¹ Sa iai se tasi o tamaloa sa nofo i le aai o Kaisareia e igoa ia Konelio, o ia o le ta'ita'i au o le to'aselau o le autau a Italia. ² O ia o se tagata fa'amaoni, e mata'u i le Atua fa'atasi ma lona aiga atoa, e foai mea alofa i tagata ma tatalo i le Atua e lē aunoa. ³ E tusa ma le ta o le itula e iva o le aso, na ia vaaia ai se fa'aaliga manino lea na ia vaaia ai se agelu a le Atua ua sau ia te ia. Ua fai mai o ia iā te ia, "Konelio!" ⁴ Ua pulato'a atu Konelio i le agelu ma le fefe tele ma fesili atu, e iai se mea e te manao ai? Na tali atu le agelu, " Ua o a'e au talosaga ma au galuega alofa sa fai, e fai ma taulaga fa'amanatu i luma o le Atua. ⁵ O lenei, ia aauina atu ni tamaloloa i le aai o Iopa e aumai le tagata e igoa ia Simona, e igoa fo'i ia Peteru. ⁶ O lo'o nofo o ia ma Simona, le fai pa'u manu, o lona fale e lata ane i le sami. ⁷ Ina ua alu ese le agelu na fai atu iā te ia, ona valaau lea e Konelio o ana auauna e to'alua ma le fitafita fa'amaoni mai i ana auauna. ⁸ Ua fa'amatala atu e Konelio iā tei latou mea uma na tutupu, ma auina atu i latou i Iopa. ⁹ O le aso na soso'o ai, pe tusa o le aoauli, a'o latou malaga atu ma ua latatala atu i le aai, ona alu a'e ai lea o Peteru i le taualuga o le fale e tatalo ai. ¹⁰ Ua lagona e ia lona fia ai. Sa ia vaai ai se faaliga, ao tapena e nisi o tagata meaai. ¹¹ Na ia vaaia ua matala le lagi ma ua iloa atu se pusa tafafa e pei o se ie tele lava o lo'o alu ifo i le fogāeleele ma o lo'o taofiofi e ona tulimanu e fa. ¹² O lo'o i totonu o lea ie tele lava ituaiga manu vaefa uma ma manu felelei uma o le ea e fa'asa ona aai ai e pei ona fai mai ai le tulafono a Mose. ¹³ Ua talanoa mai le leo ia te ia: "Tulai ia oe Peteru, ia fasi ma ai." ¹⁴ Ua fai atu Peteru, "E leai, le Alii e; ou te lei ai lava i se mea lē paia ma lē mama." ¹⁵ Ua toe talanoa mai foi le leo ia te ia: " Ia aua e te taua se mea e le mama, aua ua fa'amamāina e le Atua. ¹⁶ E fa'atolu ona tupu lenei mea, ona toe ave a'e loa lea o le ie i le lagi. ¹⁷ Ua le mautonu Peteru po'o le a le uiga o le fa'aliga sa ia vaaia, ae fa'afuase'i ona tūtū atu tamaloloa i le faitotoa, o i latou sa auina atu e Konelio e saili le auala i le fale o Peteru. ¹⁸ Ua latou fesili ia te ia po'o Simona lea e igoa iā Peteru e nofo i nei. ¹⁹ A'o mafaufau pea Peteru i le fa'aliga, ua fa'apea atu le Agaga paia iā te ia, "e te iloa ea, o lo'o saili tamaloloa e toatolu ia te oe. ²⁰ Ia e tu ia i luga ma ō ma i latou, 'aua e te musu aua o a'u lava sa auina atu ia tei latou. Ua alu ifo i lalo Peteru ma fai atu i tamaloloa, " ²¹ O a'u lea na outou saili i ai. O le a se mea ua outou omai ai? ²² Ua latou fa'apea mai, " O le taitai au o le to'aselau e igoa ia Konelio, o ia o le tagata amiotonu ma e mata'u fo'i i le Atua, e ta'uleleia fo'i i totonu o Iutaia uma lava, ua fa'atonu e le Agaga paia ia te ia ina ia fa'alogologo i le feau mai iā te oe." ²³ Ona talia lea e Peteru o i latou i lona fale ma nonofo ai. Ua o'o i le taeao o le aso na soso'o ai, ua tula'i o ia ma ō ma i latou, ma nisi o le au uso mai Iopa. ²⁴ Ua ō i latou ia Kaisaria i le aso na soso'o ai. Sa faatali foi latou e Konelio ma lona au aiga uma ma ana uo. ²⁵ Ua ulufale atu Peteru, ona feiloa'i atu ai lea o Konelio ma ia fa'apaū i ona vae ma vivi'i