¹ Ona fa'apea mai lea o le ositaulaga sili, " E moni ea ia mea?" ² Ona fai mai lea o Setefano, " Le au uso e ma tamā, faalogo maia ia te a'u: Na faaali le Atua o lē e ona le mamalu i lo tatou tamā o Aperaamo ina o i ai o ia i Mesopotamia, a'o le'i nofo o ia i Karana, ³ ua na fetalai mai foi ia te ia, "Ia tuua e oe lou nuu ma lou aiga, ae alu atu i le nu'u ou te fa'asino atu ia te oe." ⁴ Ona tuua lea e ia o le nu'u o Kaletaia, ae nofo i Karana; ua oti lona tamā, ona ia aumaia lea o ia nai lea mea i le nuu nei, i le mea ua outou nonofo ai. ⁵ Ua na lē avatu foi se tofi ia te ia, e leai lava, e o'o lava i se mea e tu ai ona vae, a ua folafola mai e ia, e na te avatua ia te ia e fai mo ia fanua, atoa ma lana fanau pe a mavae atu o ia, a'o leai sana fanau. ⁶ v 6 Na faapea foi ona fetalai mai o le Atua, e aumau lana fanau i le nuu ese, latou te faapologaina ma faasaunoa ia te i latou i tausaga e fa selau. ⁷ Na faapea mai foi le Atua, "Ou te faasala i le nuu latou te nofo pologa ai, a mavae foi o ia mea, ona omai ai lea o i latou ma auauna mai ia te a'u i lenei nuu. ⁸ Na ia tuuina atu foi ia te ia le feagaiga o le peritome, ona fānaua lea e ia o Isaako ua ia peritomeina ai o ia i le aso valu, o le atalii foi o Isaako, o Iakopo, o atali'i foi o Iakopo e toa sefulu ma le toalua, o tupuga ia. ⁹ O le 'au tupuga foi, ua lotoleaga (matau'a) i latou ia Iosefa, ua latou faatau atu ia te ia i Aikupito, a ua ia te ia le Atua. ¹⁰ Ua na lavea'i ia te ia mai ona puapuaga uma, ma foa'i ia te ia ia alofagia ma ta'upotoina i luma o Farao le tupu o Aikupito, ua na tofia foi o ia e fai ma pule i Aikupito, atoa ma lona aiga uma. ¹¹ Ua o'o le oge ma le puapuaga tele i le nuu o Aikupito uma lava atoa ma Kanana, ua lē maua foi ni mea e ai e o latou tamā. ¹² A ua faalogo Iakopo o lo o ua i Aikupito saito, ona ia auina atu lea o o tatou tamā, o le taimi muamua foi lea na o atu ai i latou. ¹³ O lo latou foi faalua ua faailoa ai Iosefa i lona au uso, ua faailoa foi le aiga o Iosefa ia Farao. ¹⁴ Ona auina atu lea e Iosefa ona uso ina ia aami i lona tamā o Iakopo ina ia sau i Aikupito, faatasi ai ma ona auaiga uma, e toafitusefulu ma le lima le aofaiga atoa o i latou. ¹⁵ Ona alu ifo lea o Iakopo i Aikupito, ua oti ai o ia, atoa ma o tatou tamā. ¹⁶ Ua aveina foi i latou i Sukema, ma ua tuuina i le tuugamau na faatau e Aperaamo i le tau ario mai le fanau a Emoro le tamā o Sukema. ¹⁷ A ua latalata le tausaga na folafolaina, sa tauto ai le Atua ia Aperaamo, ona tutupu lea o le nuu, ma ua faatoateleina i Aikupito, ¹⁸ seia o'o ina tula'i mai o se tasi tupu i Aikupito, sa lē iloa e ia Iosefa. ¹⁹ Ua na togafitileagaina o tatou aiga, ma faasauā i o tatou tamā, ia tu'ulafoa'i a latou tama meamea, ina ne'i ola i latou. ²⁰ O ona po ia na fanau ai Mose, ua maeu le tino lelei i luma o le Atua, e tolu masina sa tausia ai o