¹ O le mea lea, ona ua ia te i matou lenei faiva, faapei ona alofaina o i matou, ua matou le fa'avaivai ai. ² A ua matou tete'e atu i amioga lilo ma ala e maasiasi ai. Matou te le savavali ma le amio pepelo, matou te lē o faatamala foi i le upu a le Atua, a'o le upu moni matou te faaali atu, ma faailo atu o matou tagata ia te outou i le mafaufau tonu i luma o le silafaga a le Atua. ³ Ae afai ua punitia la matou talai atu o le talalelei, ua punitia ia i ē ua fano. ⁴ Ua faatauasoina e le atua o lenei lalolagi o latou loto lē talitonu. O le mea lea, ua lē mafai ai e i latou ona iloa le malamalama o le talalelei i le mamalu o Keriso, o ia o le faatusa o le Atua. ⁵ Auā matou te lē o tala'iina atu i matou, a o Keriso Iesu le Alii, o i matou nei foi o a outou auauna ona o Iesu. ⁶ Auā o le Atua o ia lava na fetalai, "E pupula atu le malamalama mai le pouliuli". Ua pupula mai foi o ia i o matou loto, ma aumai ai le malamalama e iloa ai le mamalu o le Atua i fofoga o Iesu Keriso. ⁷ A ua ia te i matou lenei oa i ipu omea, ina ia iloa lelei tonu ai, o le Atua e ona le mana e matuā tele lava, ae lē o matou. ⁸ Ua puapuagatia i matou i mea uma, a e le fa'aatuatuvaleina ai. Ua fememea'i, ae le faavaivai ai. ⁹ Ua sauaina, ae le tu'ulafoaina; ua lafotuina, ae le fa'aleagaina; ¹⁰ e le o aunoa ona matou tauaveina i le tino le maliu o Iesu, ina ia faailoa foi le soifua o Iesu i o matou tino. ¹¹ Aua o i matou nei o lo o ola, e le aunoa ona tuuina atu pea lava i le oti ona o Iesu, ina ia fa'aalia lava le soifua o Iesu i o matou tino augavale. ¹² O le mea lea, ua galue le oti i totonu ia te i matou, a o le ola i totonu ia te outou. ¹³ O lo o ia te i matou lea lava agaga o le faatuatua e tusa ma le mea ua tusia: "Na ou fa'atuatua, o le mea lea na ou tautala atu ai." O i matou foi ua matou faatuatua, o le mea lea ua matou tautala atu ai foi. ¹⁴ Ua matou iloa o lē na faatuina le Alii o Iesu, e faatutuina foi e ia i matou faatasi ma Iesu, ma aumaia i matou faatasi ma outou i lona mamalu. ¹⁵ Auā o mea uma lava e mo outou lea, ina ia lagona e le toatele ua tala'iina ai le alofa tunoa, ma avea ma ala e tupu ai le agaga o le faafetai e faatele ai le viiga o le Atua. ¹⁶ O le mea lea matou te le faavaivai ai. E ui lava ina tauau ina uma atu lo matou tagata i fafo, ae o loo faafouina pea lē oi totonu i lea aso ma lea aso. ¹⁷ Auā o o matou puapuaga mamasagia ma le vave mavae i le taimi nei, e fanau mai ai se tiga mamafa mo le manuia e faavavau ma lona mamalu e le mafai ona fuatia. ¹⁸ Auā matou te le o manatunatu i mea ua vaaia, ao mea e lē vaaia. O mea e vaaia e le tumau, a'o mea e le vaaia e faavavau.