¹ O le tasi aso na tatalo ai Iesu i se tasi o nofoaga. Ina ua mae'a lona taimi, ona faapea ane lea o se tasi o ona soo ia te ia, "Le Alii e, ia e a'oa'o mai i matou i le tatalo, e pei ona a'oa'o e Ioane o ona soo". ² Ona faapea atu lea o Iesu, "A outou tatalo, ia outou faapea ane, "Le Tama e, Ia Paia lou Suafa. Ia oo mai lou malo. ³ Ia e foa'i mai ia te i matou i lea aso ma lea aso a matou mea e 'ai e tatau ma le aso. ⁴ Ia e faamagalo ia te i matou i a matou agasala, Aua fo'i matou te faamagaloina atu ia i latou uma o e agaleaga mai ia te i matou i le faaosoosoga. Aua fo'i e te taitaiina i matou i le faaosoosoga". ⁵ Ona faapea atu lea o Iesu ia te i latou, "O ai o outou e i ai o sana uo, e te alu i ai i le vaeluaga o le po, ma e faapea atu ia te ia, La'u uo e, aumai ni a'u falaoa se tolu ma a'u, ae se i uma totogi atu ⁶ ina ua toe fo'i mai la'u uo mai lana malaga, ae ua leai se mea oute avatu mo ia. ⁷ E mafai ona faapea mai le o lo i totonu o lona fale. Aua e te faalavelave mai ia te a'u. Ua loka le faitoto'a, ma o lea ua matou momoe ma la'u fanau. Ua le mafai ona ou tu atu i luga e avatu falaoa mo oe. ⁸ Oute fai atu ia te oe, e tusa lava pe ua le mafai ona tu mai i luga e aumai le falaoa ia te oe, e ui o lau uo, ae ona o lou faatauanau, e tu ai i luga ma tuua tu ia te oe falaoa e te manaomia. ⁹ Oute fai atu fo'i ia te oe, ole mai, ona tuuina atu lea ia te oe, saili mai ona e maua lea, tu'itu'i mai ona tatalaina atu lea ia te oe. ¹⁰ O i latou uma latou te ole atu latou te maua, o le saili na te maua, ma le tu'itu'i atu e tatalaina mai ¹¹ E i ai se tama o outou, a ole atu lou atalii i se i'a. ae e ave i ai se gata ae le o se i'a? ¹² A ole atu i se fuamoa, ae e ave i ai se akarava ia te ia? ¹³ Afai e iloa e tagata leaga e pei o outou ona ave atu o meaalofa lelei ia outou fanau, e le sili ea lo outou Tama o i le lagi, ona Ia ave atu le Agaga Paia ia i latou o e ole atu ia te Ia? ¹⁴ Ua tuli i fafo e Iesu le temoni o le gugu. Ina ua alu i fafo le temoni, ona toe tautala mai ai lea o le tamaloa na gugu, ona ofo ai lea o le motu o tagata e toatele. ¹⁵ A ua fai mai nisi o tagata, "O Pelesepulo, le alii o temoni, na ia tulia i fafo o temoni. ¹⁶ Ua tofotofo nisi ia te Ia, ma latou saili mai ia te Ia se faailoga mai le lagi. ¹⁷ A ua silafia e Iesu o latou manatu ma ia fai atu ia te i latou, "O malo uma e fevaevaea'i lava i latou, e faaumatia, o aiga fo'i e fevaevaea'i lava i latou, e ta'ape'ape. ¹⁸ Afai fo'i e fevaevaea'i Satani ia te ia lava, e faafefea ona tumau o lona malo? A ua outou fai mai oute tuliina i fafo temoni i le igoa o Pelesepulo. ¹⁹ Afai oute tuli i fafo temoni i le igoa o Pelesepulo, o le pule a ai lea toute tutuli ai i fafo o temoni?. Ona o lea, e faamasinoina ai outou e i latou. ²⁰ Ae afai oute tulia i fafo temoni i le na'o le limatusi o le Atua, ona oo mai lea o le malo o le Atua ia te outou. ²¹ A leoleoina e se tagata malosi ua faaupegaina atoatoa lona fale tele, e faapea ona malu puipuia ana oa. ²² Ae a osofaia o ia e se isi tagata e malosi atu ia te ia, ona toeseina lea e le na tagata malosi o lona ofutau na ia faalagolago i ai, ma ia ave ana oa. ²³ O so o se tasi e le au ma a'u, e tetee mai o ia ia te a'u, faapea ma le e le faaputu oa faatasi ma a'u e faataapeapeina. ²⁴ A tulieseina se agaga leaga mai se tagata, ona alu mamao lea o ia i uta e saili se mea e malolo ai. A le maua e ia se mea, ona ia faapea ane lea, "O le a ou toe fo'i i lo'u fale na ou sau mai ai". ²⁵ Na toe fo'i mai o ia, ma ia maua le fale ua leva ona faamama ma teu lelei. ²⁶ Ona alu lea o ia ua aumai isi agaga leaga e fitu e leaga atu ia ia, ma latou o mai e nonofo i totonu o le fale. Ona sili atu lea o le leaga o lea tagata nai lo le mea na i ai muamua". ²⁷ A o fai atu o Ia i ia mea, ae valaau mai se tasi o fafine mai le motu o tagata, ma faapea atu ia te Ia. "Amuia le manava na fanaua oe, ma susu na e susu ai." ²⁸ Ae tali mai o Ia faapea, "E sili atu le faalogo i le Upu a le Atua ma ia taofi mau. ²⁹ Ina