ia i le aiga o lona tamā. ²¹ Ua tu'ulafoaina foi o ia, ua ava'e e le afafine o Farao, ua na tausi foi ia te ia e fai mana tama. ²² Na a'oa'oina Mose i le poto uma lava o Aikupito, ua malosi i ana upu ma ana galuega. ²³ Ua o'o i le fa sefulu o ona tausaga, ona manatu ai lea o ia e asiasi atu i ona uso o le fanauga a Isaraelu. ²⁴ Ua iloa atu e ia o le tasi o le Isaraelu ua agaleagaina, ua na fesoasoani i ai ma taui atu lona agaleagaina, ua ia fasi i le Aikupito. ²⁵ Na manatu o ia e iloa e ona uso e faaola le Atua ia te i latou i lona lima, ae peita'i e le iloa e i latou. ²⁶ O le taeao foi ua tu atu ai o ia i le toalua o i latou ua tau, ua na taumafai e faafilemū ina ia lelei, ua faapea atu, Uso e, o le uso oulua, se a le mea ua feagaleaga'i ai oulua ia te oulua? ²⁷ A o lē na agaleaga atu i le tasi, ua na tete'e atu ia te ia, ua faapea mai, "O ai ea na fai oe ma alii ma faamasino ia te i matou? ²⁸ Pe e te fia fasioti ea ia te a'u, pei ona e faisoti i le Aikupito ananafi? ²⁹ Ona sola lea o Mose i lea upu, ua aumau ai i le nuu o Mitiana, ua fanau ai ona atalii e toalua. ³⁰ Ua mavae foi tausaga e fa sefulu, ona faaali lea ia te ia o le agelu a le Alii i le vao o le mauga o Sinai, i le afi mumū i le laau talatala. ³¹ Ina ua vaaia e Mose le afi, ona ofo ai lea o ia i lea vaaiga; ua faalatalata atu o ia e matamata iai, ona tulei mai lea o le siufofoga o le Alii ia te ia ua faapea mai, ³² "O a'u o le Atua o Aperaamo, ma Isaako ma Iakopo". Ona gatete lea o Mose, ua le mafai ona faamalosi e matamata i ai. ³³ Ona fetalai mai lea o le Alii ia te ia, " Tatala ese ia ou seevae, auā o le mea o loo e tu ai o le eleele paia. ³⁴ Ua ou matuā vaavaai i le agaleagaina o lo'u nuu o i Aikupito; ua ou faalogo foi i lo latou oi, ua ou alu ifo foi e laveai ia te i latou. O lenei, ina sau ia, ou te auina atu oe i Aikupito." ³⁵ O Mose lena sa teena e i latou, ina ua latou faapea atu, "O ai na tofia oe e fai ma alii ma fa'amasino? O ia lava na auina atu e le Atua e fai ma alii ma faaola, na auina atu e le Atua ai le lima o le agelu lea sa faaali ia te ia i le laau talatala. ³⁶ O Mose na taitaiina mai i latou mai Aikupito, ina ua uma ona ia faia o vavega ma faailoga i Aikupito, ma le sami ulaula, atoa ma le vao i tausaga e fa sefulu. ³⁷ O Mose lava lea na fai atu i le fanauga a Isaraelu, " E faatuina mai e le Atua se perofeta mo outou mai se tasi o so outou uso, o se perofeta e pei o a'u." ³⁸ O ia lea sa i le faapotopotoga i le vao faatasi ma le agelu na fetalai mai ia te ia i le mauga o Sinai, sa faatasi foi ma o tatou tamā, ua na talia foi 'upu o le ola e aumai ia te i tatou. ³⁹ Aepeita'i, ua lē loto o tatou tamā e usiusitai ia te ia, a ua tete'e atu ai, ma toe foi atu i o latou loto i Aikupito. ⁴⁰ Ua latou faapea atu ia Arona, "Ina faia ia atua mo tatou e taitai atu i ai tatou, auā o lenā Mose na