¹ Ou te aioi atu i toeaina o ia te outou, o a'u foi o le toeaina, ma le molimau i tiga o Keriso, ma le ua tofusia faatasi mai; ² Ia outou leoleo i le lafu mamoe a le Atua o ia te outou, ia tausi i ai ma le loto, a e le o le faatauanauina; aua foi nei faia ma le fia fai oloa, a o le loto fiafia. ³ Aua foi nei faapei o e pule faasaua i e ua tofia i ai outou, a ia fai outou ma faaa'oa'o i le lafu mamoe. Pe a faaali mai foi le Leoleo mamoe sili. ⁴ Pe a faaali mai foi le Leoleo mamoe silisili, e maua e outou le pale pupula e le mamae lava. ⁵ Ia faapea outou o e talavou, ia usiusitai i toeaina. Ia oofu outou uma lava i le loto maulalo o le tasi i le tasi ma auauna le tasi i le tasi. E tetee atu le Atua i faamaualuluga, a e foaiina mai le alofa tunoa i e faamaulalo. ⁶ O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia iona po e tatau ai. ⁷ Ia tuuina atu ia te ia mea uma tou te popole ai, auā o loo manatu mai o ia ia te ouotu. ⁸ Ia outou faautauta, ia outou mataala. Ona o le ua fai outou mona fili, o le tiapolo lea, o loo fealualuai o ia e pei o se leona tagi. ⁹ Ua saili se tasi e 'aina e ia. Ia outou tetee atu ia te ia. O mausali outou i le faatuatua. Ina ua outou iloa o loo oono lo outou au uso o i le lalolagi i ia lava mea tiga. ¹⁰ A o le Atua e ona le alofa tunoa uma lava, o le na valaauina i tatou ia iu atu i lona mamalu faavavau o ia Keriso, pe a tigaina outou i nai aso, e faaatoatoaina outou e ia lava, e faatumauina, e faamalosia foi outou. ¹¹ Ia ia te ia le mana e faavavau, faavavau lava. Amene. ¹² O Siluano, o lo'u taofi o le uso faamaoni o ia, ua ou tusi atu ai nai upu itiiti ia te outou, e apoapoai atu ma tautino atu ai, o le alofa tunoa moni leneii o le Atua ua outou tumau ai nei. ¹³ O loo alofa atu ia te outou le ekalesia i Papelonia na filifilia faatasi ma outou, atoa ma lo'u atalii o Mareko. ¹⁴ Ia fealofani outou i le feasogi alofa. Ia manuia outou uma lava o e o ia Keriso.