¹ A matou toe amata ea ona tauleleia i matou e i matou lava? Pe manaomia ea foi ni tusi faamaonia o lo matou tauleleia e avatu ia te outou pe mai foi ia te outou, e pei on a faia e nisi? ² O outou lava o la matou tusi faamaonia, o tusia i o matou nei loto, ua iloa ma faitauina e tagata uma. ³ Ua outou faaalia o outou o le tusi mai ia Keriso, o le fua o la matou galuega. E le i tusia i le vaitusi a'o le Agaga o le Atua soifua. Ua lē tusia i papatusi maa, a'o papatusi o aano o le loto. ⁴ O lo o ia te i matou lenei mautinoa i luma o le Atua e ala ia Keriso. ⁵ E leai se mafaia o ia te i matou e manatunatu ai faapea o mea e mai ia te i matou. Aepeita'i, o lo matou mafaia o se mea e mai le Atua lea. ⁶ O le Atua ua mafai ai e i matou ona avea ma auauna o le feagaiga fou. O le feagaiaga lea e lē o le tusi a'o le Agaga, auā o le tusi e fasioti a'o le Agaga e na te aumai le ola. ⁷ O le sauniga na oo mai ai le oti - na tāina/togia i mata'itusi i ma'a, na o'o mai lea i se mamalu e le i mafai e atali'i o Isaraelu ona pupula sa'o atu i fofoga o Mose, ona o le pupula o ona fofoga, o le pupula lea e faaumatia. ⁸ E le matuā sili ea le mamalu o le sauniga e o'o mai ai le Agaga? ⁹ Auā afai sa mamalu le sauniga na o'o mai ai le faasala, e matuā sili lava ona mamalu le sauniga na o'o mai ai le amiotonu! ¹⁰ Aua e moni lava, o le mea sa faia ia mamalu ua le o toe mamalu i lenei mea, ona o le mamalu e silisili atu. ¹¹ Auā afai sa iai le mamalu i le mea e faaumatia, e le matuā sili ea le mamalu o le mea e tumau! ¹² O lenei, ona ua ia te i matou o lenei faamoemoe, matou te faaalitino atu, ¹³ ae lē pei o Mose, ua tuu e ia le ufiufi i ona fofoga, ina ia lē mafai ona pulato'a ai le fanauga a Isaraelu i le iuga o le mamalu e mavae atu. ¹⁴ A ua ma'a'a o matou loto. Auā e o'o mai i nei ona po, o lo o tumau pea lea ufiufi pe a latou faitauina le feagaiga tuai, e le i aveeseina lava, auā ua na o Keriso e mafai ai ona aveeseina. ¹⁵ A ua o'o mai lava i ona po nei, o lo o iai lava le ufiufi i o latou loto pe a faitauina le tusi a Mose, ¹⁶ ae peita'i pe a liliu le tagata i le Alii, ona ave'eseina ai lea o le ufiufi. ¹⁷ O le Alii o le Agaga lava ia. O le mea e i ai le Agaga o le Alii, e i ai le saolotoga. ¹⁸ A'o i tatou uma, o lo o vaavaai i tatou i le mamalu o le Alii ma o tatou mata e leai ni ufiufi. Ua faaliliuina foi i tatou ia foliga i lea lava mamalu, ma si'itia mai le tasi mamalu i le isi, faapei ona aumai i le Alii, o ia o le Agaga.