¹ Sa ioe Saulo i lona maliu. O lea na amata ai i lea aso le sauāga tele i le ekalesia sa i Ierusalema; ua faataapeape foi ē ua faatuatua i le itumalo o Iutaia ma Samaria, sei vaganā ai le au aposetolo. ² Na tanu foi Setefano e tagata faamaoni ma latou taufaitagiauē tele ia te ia. ³ A ua taumafai Saulo e faaumatia le ekalesia. Na ulu atu o ia i lea fale ma lea fale, e toso ese tane ma fafine, ma tuu i latou i le falepuipui. ⁴ A ua feoai tagata faatuatua na faataapeapeina, ma talai atu le upu. ⁵ Ua alu ifo Filipo i le aai o Samaria ma talai atu ia te i latou le Keriso. ⁶ Ua matuā uai atu foi le motu o tagata i upu na fai atu e Filipo; ma le manatu e tasi na latou faalogo ai ia te ia, ma sa latou vaai i faailoga na ia faia. ⁷ Na ō mai i fafo agaga leaga mai i le toatele o ē ua uluitinoina, ua faamaloloina foi e ua pipili. ⁸ Ua tele lava le olioli i lea aai. ⁹ A ua i ai le tasi tagata i le aai e igoa ia Simona, o lē na muai fai togafiti faataulaitu; sa masani ona ia ofo tagata Samaria a o fai mai o ia o se tagata taua. ¹⁰ Na faalogo ia te ia o tagata Samaria uma, o ē e aupito itiiti atoa ma ē e sili; sa latou fai mai, "O lenei tagata o le mana o le Atua lea ua taua o lē e Sili." ¹¹ Na latou faalogo ia te ia, auā ua leva ona ofo o ia ia te i latou i ana togafiti faataulaitu. ¹² Ae ina ua latou talitonu ia Filipo, ao ia folafola atu le tala lelei e uiga i le malo o le Atua ma le suafa o Iesu Keriso, ona papatisoina lea o i latou, o tane ma fafine. ¹³ E oo foi ia Simona latou na talitonu, ma ina ua uma ona papatisoina o ia, sa nofo pea o ia ma Filipo. Ina ua ia vaai atu o ia i faailoga ma vavega ua faia, ona ofo ai lea o ia. ¹⁴ Ua faalogo le au aposetolo i Ierusalema, ua talia e Samaria le afioga a le Atua, ona aauina atu lea e i latou o Peteru ma Ioane ia te i latou. ¹⁵ Ua ō ifo i latou, ona tatalo lea mo i latou, ina ia latou maua le Agaga Paia. ¹⁶ E oo mai i lena taimi, e lei afio ifo le Agaga Paia i luga o se tasi o i latou; sa na ona papatisoina i latou i le suafa o le Alii o Iesu. ¹⁷ Ona faaee lea e Peteru ma Ioane o laua lima i luga ia te i latou, ona maua ai lea e i latou o le Agaga Pa‘ia. ¹⁸ Ua iloa e Simona ua foaiina mai e le Agaga Paia i le faaee atu o lima o le au aposetolo, ona avatu ai lea e ia o tupe ia te i latou. ¹⁹ Ua ia faapea atu “Ia e foa‘i mai foi ia te a‘u lenei pule, ina ia maua e so o se tasi ou te faaee i o‘u lima le Agaga Paia.” ²⁰ A ua fai atu Peteru ia te ia, "Ia fano faatasi ma oe lau ario, auā ua e manatu e maua le meaalofa a le Atua i tupe. ²¹ E leai sau vaega po o sou tofi i lenei mea, auā e lē tonu lou loto i le Atua. ²² O lenei, ia e salamō ai i lau amio leaga, ma ia e tatalo/faatoga atu i le Alii, ina ia faamagaloina oe ona o le manatu o lou loto. ²³ Auā ua ou iloa ua e i ai i le au oona ma le taui e le amioleaga.” ²⁴ Ua tali atu Simona, ua fa‘apea atu, "Ia outou tatalo i le Alii mo a‘u, ina ia aua nei o'u oo i se mea na e te fai mai ai.” ²⁵ Ua uma ona molimau ma tautala atu i le afioga a le Alii, ona toe foi lea o Peteru ma Ioane i Ierusalema, ma folafola atu le tala lelei i nuu e tele o Samaria. ²⁶ Ona fetalai mai lea o le agelu a le Alii ia Filipo, ua faapea mai, "Inā tulai ia ma alu atu i le itū i saute i le ala e alu ifo mai Ierusalema i Kasa.” (O le ala lea i le toafa.) ²⁷ Ona tulai lea o ia ma alu. Faauta foi, sa i ai le tagata mai Aitiope, o le eunuka o le pule sili i lalo o le pulega a Kanata, le tupu fafine o Aitiope. Sa ia pulea uma ana oa. Sa sau o ia i Ierusalema e tapuai ai. ²⁸ Ua toe foʻi mai o ia, ua nofo i lana kariota, ma faitau i le perofeta o Isaia. ²⁹ Ona fetalai atu lea o le Agaga ia Filipo, "Inā alu ia, ma e faalatalata ane i lenei kariota.” ³⁰ Ona momoe atu lea o Filipo ia te ia, ua ia lagona atu o ia o loo ia faitau mai le perofeta o Isaia, ma ua faapea atu, "O e malamalama ea i le mea e te faitauina?” ³¹ Ona fai atu lea o ia, “E faapefea ona ou malamalama/iloa, pe afai e leai sē faasino mai ia te a‘u?” Na ia valaaulia Filipo e alu aʻe i luga o le kariota ma la nonofo faatasi ai. ³² O le vaega lenei o le Tusi na faitau e le Aitiope, “Ua taitaiina o ia e pei o se mamoe e fasia, e pei foi o se tamai mamoe i luma o lē e sele lona fulufulu e faalologo, e lei tautala foi o ia. ³³ O lona faalumaina na aveesea ai le faamasinogatonu mai ia te ia. O ai na te mafaia ona taʻu atu le tala atoa o lana fanau? Auā na aveeseina lona ola mai le lalolagi.” ³⁴ Ona fesili atu lea o le eunuka ia Filipo, ua faapea atu, '‘Ou te aioi atu ia te oe, sei e tau mai ia te a‘u, po o ai ea o loo tautala mai ai le perofeta, o ia lava, po o se isi tagata?” ³⁵ Na tautala atu lea o Filipo, ua afua mai i lenei mau na folafola atu ai e ia o le tala lelei ia Iesu. ³⁶ A o latou o atu i le ala, ua latou oo atu i le vai, ona fai atu lea o le eunuka, Faauta, o loo i ai le vai, o le a se mea e taofia ai a'u mai le papatisoina? ³⁷ Ua fai atu Filipo, Afai ua e talitonu ma lou loto atoa, e mafi lava. Ua tali mai o ia, ua faapea mai, Ou te talitonu o Iesu Keriso o le Alo o le Atua ia. ³⁸ Ona fai atu lea o le Aitiope ia taofi le kariota. ‘Ua ō ifo i latou i le vai, o Filipo ma le eunuka, ona papatisoina lea o ia e Filipo. ³⁹ Ua ō ae i laua nai le vai, ona aveeseina lea e le Agaga o le Alii ia Filipo, ua lē toe iloa atu foi o ia e le eunuka, a ua alu atu o ia i le ala ma le olioli. ⁴⁰ A ua faaali atu Filipo i Asetota, ona alu atu lea o ia i lea nuu, ma folafola atu le tala lelei i aai uma lava, seia oo i Kaisareia.