¹ O le taimi nei, ‘ua fa‘apotopotoina afe o tagata e to‘atele, ‘ua latou soli ai le tasi i le tasi; ‘ua muamua fo‘i ‘ona fetalai atu o ia i ona so‘o, ‘Ia ‘outou fa‘aeteete i le mea fa‘afefete a le ‘au faresaio, o le pepelo lea. ² Ee leai se mea lilo e lē fa‘aalia, e leai fo‘i se mea lilo e lē iloa. ³ O mea uma fo‘i tou te fai atu ai i le pouliuli e fa‘alogoina lea i le malamalama, o mea fo‘i tou te fai atu ai i taliga i totonu o potu e tala‘iina lea i luga o fale. ⁴ Ou te fai atu ‘iā te ‘outou, ‘aua tou te matata‘u i ē fasioti le tino, a mavae ia mea, e leai se isi mea latou te mafaia. ⁵ Ae ou te lapataʻi atu iā te outou po o ai e mataʻu ai. ‘Ia ‘outou matata‘u i lē ‘ua i ai le pule e lafo ai ‘outou i Kena, pe a uma ‘ona fasioti; Ioe, ou te fai atu ia te outou, ia outou matatau ia te ia. ⁶ E lē fa‘atauina ‘ea manu iti e lima i tupe iti e lua? A e leai se tasi o ia mea ua galo i le silafaga a le Atua. ⁷ Ae e oo lava i lauulu o outou ulu ua faitaulia uma lava. Aua le fefe. E sili ‘outou i manu iti e tele. ⁸ ‘Ou te fai atu fo‘i ‘iā te ‘outou, o i latou uma o ē ta'uta'u a‘u i luma o tagata, e ta‘uta‘u atu fo‘i e le Atali‘i o le Tagata i luma o agelu a le Atua, ⁹ a o lē e fa‘afiti a‘u i luma o tagata, e fa‘afiti fo‘i o ia i luma o agelu a le Atua. O ¹⁰ i latou uma o ē tautala i se ‘upu i le Atali‘i o le Tagata, e fa‘amāgaloina o ia, a o lē ‘ua ‘upuvale i le Agaga Pa‘ia, e lē fa‘amagaloina lava. ¹¹ Pe a latou taʻitaʻiina outou i luma o sunako, ma faipule, ma pulega, ‘aua ‘e te popole pe fa‘apefea ‘ona ‘outou tautala atu i la ‘outou tali atu, po o le ā fo‘i le tala e tau atu; ¹² auā e a‘oa‘o mai le Agaga Pa‘ia ‘iā te ‘outou i lea lava itu aso i mea tou te fai atu ai.” ¹³ Ona fai mai lea o se tasi o le motu o tagata ia te ia, “Le A‘oa‘o e, fai atu i lo‘u uso e vaelua le tofi ma a‘u.” ¹⁴ ‘Ua fetalai atu Iesu ‘iā te ia, “Sole, o ai ‘ea na tofia a‘u e fai ma fa‘amasino po o se puluvaga ‘iā te ‘outou?” ¹⁵ ‘Ua fetalai atu o ia ‘iā te i latou, “Ia outou mataala ina ia taofi outou mai tuʻinanauga ma matapeʻapeʻa uma, auā e lē ola le tagata i le tele o ana mea.” ¹⁶ ‘Ona fetalai atu lea o Iesu ‘iā te i latou le fa‘ata‘oto, ‘ua fa‘apea atu, “o le fanua a le tagata mau‘oa ua fua tele; ¹⁷ ‘ona manatunatu ai lea o ia ‘iā te ia lava, ‘ua fa‘apea atu, 'O le a se mea ou te faia, aua e leai se mea e teu ai fua o le fa'atoaga?' ¹⁸ Ua fai atu o ia, ‘O le mea lenei ou te faia. Ou te talepe i lalo oʻu fale saito ma fausia ni fale tetele, ma o i inā ou te teuina ai aʻu saito uma ma isi oloa. ¹⁹ ‘Ou te fai atu fo‘i i lo‘u agaga, “Lo‘u agaga e, ‘ua ‘iā te oe mea e tele ‘ua fa‘aputuina mo tausaga e tele; ²⁰ A ‘ua fetalai atu le Atua ‘iā te ia, “Le tagata