¹ O le tasi aso na omai ai nisi tagata ia Iesu ma latou fai atu ia te Ia, o nisi o tagata Kalilaia sa tuufa'atasi (fefiloi) e Pilato o latou toto ma toto o a latou taulaga. ² Sa tali atu Iesu ua fa'apea atu ia i latou, "O lona uiga o lo outou manatu ua sili atu le agasala o tagata Kalilaia nei nā i lō isi tagata Kalilaia ona ua latou tigāina i nei mea? ³ Ua ou fai atu ia te outou, e leai. O le a mālāia outou i lenei lava mea pe āfai tou te le salamo. ⁴ "E fa'apea foi i latou na paū iai le olo i Seloa ma fasiotia ai i latou, o lo outou manatu e sili atu la latou agasala nā i lō isi tagata o i Ierusalema? ⁵ Ua ou fai atu, e leai. E mālāia outou uma lava pe afai tou te lē salamo." ⁶ Ua fai atu foi Iesu i se tala fa'a-fa'atusa ia te i latou, "Sa iai se tasi tagata ua iai le laau o le mati i totonu o lona togāvine, sa alu ane e su'e ni fua ae ua le maua lava se fua se tasi. ⁷ Na ia fai atu foi i lē gālue vine, "Vaai atu foi iai, ua atoa le tolu tausaga talu ona ou sau ma tilotilo po'o iai nī fua o le mati, ae ua leai lava. E sili loa ona tipi i lalo. Aisea e maimau ai le palapala?" ⁸ Sa tali atu lē galue vine, "Alii e, ae a pe a tuu pea ia mo lenei tausaga ae o le ā ou tago e eli fa'ata'amilo autafa ma lafo iai le otaota. ⁹ E lelei pe a o'o atu i le tausaga fou ua fua mai, ae a leai, ua tipi loa i lalo!" ¹⁰ O lo'o a'oa'o Iesu i totonu o le falesā i le isi Aso Sa. ¹¹ Sa iai se tasi fafine sa maua o ia i le agaga o le vāivāi mo le sefuluvalu tausaga. E nā o le fa'ano'uno'u e lē mafai ona tu sā'o i luga. ¹² Sa iloa atu o ia e Iesu, ona valaau atu lea ia te ia, "Tina, ua e sa'oloto mai i le agaga o le vāivāi." ¹³ Na tu'u ona lima i luga o le fafine, ona mafai ai lea ona tū sā'o o ia ma vivi'i atu i le Atua. ¹⁴ Ua lē fiafia le pule o le falesā ia Iesu ona ua faamalolo e ia le ma'i i le Aso Sa. Ua fai atu o ia i tagata, "E ono aso o le vaiaso e tatau ona fai ai galuega fa'amālōlō, ae le tātāu ona faia i le Aso Sa." ¹⁵ Na tali atu Iesu ia te ia, "Outou tagata pepelō e, e lē mafai ea e se tasi o outou ona tatala lana oti po'o lana asini i le Aso Sa ma ave e faainu? ¹⁶ E faapenā foi i le afafinē lenei o Aperaamo, na fa'atigaina e Satani i tausaga e sefulu ma le valu, e le tatau ea ona faasa'olotoina i le Aso Sa?" ¹⁷ O lo'o fai atu o Ia i ia mea uma, ae ua māmā i latou sa tete'e ia te ia, ua fiafia foi ma vivi'i i latou uma na iai ona o mea lelei na faia e Iesu. ¹⁸ Sa fai atu foi Iesu ia te i latou, "Pe fa'apefea le mālo o le Atua, ae o le a foi se mea e fa'atusaina i ai? ¹⁹ Ua fa'apei o se fatu o le sinapi ua togi i totonu o le togalaau, ona tupu mai ai lea o se laau tēlē lava, ona o mai lea o manulele mai le lagi ma fai ai o latou moega i ona lālā." ²⁰ Ua toe fai atu fo'i o Ia, "O le a se mea e fa'atusaina iai le mālō o le Atua? ²¹ Ua pei o se fefete ua tuuina e le fafine i totonu o ipu falaoamata e tolu ma ua fa'afefeteina." ²² Ua malaga atu foi Iesu e ui atu i taulaga ma nuu uma, ua a'oa'o atu ma alu atu ai i Ierusalema. ²³ Na fai atu foi le tasi tagata ia te Ia, "Le Alii e, pe to'a laiti ea i latou e fa'asaoina?" Ua ia fai atu foi ia te i latou, ²⁴ "E matuā faigata ona ui atu i le faitoto'a vaiti, aua e to'atele e taumafai e ui atu ai, ae lē mafai." ²⁵ E iloa mai foi e lē ona le fale, ona tu mai lea o ia ma tapuni le faitotoa, ona ē tūtū mai lea i fafo ma tu'itu'i ma ē fai mai, "Le Alii e, le Alii e, tatala mai ia le faitoto'a mo matou," Ua tali mai o Ia ua fai mai, "Ou te le iloa outou po'o fea foi tou te omai ai." ²⁶ E te fai atu foi, "Sa matou aai ma feinu i ou luma ma a'oa'o i auala." ²⁷ Na tali mai ai lea o Iesu ia te i latou, Ou te le iloa po'o fea foi tou te omai ai. O ese atu ia outou, tagata agasala." ²⁸ O le a iai foi le tagi ma le lilivau o nifo pē a outou vāāī ia Aperaamo, Isaako, Iakopo ma perofeta uma i le mālo o le Atua, ae tutuli outou i fafo. ²⁹ E omai foi i latou mai i sasa'e, sisifo, matu ma saute ona nonofo lea i le laulau i totonu o le malo o le Atua. ³⁰ Ia outou iloa foi, o i latou uma sa outou manatu maualalo iai, o le a muamua i latou, ae o i latou sa tāua i la outou vaai, o le ā fai ma ē mulimuli." ³¹ Na omai foi le au faresaio ma fai atu ia te Ia, "Alu ia oe āuā o loo fia fasioti Herota ia te Oe." ³² Ua fai atu Iesu ia te i latou, "O atu ma fai atu i lenā alope, Vaai, ua ou tutuli temoni ma fa'amalōlō ma'i i le aso lenei ma taeao foi fa'apea ma le aso tolu ina ia fa'auma la'u galuega. ³³ E tatau lava ona fa'aauau nei ma ā taeao ma leisi aso e soso'o ai, āuā e le mafai ona fa'aleagaina se perofeta i tua atu o Ierusalema. ³⁴ Ierusalema e, Ierusalema e, na fasiotia perofeta ma togi i ma'a i latou uma na o atu iai. Ua tele lava lo'u mana'o e fa'apotopoto i la'u fanau e pei o le matuamoa ona fa'apotopoto o lana fanau i lalo o ona apaau, ae tou te le mananao lava iai. ³⁵ Ia outou iloa, ua tu'ua lo outou fale. Ou te fai atu foi, e le mafai ona outou iloa mai a'u pe ā outou le fai mai, "Ia manuia le sau (maliu) i le suafa o le Alii."