¹ Oute le o saoloto ea? E le o a'u ea o se Aposetolo? Oute le i vaai ea ia Iesu lo tatou Alii? E le o outou ea o la'u auaunaga i le Alii? ² Afai e le o a'u o se aposetolo i nisi, a o le mea sili o a'u lea ia te outou. Aua o outou o le faamaoniga o la'u Aposetolo i le Alii. ³ O la'u tali atu lea ia i latou o faamasino mai ia te a'u ⁴ E le i ai ea sa tatou faitalia tatou te aai ai ma feinu? ⁵ E le o ia i tatou ea le faitalia tatou te feao'i ai ma ave a tatou ta'ito'alua aua o i latou o e talitonu, e pei ona fai e le tele o Aposetolo, ma uso i le Alii, faapea ma Kefa? ⁶ Pe na'o a'u ea ma Panapa e leai se pule e faigaluega ai? ⁷ O ai e auauna o ia o se fitafita ae le totogiina? O ai e toto o sana togavine ae nate le aia sona fua e tasi? O ai e leleo ana mamoe ae le mafai e ia ona inu i se susu mai ana mamoe.? ⁸ Oute le o fai atu nei mea e fua i luga i le pule a tagata? Aua e le o fai mai ai le tulafono i nei mea? ⁹ Aua o lo o tusia i le tulafono a Mose, "Aua e te fusi i le gutu o le povi a o solisoli e ia saito". O le povi ea o lo o manatu mai i ai le Atua? ¹⁰ E le o tatou ea o lo o faatatau i ai lana tala? Na tusia mo i tatou, aua o le na suatia le eleele e ao ina suatia e ia ma lona faamoemoe, a o le e solisoli le saito, e solisoli o ia ma lona faamoemoe na te maua lona taui pe a fai o le seleselega. ¹¹ Afai matou te lulu atu mea faaleagaga ia te outou, e leaga ea pe a matou selsele mai mea o le tino mai ia te outou. ¹² Afai o lo o maua e nisi lea pule faitalia mai ia te outou, e le tatau la ona sili atu ona matou maua? Ae matou te le o faamalosia lea pule faitalia. Ae peita'i ua matou onosa'i i mea uma ina ne i fai i matou ma faalavelave i le talalelei ia Keriso. ¹³ Tou te le iloa ea o i latou o lo o latou faatino o latou tiute pa'ia, e latou te aai mai meaai o i le malumalu? Tou te le iloa ea o i latou o galulue i le fata faitaulaga latou te maua mea mai le fata faitaulaga? ¹⁴ O le mea lava lea e tasi, ua faatonuina mai e le Alii, o i latou o lo o latou tala'ia le talalelei, e tatau ona latou maua mai lo latou taui e ola ai mai le talalelei. ¹⁵ Ae oute le i faamalosia atu lava nisi o nei pule faitalia. Ae oute le o tusi atu fo'i lenei mea ina ia faia mai se mea mo a'u. Sa sili atu ai pe ana ou oti nai lo - o le leai o se isi na te faaleaogaina lo'u mitamita. ¹⁶ Aua afai oute folafola atu le talalelei, e leai se mafuaaga oute mitamita ai fua, aua o le mea e tatau ona ou fai. Aua talofa e ia te a'u pe a ou le foloafolaina atu le talalelei!. ¹⁷ Afai oute faia lenei mea ma lo'u loto i ai, oute maua lo'u taui. Ae afai oute le loto i ai, o lo o i ai lava la'u matafaioi na tuuina mai ia te a'u. ¹⁸ O le a nei la le taui oute maua? Afai oute tala'i atu, e mafai ona ou tufaina atu le talalelei e aunoa ma se totogi, ona ou le faaaogina atoatoa lea o la'u pule faitalaia o lo o i le talalelei. ¹⁹ Aua e ui ina ou saoloto mai i tagata uma, a ua avea a'u ma auauna i tagata uma, ina ia ou manumaloina mai nisi e toatele. ²⁰ Ina ia ou maua mai le 'au Iutaia, na avea a'u faapei o se Iutaia, ina ia ou manumaloina mai le 'au Iutaia. O i latou o lo o nonofo i lalo o le tulafono, ae na avea a'u faapei o se tasi o lo o nofo i lalo o le tulafono. Ma na ou faia lava lenei mea, e ui lava oute le o nofo i lalo o se tulafono. ²¹ Ina ia maua mai i latou o nonofo i lalo o le tulafono, na avea a'u faapei o se tasi o nofo i lalo o le tulafono, e ui oute le o i fafo o le tulafono a le Atua ae o lo o o'u nofo i lalo i le tulafono a Keriso. Na ou faia lea mea ina ia ou manumaloina i latou o lo o nonofo i lalo o le tulafono. ²² Ina ia ou maua le vaivai, na avea a'u faapei o se vaivai, ina ia ou manumaloina e vaivai. Na avea a'u ma tali i le tele o mea i tagata uma, ina ia mafai ona ou faaolaina mai nisi. ²³ Oute faia mea uma mo le lelei o le talalelei, ina ia ou maua lona manuia. ²⁴ E te le iloa ea o le tuuga, e tausinio le au tamomo'e uma lava, ae na o le to'atasi lava na te maua le faailoga? Ia faapea ona e tamo'e ina ia e maua le faailoga ²⁵ O le au tamomo'e latou te iloa ona puleaina o o latou tagata i mea uma. Ae peita'i o i latou ua latou faia ina ia latou maua le pale e le pala gofie. A o tatou ua tatou faia ina ia tatou maua le pale e le pala gofie. ²⁶ O a'u nei fo'i e faapea ona ou tamo'e, e le faapei o se leai o sona faamoemoe, e faapea fo'i ona ou fusu, e le faapei o le e tu'i le ea ²⁷ Ae oute faatoilaloina lo'u nei tino ma avea o ia ma pologa, ina ia mafai ona ou lauga atu i nisi, ae le mafai ona faasalaina o a'u.