taitaiina mai i tatou mai Aikupito, tatou te le iloa se mea ua oo ia te ia." ⁴¹ Na faia foi e i latou i ia ona po le tamai povi, ua latou fai foi le taulaga i le tupua, ua olioli foi i latou i galuega a o latou lava lima. ⁴² Ona liliu ese lea e le Atua, ma tuu atu ia te i latou ina ia vivii atu i fetu o le lagi, e pei ona tusia i le tusi a le au perofeta, "Le aiga o Isaraelu e, na outou aumaia ea ni taulaga ma ni manu ua fasia ia te a'u i na tausaga e fa sefulu i le vao? ⁴³ Na outou talia le malumalu o Moleka ma le fetu o le atua o Refana, o faatusa na outou faia tou te ifo i ai, o le mea lea ou te avea ai outou e nonofo i tala atu o Papelonia. ⁴⁴ Sa i o tatou tamā le fale fetafa'i o le molimau i le vao, e pei ona poloaiina ai e le Atua Mose ina ua fetalai ia Mose, ina ia faia e pei o le faatusa na ia vaai i ai. ⁴⁵ Mulimuli ane i lalo i le taitaiga a Iosua, na talia e o tatou tamā lea fale fetafa'i, ma latou aumaia i latou i eleele o nuu ese, na tulia ai e le Atua i latou i luma o tatou tamā, e oo mai i ona po o Tavita, ⁴⁶ o ia o lē na alofaina e le Atua, ua na faatoga atu foi ia maua e ia se mea e afio ai le Atua o Iakopo. ⁴⁷ Aepeita'i, na faia e Solomona le fale mo le Atua. ⁴⁸ Ae ui i lea, o le Silisili ese, e lē afio o ia i malumalu e faia e lima, e pei ona fai mai ai le perofeta, ⁴⁹ "O le lagi o lo'u nofoalii lea, o le lalolagi foi o le mea e tu ai o'u vae lea. Pe faapefea se fale tou te faia mo a'u? po o fea se mea ou te nofo ai? ⁵⁰ E le'i faia ea e o'u lima nei mea uma? ⁵¹ O outou e ua ma'a'a ua, ua lē peritomeina loto ma taliga, ua outou tete'e atu pea lava i le Agaga Paia, pei o outou tamā ua faapea foi outou. ⁵² O ai o so le au perofeta e lei sauā iai o outou tamā? ua fasioti foi e i latou e na muai tala'i i le afio mai o lē Amiotonu; ma ua avea nei foi outou ma e fasioti ma fa'alata ia te ia; ⁵³ outou e ua maua le tulafono i sauniga a agelu, a ua outou le taofia." ⁵⁴ Ua faalogo i ai i latou i nei upu, ona matuā tiga ita ai lea o latou loto, ua lilivau foi o latou nifo. ⁵⁵ A'o ia, ua fa'atumuina o ia i le Agaga Paia, ua pulato'a i le lagi ma iloa atu le pupula o le Atua, ma Iesu o loo tu i le itu taumatau o le Atua. ⁵⁶ Ona fai atu lea o ia, "Faauta, ua ou iloa le lagi ua avanoa, ma le Atalii o le tagata o loo tu i le itu taumatau o le Atua." ⁵⁷ Ua pupuni e i latou o latou taliga, ua alalaga ma le leo tele, ma feosofi mai ia te ia ma le loto gatasi. ⁵⁸ Ua latou tulei ia te ia i tua o le aai, ona fetogi lea ia te ia i maa. Ua tuu atu foi e molimau o latou ofu i lalo o vae o le taulealea e igoa ia Saulo. ⁵⁹ A'o fetogi i latou ia Setefano, ua valaau o ia i le Atua ua faapea atu, "Le Alii e Iesu, ia e talia mai lo'u nei agaga." ⁶⁰ Ua to'otuli o ia ma tagi atu ma le leo tele, "Le Alii, aua nei e tuuina atu lenei agasala ia te i latou." Ua uma atu ia upu, ona moe ai lea o ia.