¹ Mulimuli ane, ua tofia e le Alii le isi fitusefulu, ma auina atu i latou ta'ito'alua e muamua atu ia te Ia i aai uma, ma nofoaga o le a alu atu i ai o Ia. ² Ua Ia fai atu ia te'i latou, "Ua tele le saito, ae ua to'alaiti le 'au faigaluega. O lea ia outou ai'oi atu i le Alii o le seleselega, ina ia auina atu nisi faigaluega e selesele i lana saito." ³ Ina outou o atu ia. Ia outou iloa, oute auina atu outou e pei o ni mamoe i le va o luko fe'ai. ⁴ Aua ne'i ave e outou se 'ato, po o se 'ato malaga, po o se seevae, ma aua ne'i outou faafeiloa'i atu i nisi i le ala. ⁵ O ai lava le fale tou te ulufale atu i ai, ia muamua ona outou fai atu, 'Ia i ai le filemu i lenei fale!' ⁶ Afai e i ai le filemu i ia tagata, ona tumau lea o lo outou filemu i luga o i latou, ae a leai, tou te toe fo'i ma outou. ⁷ Ia outou nonofo ai i lena fale, ma outou aai ma feinu i mea latou te laulau ane, aua e tatau le totogi i e galulue. Aua tou te feoa'i mai lea fale i lea fale. ⁸ O ai lava le aai toute o i ai, ma o latou talia outou, ia outou aai i meaai ua latou laulau ane mo outou, ⁹ ma outou faamalolo i o latou ma'i. Ia fai atu ia te'i latou, 'Ua latalata mai le Malo o le Atua ia te outou'. ¹⁰ O ai lava le aai toute o i ai ae latou te le taliaina outou, ia outou o atu i o latou magaala ma fai atu, ¹¹ 'E oo lava i le pefu mai lo outou aai e pipii mai i o matou vae, matou te soloi esea atu ia te outou! A ia outou iloa: Ua latalata mai le Malo o le Atua'. ¹² Oute fai atu ia te outou, e oo mai lena aso, e feololo atu Sotoma nai lo lena aai. ¹³ Oi talofa ia te oe Koasini! Oi talofa ia te oe Petesaita! Ana faia vavega tetele ua faia ia te outou i Turo ma Saitonu, semanu ua leva ona latou salamo, ma o latou nonofo i le ie talatala ma le efuefu. ¹⁴ Ae feolo atu Turo ma Saitonu nai lo le faamasinoga e oo mai ia te outou. ¹⁵ O oe Kapanaumi, ua outou manatu ea o le a faaeaina outou e oo i le lagi? E leai, e lafotoina oe i lalo i Seoli. ¹⁶ O le faalogo ia te outou ua faalogo mai o ia ia te a'u, a o le ua ia tetee ia te outou ua ia tetee mai ia te a'u, ma le na auina mai a'u" ¹⁷ Ua toe fo'i mai le to'a fitusefulu ma le olioli, ma latou fai mai, "Le Alii e, e oo lava i temoni na usita'i mai ia te'i matou i lou igoa. ¹⁸ a ua fai atu Iesu ia te'i latou, "Na ou vaaia Satani ua pa'u ifo mai le lagi e pei o le uila. ¹⁹ Ia outou iloa, ua avatu ia te outou le pule toute soli a'i gata ma akarava, faapea le malosi uma o le fili, ma e leai se mea e tasi e ono leaga ai outou. ²⁰ Ae peita'i, aua ne'i tou fiafia tau o lenei mea, ina ua usita'i agaga ia te outou, a ia sili atu lo outou olioli, ina ua outou iloa ua tusia o outou igoa i le lagi. ²¹ O lea lava itula ua vivii fiafia ai o Ia i le Agaga Paia ma faapea atu, "Oute viia oe, Tama, le Alii o le lagi ma le lalolagi, ona ua e taofia nei mea mai e popoto ma atamamai, a ua e faaali atu ia mea ia i latou faatauvaa, e pei i latou o ni tama valevale. O lenei lo'u Tama e, o le fo'i lava lea e fiafia i ai lou finagalo. ²² "Ua tuuina mai mea uma e lo'u Tama ia te a'u, e leai se tasi na te iloa le Atalii ua na o le