¹ O lenei, na tigaina Keriso i le tino, ia fai ai ma auupega ia te outou foi lea lava loto. Auā o lē ua tiga i le tino, ua tuu e ia le agasala. ² O le iuga o lea tagata, i le taimi o totoe i le tino nei, e lē toe usiusitai o ia i tuinanau o tagata, ae ua ia usiusitai i le finagalo o le Atua. ³ Ua lava ia aso ua mavae na fai ai e outou le manao o Nuuese, o savavali i le faamatāitu ma tuinanau, ma le inu tele i uaina, ma poula, ma inugāava, ma le ifo i tupua e soli ai tulafono. ⁴ O le mea lea latou te ofo ai ma faifai ia te outou, auā tou te le amio faatasi mai latou i nei amio leaga/matuiā. ⁵ O le a latou te avatu se tala i lē ua saunia e faamsino i ē ola ma ē ua oti. ⁶ O le mea lea na folafola atu ai le tala lelei i e ua oti, ina ia faasalaina i latou i le tino i la tagata, a e ola i le agaga i la le Atua. ⁷ A ua lata mai le gataaga o mea uma lava. O lenei, ia outou mafaufau lele ma ia faautauta i lou mafaufau i le tatalo. ⁸ Ia muamua i mea uma ona maua e outou o le alofa nauanau o le tasi ile tasi, auā o le alofa e ufiufi ai agasala e tele. ⁹ Ia outou talia malaga o outou ma le lē muimui. ¹⁰ Ia taitoatasi ma auauna o le tasi i le tasi i lea lava mea, e pei ona maua e ia o le meaalofa, e pei o auauna pule lelei a le alofa tunoa uiga eseese o le Atua. ¹¹ Afai e tautala se tasi, ia tusa ma afioga ale Atua; afai e auauana se tasi, ia tusa me le malosi ua foaiina mai e le Atua. Ia faia nei mea uma, ina ia viia le Atua, ona o Iesu Keriso, ia ia te ia le viiga ma le mana e favavau faavavau lava. Amene. ¹² Le au pele e, aua tou te ofo i le tofotofoga pei o le afi, ua oo ia te outou e fai ma tofotofoga ia te outou, peiseai o se mea fou ua oo ia te outou. ¹³ Ae peitai, e ui lava ina ua outou tofusia faatasi i tiga o Keriso, ia outou olioli ai, ina ia fiafia outou ma le olioli tele pea faaalia mai lona mamalu. ¹⁴ Afai e upu leagaina outou ona o le suafa o Keriso, amuia outou aua o loo tumau ia te outou le Agaga o le mamalu, o le Agaga o le Atua. ¹⁵ Aua foi ne'i faatigaina se tasi o outou i le fasioti tagata, pe gaoi, pe amio leaga, po ina ua asiasi fua i mea a isi tagata. ¹⁶ Ae afai e faatigaina se tasi ona o ia o le Kerisiano, aua le masiasi ai o ia, a ia vivii atu i le Atua ona o lea lava mea. ¹⁷ Auā o ona po nei e amata ai le faamasinoga i le aiga o le Atua. Afai foi e muamua iai tatou, pe se a le gataaga o e faalogogata i le tala lelei a le Atua? ¹⁸ Pe afai foi e faigata i lē amiotonu ona faaolaina, poo ifea e tu mai ai ole faalematau ma le agasala? ¹⁹ O lenei, o i latou ua tigaina e tusa ma le finagalo o le Atua, ia latou tuuina o latou agaga/loto, i lē na faia mea uma.