ua faatupulaia le o mai o tagata, ona faapea lea o Iesu. "O se tupulaga leaga lenei tupulaga. E saili mai e i latou se faailoga, ae leai se faailoga oute avatu ia i latou ae na o le faailoga ia Noa. ³⁰ E pei ona avea Iona o se faailoga ia Nineva, e faapena fo'i le Atalii o le Tagata o le a fai ma faailoga i le tupulaga lenei. ³¹ O le Tupu tamaitai i Saute o le a tula'i mai i le faamasinoga ma tamaloloa o le auga tupulaga lenei ma faamalaia ia i latou, aua na sau o ia mai tuluiga o le lalolagi e faalogo i le poto o Solomona. Ae vaai outou, e i ai le sili atu ia Solomona o lea ua i nei. ³² E tula'i tagata o Nineva i le Faamasinoga faatasi ma le tupulaga lenei, ma o latou faitioina, ona sa latou salamo i le lauga a Iona, ae sili atu le ua ia te i latou nai lo Iona. ³³ E leai se tasi, e mae'a ona ia tutu o le moli, ona tuu lea i se mea lilo, po o lalo o se ato. Ae tuu e ia i luga o le tuugamoli, ina ia mafai ona iloa le moli, e i latou o ulufale mai. ³⁴ O ou mata o moli o le tino. A lelei ou mata, e faamalamalamaina lou tino, ae a leaga ou mata, e faapogisaina lou tino. ³⁵ Ia manatua, ia aua ne i faapogisaina le malamalama ua i totonu ia te oe. ³⁶ Afai e faamalamalamaina lou tino atoa, ma leai se vaega e i ai o le pogisa, ona pei lea o lou tino o se moli ua susulu atu lona malamalama i luga ia te oe. ³⁷ Na mae'a le fetalaiga a Iesu, ona fai ane lea o le tasi o faresaio ia te Ia, la te aai ma ia i lona fale, ona ulufale lea o Iesu i lona fale ma taoto. ³⁸ Ona faate'ia lea o le Faresaio ona e le i mua'i mulumulu Iesu ia te Ia ae le i faia le meaai o le afiafi. ³⁹ A ua faapea atu Iesu ia te ia. "O lenei, o faresaio latou te faamama fafo o iputi ma ipu 'ai faaofuofu, ae tumu totonu o o latou loto i le gaoi ma le amio leaga. ⁴⁰ O outou o tagata e faapogisaina! E le i faia ea totonu atoa ma fafo e le na faia? ⁴¹ Ia e foai atu mea o i totonu ia te oe faameaalofa, ona faamamaina lea o mea uma mo oe. ⁴² Ae talofa e, ia te outou faresaio, aua ua outou avatu le sefulua'i o mili, ma le pekano, ma laau aina uma o le faatoaga, ae ua outou faatuatuana'i le faamasinoga tonu ma le alofa o le Atua. E ao ina tatou faia le amiotonu ma alolofa atu i le Atua, e aunoa ma le le mafaia ona faatino isi vaega taua. ⁴³ Talofa e ia te outou faresaio, aua ua outou naunau i nofoa pito i luma i totonu o le sunako, ma le faaaloalo maualuga ua tuuina mai e tagata lautele. ⁴⁴ Talofa e ia te outou, aua ua tutusa outou ma tuugamau e le faailogaina, o lo o soli e tagata savavali e aunoa ma so latou iloa. ⁴⁵ Ua faapea atu ia te Ia, se tasi o tagata poto i le tulafono! "Lau susuga i le aoao tulafono, ua matou tiga lava i lau faamatalaga. ⁴⁶ Ua faapea atu Iesu. Ua e tuu avega mamafa i luga o tagata e faigata ona latou amoina, ae le pa'i ni o outou tamatama'ilima i se avega mamafa e tasi. ⁴⁷ Talofa e ia te outou, aua ua outou fau tuugamau mo perofeta, ae o ou tuaa na fasiotia i latou. ⁴⁸ Ua outou molimau ma outou au faatasi i le galuega na faia e o otou tuaa, aua na latou fasiotia i latou, ma e fausia o latou tuugamau.. ⁴⁹ O le mafuaaga lea, na fetalai mai ai le poto o le Atua, "O le a ou auina atu perofeta ma aposetolo ia te i latou, o le a latou sauaina ma fasiotia nisi o i latou. ⁵⁰ O lenei, o le a faamasinoina lenei tupulaga, i toto masaa uma o perofeta talu mai le amataga o le lalolagi ⁵¹ E mai lava i le toto o Apelu se'ia oo atu i le toto o Sakaria, na fasiotia i le va o le fata faitaulaga ma le malumalu. Ioe, oute faapea atu ia te outou, o le a faamasinoina le auga tupulaga lenei. ⁵² Talofa e ia te outou o e popoto i le tulafono, aua ua outou aveesea le ki o le iloa ma le malamalama, ua outou le ulu atu i ai, ma outou faalavelave fo'i ia i latou o ulufale mai" ⁵³ Ina ua alu ese mai Iesu i lea mea, ona tetee mai lea ma finau vale mai ia te Ia le au tusiupu ma le au faresaio i le tele o mea, ⁵⁴ Ua oo ina latou faatupu tala pepelo ma fesili taulamalama ina ia latou maua se tala e fai e Iesu, e mafai ai ona latou tuua'ia o Ia.