Iesu iā te ia, " O le asō e o'o mai ai le faaolataga i lenei 'āiga, auā o ia fo'i o le atali'i o Aperaamo. ¹⁰ O le Atali'i o le Tagata na sau o ia e sāili ma fa'aola i tagata ua leiloa. ¹¹ Ua fa'alogo i latou i nei mea, ona tautala atu le o ia i le fa'ataoto, auā ua latalata o ia i Ierusalema, ae ua manatu i latou o le a fa'aalia le Mālō o le Atua i lea lava taimi. ¹² O lea na ia fai atu ai, " O le tasi ali'i sili na alu atu o ia i nu'u mamao e saili malo ma toe fo'i mai. ¹³ Ua valaau atu o ia i le to'asefulu o ana auauna ma tufa atu i ai mina e sefulu ma fai atu iā tei latou, 'Ia fai ai ā outou pisinisi seia ou toe fo'i mai.' ¹⁴ A ua le fiafia ai tagatā nu'u iā te ia, ma ua latou auina atu o latou sui tete'e, ma fa'apea atu, ' E le manana'o matou i lenei tagata e fai o ia ma o matou tupu. ¹⁵ Ua toe fo'i mai o ia ua ia te ia le pule uma, ona ia a'ami lea o auauna na ia tufa atu iai tupe. O lona fa'anaunauta'iga( mana'o) o le su'esu'eina lea o tupe mama na latou maua mai a latou taumafaiga fa'apisinisi. ¹⁶ Ua sau le muamua i ona luma, ua fa'apea mai, 'Le Alii e, o lau mina ua maua ai mina e sefulu. ¹⁷ "Ua fai atu le ali'i sili iā te ia, ' Malo lava ia te oe le auauna lelei. Ua e faamaoni i mea itiiti, o lea o le a e pule i aai e sefulu.' ¹⁸ Sa sau le lona lua, ua fa'apea mai, Le Ali'i e, o lau mina ua maua ai mina e lima.' ¹⁹ "Ua fai atu le ali'i sili iā te ia, o oe e pule i a'ai e lima.' ²⁰ Ua sau le isi ma fa'apea mai, 'Le Ali'i e, o lau mina lenei, ua ou teuina malu i le ie, ²¹ aua ua ou fefe iā te oe, ona o oe o le tagata e mana'o i mea e tele. E te ave i mea e te le'i teuina ma selesele mea e te le'i lūlūina.' ²² Ua tali atu le ali'i sili, ' Ou te fa'amasinoina oe i au lava upu, le auauna leaga e. Na e iloa lava o a'u o se tagata mana'o tele, ou te ave i mea ou te le'i teuina, ma selesele i mea ou te le'i lūlūina. ²³ Aisea la na e le tu'uina atu ai la'u tupe i le faletupe, semanū ou te aoina fa'atasi ma tupe fa'asili pe a ou fo'i mai. ²⁴ Ua fai atu le ali'i i ē o tutū mai, 'Ia ave ese le mina mai iā te ia ma avatu i lē ua iai mina e sefulu.' ²⁵ "Na latou tali mai, ' Le Ali'i e, ua iā te ia mina e sefulu. ²⁶ Ou te fai atu fo'i iā te outou, o lē ua i ai mea, e toe fa'aopopoina atu i ai, a o lē e leai sana mea, e o'o lava i mea ua iā te ia e ave'eseina. ²⁷ O i latou nei ua fai ma o'u fili, o ē na lē manana'o e fai a'u ma tupu iā te latou, ia aumai iā te i latou i'inei ma fasioti iā te i latou i o'u luma. ²⁸ Ua uma ona fai atu o ia i nei mea, ona muamua atu lea o ia i lana malaga, ma alu a'e i Ierusalema. ²⁹ A o latalata atu o ia i Petefake ma Petania, i le mauga e ta'ua o Olive, 'ona auina atu ai lea e ia o ona so'o e to'alua, ³⁰ ma fa'apea atu, " Inā o atu ia i le aai o lata ane. E te lua o'o atu, o lo'o ia le tama'i asini e le'i ti'eti'e ai lava se tagata. Ia tatala o ia ma aumai iā te au. ³¹ A fesili ane se tasi iā oulua pe aisea ua tatala ai o ia. Ia fai atu i ai, ua mana'o iai le Ali'i. ³² Na ō atu ē na auina atu ma maua le tama'i asini e pei ona poloa'i atu ai Iesu. ³³ A o tatalaina e i latou o ia, ua fesili ane le e ona le asini, " Aisea ua oulua tatalaina ai le tama'i asini?" ³⁴ Ua latou tali atu, " Ua mana'o iai le Ali'i." ³⁵ Ua latou aumai le tama'i asini iā Iesu, ua fa'ae'e o latou 'ofu i luga, 'ona ti'eti'e ai lea o Iesu. ³⁶ Sa latou fofola fo'i ō latou ofu i le ala, a'o ti'eti'e atu o ia. ³⁷ Ua latou latalata i le ala e alu ifo mai le mauga o Olive, ona olioli ai lea o le motu o ona so'o, ma vivi'i atu i le Atua ma le leo tele ona o galuega mamana uma ua latou vaai i ai, ³⁸ ua fa'apea atu, " Ia manuia le Tupu ua afio mai le suafa o le Ali'i! O le filemu i le lagi ma le mamalu i mea aupitoaluga!" ³⁹ O nisi faresaio i le motu o tagata ua fai mai iā te ia, "Le A'oa'o e, ia e a'oai i ou so'o. " ⁴⁰ Ua tali atu Iesu, " Ou te fai atu iā te outou, afai e fifilemu i latou, o le a alalaga leotele mai ma'a." ⁴¹ Ua latalata atu Iesu i le a'ai o Ierusalema, ona tagi ai lea o ia, ⁴² ma fa'apea atu, maimau e, pe ana outou malamalama e o'o mai lava i le asō, i mea uma e maua ai e outou le filemu. A o lenei ua le mafai ona iloa atu e outou. ⁴³ E oo mai le aso e fausia ai e le fili pa puipui maualuluga, ina ia si'osi'omia ma fa'atigā mai ai iā te outou i itu uma. ⁴⁴ O le a latou fa'aumatia outou ma mea uma lava, faatasi ma lau fanua. E fa'aumatia mea uma lava, o le a leai fo'i se ma'a e totoe i luga o lē tasi ma'a aua ua leiloa le taimi na asiasi atu ai iā te outou. ⁴⁵ Ua ulufale Iesu i le malumalu ma ua tutuli i fafo i latou o lo'o fai fa'afetauaiga i totonu, ⁴⁶ ma fa'apea atu, "Ua tusia, o lo'u fale o le fale tatalo, ae ua faia e outou pei o le fale a le au faomea." ⁴⁷ Sa a'oa'o atu Iesu i aso uma i le malumalu. Sa saili fo'i e le au ositaulaga sili, ma le au tusi'upu, ma ta'ita'i se auala e fasioti ai iā te ia, ⁴⁸ ae lei maua e i latou se auala aua o lo'o fa'alogologo ma le totoa tagata uma iā te ia.