atu ia te ia. ²⁶ A ua fa'atu e Peteru o ia i luga ma fa'apea atu, Ia tu ia i luga! O a'u fo'i o le isi tagata. ²⁷ A o talanoa o Peteru ma ia, na ulu atu o ia ma iloa atu ai le motu o tagata ua faapotopoto mai. ²⁸ Ua ia faiatu iā te i latou, " Ua outou iloa lelei e sa i la tatou tulafono ona fa'auo pe asiasi se Iutaia i se tagata o Nu'u ese. A ua fa'aali mai e le Atua ia te a'u e lē tatau ona ou ta'ua se tagata e leaga pe eleelea. ²⁹ O le mea lea ua ou sau ai e aunoa ma se finauga, ina ua valaauina a'u. O lea oute fesili atu ai pe aiseā ua valaau atu ai a'u." ³⁰ Ua fai mai Konelio, e fa aso talu ai i lenei lava itula, sa ou tatalo ai i le itula e iva i totonu o lo'u fale; faauta, sa tu le tagata i o'u luma i ofu pupula. ³¹ Na ia fai mai, Konelio fa'afofogaina e le Atua lau tatalo, ma ua manatua fo'i e le Atua lau foa'i atu. ³² O lea, ia auina se tasi i Iopa, ma valaau le tagata e igoa iā Simona, o lo'o ta'ua o Peteru. O lo'o nofo o ia i le fale o Simona, o se fai pa'u manu o ia, i tafatafa o le sami. ³³ O lea la, na vave ai ona valaau mo oe. Ua e agalelei mai i lou sau. O lenei la, o lo matou fa'atasi uma i nei i luma o le silafaga a le Atua e fa'alogologo i mea uma ua fa'atonuina ai oe e le Alii e fai mai. ³⁴ Ona matala lea o le gutu o Peteru ma fai mai, " Ua ou iloa ma le moni e le faailoga tagata le Atua. ³⁵ Ae, i atunu'u uma lava, so'o se tasi e mata'u iā te ia ma faia le mea tonu e talia e ia. ³⁶ Ua outou iloa le tala na ia auina atu i le nu'u o Isaraelu, ina ua ia tala'i mai le tala lelei e uiga i le filemu e ala ia Iesu Keriso, o ia o le Alii o tagata uma lava. ³⁷ Ua outou iloa lava mea na tutupu, i mea na tutupu i Iutaia uma, amata mai i Kalilaia, ina uma mavae le papatisona na folafola mai e Ioane; ³⁸ o mea e uiga ia Iesu o Nasareta, o le auala na fa'auuina ai o ia e le Atua i le Agaga Paia ma le mana. Sa alu o ia ma fai mea lelei ma faamalōlō i latou uma na faatigaina e le Tiapolo, aua sa iai le Atua ma ia. ³⁹ O i matou o molimau i mea uma na faia e Iesu, i le nuu o Iutaia atoa ma Ierusalema. Na latou fasiotia o ia i le fa'atautauina o ia i luga o le laau, ⁴⁰ ae na toe fa'atuina o ia e le Atua i le aso tolu ma fa'aali mai ai o ia, ⁴¹ e le o le nu'u uma, ae o molimau na filifilia muamua e le Atua- o i matou na 'aai ma feinu fa'atasi ma ia ina ua uma ona toe tu mai le oti. ⁴² Na ia poloa'i mai iā i matou e tala'i atu i tagata uma ma molimau atu o ia o lē na filifilia e le Atua e fai ma Fa'amasino o lē ola ma e ua feoti. ⁴³ O ia uma lava na molimau i ai perofeta, o se tasi lava e talitonu iā te ia e maua le fa'amagaloga o agasala i lona suafa. ⁴⁴ A o talanoa atu Peteru i ia mea, sa o'o ifo le Agaga Paia i ē uma o lo'o fa'alogologo i lana fe'au. ⁴⁵ O ē na auai ma Peteru, o ē mai le vaega o le au fa'atuatua ua peritomeina, sa ofo ona ua liligiina mai foi le meaalofa o le Agaga Paia i tagata o nu'u ese. ⁴⁶ Aua na latou fa'alogo ua tautatala i latou i gagana ese ma vivi'i atu i le Atua. Ona tali atu lea o Peteru, ⁴⁷ "Pe e iai se tasi e mafai ona taofia le vai mo nei tagata, ina ia le papatisoina, o ē ua maua le Agaga paia e pei o i tatou?" ⁴⁸ Ona ia poloa'i atu lea ia papatisoina i latou i le suafa o Iesu Keriso. Ona latou aioi atu le iā te ia e nonofo ma i latou i ni aso.