¹ Ma o a'u lenei o'u uso e, ua le mafai ona ou tautala atu ia te outou o tagata faaleagaga, ae peita'i o tagata faaletino outou, ua pei o ni tamaiti laitti ia Keriso ² Oute fafaga ia te outou i le suasusu, ae le o meaai aano, ona tou te le i sauni i ai, ma e oo mai i le taimi nei tou te le i sauni lava. ³ O lo o faaletino lava outou. O lo o i ai lava le lotoleaga ma le faamisa ia te outou, toute le o ola ea e tusa ma le tino, ma toute le o savavali ea i aga faale tagata? ⁴ Ua fai mai le tasi, "Oute mulimuli atu ia Paulo", ae ua fai mai isi "Oute mulimuli ia Apolo", e le o outou ea o tagata? ⁵ O ai Apolo? O ai Paulo? O auauna a le o lo o outou talitanu i ai, e tusa ma o latou valaauina taitoatasi ua auina mai e le Alii. ⁶ Na ou totoina, o Apolo na ia faasusuina, a o le Atua o le na Ia faatupuina ⁷ O lona uiga, e le o le na toto po o le na faasusu e sili ona taua, ae o le Atua o le na faatupu. ⁸ E tasi lava i la'ua na toto ma le na faasusu, ma e taitoatasi ma ia maua lona taui e tusa ma lana lava galuega ⁹ Aua o i tatou uma lava o e faigaluega mo le Alii. O outou o togalaau a le Atua, o outou o fale o le Atua. ¹⁰ E tusa ma le alofa tunoa o le Atua na tuuina mai ia te a'u, o se fau fale e sili ona atamai ma agavaa, oute faataatia le faavae, ae fausia e le isi i ona luga. A ia faaeteete tagata uma o e fausia se fale i luga o le faavae ¹¹ E leai se tasi na te faataatia se isi faavae e ese mai le faavae ua mae'a faataatia, o Iesu Keriso lea. ¹² O lenei, afai e i ai se tasi na fausia se fale i auro, ario, maa taua, laau, vaofali po o tagutugutu o saito ¹³ e faaalia lava ana galuega, e sau le aso e faaalia ai, aua o le a faaalia i le afi. O le a tofotofoina i le afi le lelei o galuega a le tagata na fai. ¹⁴ Afai e i ai se tasi e tumau ana galuega, o le a ia maua le taui ¹⁵ Ae afai o le a susunuina ma liu efuefu galuega a se tasi, e matua faanoanoa o ia ae o le a faaolaina lava o ia, ae peisea'i o se tasi na ui mai i le afi ¹⁶ E te le iloa ea o oe o le malumalu o le Atua, ma o le Agaga o le Atua e nofo o Ia i totonu ia te oe? ¹⁷ Afai e faaleagaina e se tasi le malumalu o le Atua, e faaleagaina e le Atua lena tagata. Aua e paia le malumalu o le Atua, ma ua faapena fo'i oe. ¹⁸ Aua ne'i faaseseina e se tasi o ia lava. Afai e manatu se tasi o outou ua poto o ia i lenei lalolagi, ia avea o ia ma "vale" ina ia maua e ia le poto ¹⁹ Aua o le poto o lenei lalolagi o le valea lea i le Alii. Aua ua tusia, "Na te maua o e popoto i a latou togafiti" ²⁰ E faapea fo'i, "ua iloa e le Alii o manatunatuga o e popopoto ua faatauvaa ia" ²¹ O le mafuaaga lea, e aua ai ne'i mitamita se tasi i luma o tagata. O le Atua e ona mea uma. ²² po o Paulo, po o Apolo, po o Kefa, po o le lalolagi, po o le ola, po o le oti, po o mea o lo o i ai, po o mea o lo o i le lumanai, O oe e ona nei mea uma. ²³ ma o oe o Keriso, o Keriso o le Atua lava Ia.