Tama, e leai fo'i se tasi na te iloa le Tama ua na o le Atalii, ma i latou ua filifilia e Ia e faaali atu i ai o Ia." ²³ Ua ia faliu ma ia fai atu i ona soo ina ua na'o i latou, "E manuia i latou e vaai i mea ua outou vaai i ai. ²⁴ Oute fai atu ia te outou, e toatele perofeta ma tupu na naunau ina ia o latou vaai i mea ua outou vaai i ai, ae latou te le'i vaai i ai, ma latou faalogo i mea ua outou faalogo i ai, ae latou te le'i faalogo ai". ²⁵ Ua tula'i se tasi o a'oa'o o le tulafono e nate tofotofo ia te Ia, ma faapea atu, "Le A'oa'o e, o le a le mea oute faia oute maua ai le ola e faavavau?." ²⁶ Ua fai atu Iesu ia te ia, "O le a le mea ua tusia i le tulafono? E mafai ona e faitauina mai?" ²⁷ Ua tali mai o ia ma faapea mai, "Ia e alofa atu i le Alii lou Atua ma lou agaga atoa, ma lou loto atoa, ma lou malosi atoa, ma lou manatu atoa, ia faapena fo'i ona e alofa atu i le lua te tua'oi". ²⁸ Ua fai atu Iesu ia te ia, "Ua sa'o lelei lau tali. Ia e faia lenei mea, ona e ola lea". ²⁹ A ua fia amiotonu o ia, ua ia fai atu ia Iesu, "O ai lo'u tua'oi?" ³⁰ Ua tali atu Iesu ia te ia, "E i ai se tagata na alu malaga mai Ierusalema i Ieriko. Na osofa'ia o ia e tagata gaoi, ua latou ave ana meatotino, ua fasi ia te ia, ma faataatia ai o ia a tali oti. ³¹ O se avanoa lelei na ui ane ai i le auala lea se ositaulaga, ae ina ua vaai atu o ia i le tagata o taatia mai, ona ui mamao lea o ia i le isi itu auala. ³² E faapena i le sa Levi, na ui mai o ia i le auala lea ma tau mai i le tagata, ona taamilo lea o ia i le isi itu auala ma alu loa. ³³ Ae o le tagata Samaria na malaga mai o ia, ma tau mai i le tagata o lo o taatia i le ala. Ina ua ia vaai atu i le tagata, ona tupu ai lea o lona alofa. ³⁴ Ua ia fesoasoani atu ia te ia ma fusifusi i ona manu'a, ua ia sasaa i ai o le suauu ma le uaina. Ua ia tuu ia te ia i luga o lana manu, ma ave ia te ia i le faletalimalo o lata ane, ma tausi ai ia te ia. ³⁵ O le aso na sosoo, ua ia avatu tenari e lua i le pule o le faletalimalo ma ia fai atu ia te ia. 'Ia e tausi lelei ia te ia, o le a lava se isi aitalafu ona o ia, oute toe fo'i mai, ona ou toe totogi atu lea. ³⁶ O ai o le to'atolu lea e te manatu o le tua'oi o le na faoa ana mea e le 'au gaoi?" ³⁷ Ua tali mai o ia, "O le na faaali lona alofa mutimutivale ia te ia." Ona fai atu lea o Iesu ia te ia, "Ina e alu ia ma faapea ona e fai". ³⁸ A o alu malaga i latou, ona latou tau mai lea i se tasi o nuu, ona faafeiloa'i ma faaulufale lea o i latou e le fafine e igoa ia Mareta i lona fale. ³⁹ E i ai lona uso e igoa ia Maria, na saofa'i o ia i vae o Iesu ma faalogo i ana aoaoga. ⁴⁰ A ua ova le pisi o Mareta e tapena mai le meaai. Ua sau o ia ia Iesu ma faapea atu, "Le Alii e, e talafeagai ea ia te oe le le fesoasoani mai o lo'u uso i mea o lo o o'u tapena atu to'atasi?. O lenei, ia e fai atu ia te ia e fesoasoani mai ia te a'u" ⁴¹ A ua tali atu le Alii ma faapea atu ia te ia, "Mareta, Mareta e, ua e soona popole vale i mea e tele. ⁴² Ae tasi le mea e sili ona taua. Ua filifili e Maria lena mea e silisili, ma e le mafai ona aveesea mai ia te ia"