valea e, e ‘aveina atu lou agaga mai ‘iā te oe i le po nei; ma o mea ua e saunia, e fai mo ai?' ²¹ E fa‘apea fo‘i le tagata ‘ua fa‘aputuina o ‘oa mo ia lava, ae le mauoa foi o ia i luma o le Atua”. ²² ‘Ua fetalai atu Iesu i ona so‘o, “o le mea lea ‘ou te fai atu ai ‘iā te ‘outou, ‘aua tou te popole i lo ‘outou ola; mea tou te aai ai; po o lou tino, i mea tou te ofu ai. ²³ Auā e sili le ola i lo le mea‘ai, e sili fo‘i le tino nai lo o lavalava. ²⁴ Mafaufau i oreva, latou te le luluina pe selesele. E leai so latou faleteuoloa po o se fale saito, ae e fafagaina i latou e le Atua. E le sili ‘ea ‘outou i manu felelei! ²⁵ O ai ea o outou na te mafaia i lona popole ona faaopoopo se kupita i lona olaga? ²⁶ ‘Āfai fo‘i tou te lē mafaia ‘ona fai o se mea itiiti fa‘apenei, aiseā la tou te popole ai i isi? ²⁷ Mafaufau i lili—pe faapefea ona tutupu. Latou te lē galulue, latou te lē milo fo‘i. A ‘ou te fai atu ‘iā te ‘outou, e o‘o lava ia Solomona i lona mamalu uma, e le‘i ‘ofu o ia e pei o se tasi o ia mea. ²⁸ ‘Āfai e fa‘apea ‘ona fa‘a‘ofuina e le Atua le vao i le fanua, o ola mai i le asō, a e lafoina a taeao i le ogaumu;e lē sili ‘ea ‘ona fa‘a‘ofuina ‘outou e ia, o ē fa‘atuatua itiiti! ²⁹ Aua tou te saili i mea tou te aai ai ma mea tou te inu ai, aua foi tou te popole. ³⁰ Auā o nu‘u uma o le lalolagi o lo‘o sā‘ili i ia mea, ‘ua silafia fo‘i e lo ‘outou Tamā tou te mana‘omia ai. ³¹ A ia outou saili lona malo, ona faaopoopoina atu lea o ia mea ia te outou. ³² Aua tou te matataʻu, le lafu mamoe itiiti e, auā ua fiafia lo outou Tamā e foaʻi atu le malo iā te outou. ³³ Faatau atu a outou mea ma avatu ni meaalofa. Ia faia ni ato tupe mo outou e le pala, o le oa i le lagi e le uma, e le latalata atu i ai se gaoi, e leai foi se mogamoga e faaumatia. ³⁴ Auā o le mea e i ai lo ‘outou ‘oa, e i ai fo‘i ma o ‘outou loto. ³⁵ “Ia fusia o outou sulugātiti ma tutu a outou molī, ³⁶ ma ‘ia pei fo‘i o tagata o lo‘o fa‘atalitali i lo latou matai pe a fo‘i mai o ia mai le tausamaaga; ‘ina ‘ia sau o ia ma tu‘itu‘i atu, ‘ona tatala loa lea o le faitoto‘a ‘iā te ia. ³⁷ Amu‘ia na ‘au‘auna e maua e le ali‘i o lo‘o mataala pe a sau. E moni, ‘ou te fai atu ‘iā te ‘outou, e fusia e ia o ia lava e ‘au‘auna ma fai atu ‘ia latou nonofo i lalo i le la‘o‘ai; e sau foi o ia e auauna ia te i latou. ³⁸ Afai e sau le matai i le leoleoga lona lua o le po, po'o le leoleoga lona tolu, ma iloa ua nofo sauni latou, amuia ia auauna. ³⁹ Ae ia outou iloa lenei mea, ana iloa e le matai o le aiga le itula e sau ai le gaoi, semanū na te lē tuʻuina atu lona fale ia talepeina. ⁴⁰ E tatau foʻi ona outou nofosauni, auā e sau le Atalii o le tagata i le itula tou te lē faatalitalia.” ⁴¹ ‘Ua fai atu Peteru, “Le Ali‘i e, ‘ua e fai mai ‘ea lenei tala fa‘atusa ‘iā te i matou, po o tagata uma fo‘i? ⁴² ‘Ua fetalai atu le Ali‘i, “o ai fo‘i le pule fa‘amaoni ma le poto, e tofia e lona ali‘i e pule i isi ana ‘au‘auna, e avatu a latou mea e ‘ai i le taimi tatau? ⁴³ ‘Amu‘ia lenā ‘au‘auna pe a sau lona ali‘i e maua mai o lo‘o faia faapea. ⁴⁴ E moni, ou te fai atu iā te outou, e tofia o ia e pule i ana mea uma. ⁴⁵ Ae afai e faapea ifo lea auauna i lona loto, ‘Ua tuai mai lo‘u ali‘i, ‘ona ia sasa ai lea i ‘au‘auna tane ma ‘au‘auna fafine ma ‘ai ma inu, ma ‘onā; ⁴⁶ e sau fo‘i le ali‘i o lea ‘au‘auna i le aso e lē fa‘amoemoe o ia, ma le itūlā na te lē iloa, ma na te tu‘imomomoina o ia, ma tofia se nofoaga mo ia fa‘atasi ma ē lē fa‘amaoni. ⁴⁷ O lea ‘au‘auna, ‘ua na iloa le finagalo o lona ali‘i, ‘ae le‘i sauni e faia e tusa ma lona finagalo, e sasaina i sasa e tele. ⁴⁸ A o lē na te lē iloa ma faia le mea e tatau ai ona sasa, e sasaina o ia i nai ta itiiti. ‘Ae peita‘i o i latou uma o ē ‘ua foa‘iina atu mea e tele, e su‘eina mai fo‘i ‘iā te i latou mea e tele; a o lē ‘ua tu‘uina atu i ai mea e tele, e fa‘asilisili atu fo‘i o ia. ⁴⁹ “Na ou sau e lafo le afi i le lalolagi, ma ou te moomoo pe ana uma ona faamumūina. ⁵⁰ Ae ua iā te aʻu le papatisoga e papatisoina ai aʻu, ma ua ou mafatia lava seia uma! ⁵¹ Tou te manatu ea na ou sau e aumai le filemu i le lalolagi? E leai, ou te fai atu iā te outou, a o le fevaevaeaʻi. ⁵² Auā e amata atu i le taimi nei, e fevaevaea‘i le to‘alima i le fale e tasi, o tagata e to‘atolu ma le to‘alua, o tagata e to‘alua ma le to‘atolu. ⁵³ E fevaevaea‘i fo‘i i latou, o le tamā ma le atali‘i ma le atali‘i ma le tamā, o le tinā ma le afafine, o le afafine fo‘i ma le tinā, o le tinā o le avā ma le avā a lana tama, o le avā fo‘i ma le tinā o lana tane.” ⁵⁴ ‘Ua fetalai atu fo‘i Iesu i le motu o tagata, “Pe a ‘outou iloa atu le ao ‘ua alu a‘e i sisifo, ‘ona ‘outou fai ane loa lea, 'Ua oo mai le timu,' ona tupu ai lea. ⁵⁵ A agi mai le matagi mai saute, tou te fai ane, ‘O le a oo mai le vevela,’ ona taunuu ai lea. ⁵⁶ O outou tagata faafiaamiotonu, ua outou iloa le uiga o foliga o le lalolagi ma le lagi;ae fa‘apefea ‘ona ‘outou lē iloa ‘ona fa‘amatalaina o le taimi nei? ⁵⁷ Se a le mea tou te lē fa‘amasinoina ai le mea e tatau ‘iā te ‘outou? ⁵⁸ Auā pe a ‘outou ō atu ma lē ‘ua ita ‘iā te ‘outou i luma o le fa‘amasino, i luga o le ala, taumafai e faalelei ma ia, ina ia le tosoina oe i le faamasino, ma ia lē tuuina atu oe e le faamasino i le leoleo; e lē tu‘uina fo‘i oe e le leoleo i le falepuipui. ⁵⁹ ‘Ou te fai atu fo‘i ‘iā te ‘outou, tou te lē ō ‘ese lava i lea mea, se‘ia uma ‘ona ‘outou totogi le tupe mulimuli.”