¹ Ia outou tausisi i le alofa ma ia matua naunau i meaalofa faaleagaga, aemaise lava ina ia mafai ona e perofeta ane. ² Aua o le tautala i gagana eseese e le o tautala o ia i tagata, a o lo o tautala atu o ia i le Atua. Aua e leai se tasi e malamalama ia te ia, aua o lo o tautala atu o ia i mea lilo mai le Agaga Paia. ³ A o le perofeta ane e tautala atu o ia i tagata ina ia faatupuina i latou, ia faamalosia i latou, ma ia faamafanafanaina i latou. ⁴ A o le e tautala i gagana eseese e faatupuina e ia lona lava malosi, a o le perofeta ane e faatupuina e ia le malosi o le ekalesia. ⁵ Ou te naunau ina ia outou tautatala uma i gagana eseese, ae sili atu ona ou naunau ina ia outou perofeta ane. O le perofeta ane e sili atu nai lo le e tautala i gagana eseese (se i vagana ua i ai se tasi na te faaliliuina le gagana eseeese ina ia mafai ona faamalosia ai le ekalesia). ⁶ A o lenei o'u uso e, afai oute tautala atu ia te oe i gagana eseese, e mafai faafefea ona ou faamalosi ai ia te oe? E le mafai se i vagana ua ou tautala atu ia te oe i faaaliga, ma le malamalama, o faaperofetaga atoa ma aoaoga. ⁷ 7. 7 E tutusa lava ma lou taina o ni mea faaili e leai ni leo. E oo fo'i i le pu ma le kitara, afai e le eseese leo o meafaili nei e lua, e faafefea ona iloa e tagata e ese le pu ese le kitara. ⁸ Afai e le lelei pe le manino le iliina mai o le pu, e faafefea ona iloa e tagata ua oo i le taimi e sauni ai o le a tau?. ⁹ E faapena fo'i le gagana eseese. A e tautala i le gagana eseese ae le malamalama ai se isi, e faafefea ona faigofie ona malamalama se tasi i se mea o e talanoa mai ai?. O lona uiga ua na o faamatalaga o fai i le ea. ¹⁰ E tele le eseesega o gagana i le lalolagi, ae leai se gagana e leai sona uiga. ¹¹ Afai la ou te le leiloa le uiga o lea gagana, o lona uiga o a'u o se tagata mai se isi atunuu i le o tautala, e ese fo'i le atunuu e sau ai le o tautala ia te a'u. ¹² E faapena fo'i outou. Aua na ona outou naunau ina ia faaalia le matautia o meaalofa a le Agaga, ae ia outou saili ina ia mafai ona faamafanafanaina le ekalesia ina ia faatupuina outou. ¹³ O le tagata o lo o tautala i gagana eseese e ao ona tatalo ina ia mafai ona ia faaliliuina le gagana. ¹⁴ Aua a ou tatalo i le gagana eseese, o lo o tatalo lo'u agaga, ae le malamalama i ai lo'u mafaufau. ¹⁵ O le a la le mea ou te faia?. O le a ou tatalo mai lo'u agaga, ae o le a ou tatalo mai fo'i i lo'u mafaufau. O le a ou pese mai lo'u agaga, ae o le a ou pese mai fo'i i lo'u mafaufau. ¹⁶ O lona uiga, afai e te faafetai i le Atua mai le gagana eseese, e faafefea la ona Amene mai tagata pe afai e le o malamalama tagata i se upu e tasi o fai atu ai lau faafetai i le Atua. ¹⁷ Ua matua manaia lava le ave atuina o lau faafetai, ae le o faamalosia ai le isi tagata. ¹⁸ Ou te faafetai i le Atua ona e sili atu ona ou tautala i gagana eseese nai la se isi lava o outou. ¹⁹ A o totonu o le ekalesia, e sili ai ona ou tautala atu pe na o le lima ni upu, ae o lo o malamalama ai tagata, nai lo le sefulu afe o upu e fai atu mai la'u gagana eseese . ²⁰ Uso e, ia aua ne i outou mafaufau e pei o ni tamaiti. Ia laititi la outou vaai i le leaga, a ia outou matutua i o outou manatu. ²¹ O lo o tusia i le tulafono "Ou te auina atu nisi e tautatala i gagana eseese ma laugutu o i latou mai nuu ese, oute talanoa atu ai i tagata, e ui ina ou iloa e le mafai ona faalogo mai i latou", ua fetalai mai ai le Alii. ²² O le gagana eseese o le faailoga mo e talitonu ae le mo i latou o e le talitonu. ²³ Afai la e o mai faatasi le ekalesia i se mafutaga ma latou tautatala uma i gagana eseese, afai ae i ai ni tagata ese ma nisi e le talitonu, e i'u ina latou faapea ane po ua leaga ulu o tagata o le ekalesia. ²⁴ Ae afai e perofeta ane uma outou ae ulufale mai se tagata ese ma se isi e le talitonu, e aiaina lona loto i mea uma o lo o faalogo atu i ai. E faamasinoina fo'i o ia mai le upu o lo o folafolaina mai. ²⁵ E faaalia mea lilo o lona loto. Mulimuli ane, e i'u ina faapau fao i ona foliga ma vivii atu i le Atua. E faapea ane o ia o lo o i ai le Atua ia te outou. ²⁶ O'u uso e, o le a la le mea a fai? A outou o mai e mafuta faatasi, ia taitoatasi ma lana pese, o se aoaoga, o se faaaliga, o se gagana eseese, po o se faaliliuga. Ia outou faia mea uma mo le atinaeina o le ekalesia. ²⁷ Afai e tautala se tasi i gagana eseese, ia faataga se toalua po o se toatolu ae auaua'i, ona i ai lea o se tasi na te faaliliuina. ²⁸ Ae afai e leai se tasi na te faaliliuina, ona taofia lea o i latou mai le tautala atu i le ekalesia i gagana eseese, a ia talanoa o ia ia te ia lava atoa ma le Atua. ²⁹ E mafai ona toalua pe toatolu perofeta e tautatala, ae faalogologo isi ma le Agaga ina ia iloa le uiga o mea lilo o lo o fai mai ai. ³⁰ Ae a i ai se faaaliga i se tasi o faalogologo, ona fifilemu lea o perofeta ae tuu le avanoa mo le na faalogologo o i ai se faaaliga. ³¹ A mafai e outou uma ona faaperofeta ane ona auaua'i lea, ina ia aoaoina i latou taitoatasi, ma faamalosia tagata uma. ³² O le agaga i perofeta ia faaaloalo i isi perofeta. ³³ O le Atua e le o se Atua e le mautonu, ae o le filemu. O le tulafono lena mo le au paia i totonu o ekalesia uma. ³⁴ E ao ina fifilemu fafine i totonu o ekalesia. E le faatagaina i latou e tautatala. Peita'i, e tatau ona usiusitai e pei ona fai mai ai le tulafono. ³⁵ A i ai se mea latou te fia malamalama ai, ia fesili i o latou ta'ito'alua i le fale, ona o se mea mataga le tautala o se fafine i totonu o le ekalesia. ³⁶ Na outou ta'uina mai le Upu a le Atua? Pe na'o outou lava na faalogo i ai?. ³⁷ Afai e manatu se tasi o ia o se perofeta pe faaleagaga, e ao ia te ia ona amanaia vaega ia ua ou tusi atu ai, ona o le faatonuga mai le Atua. ³⁸ Ae afai e le talia e se tasi mea nei, ia aua ne'i amanaia o ia. ³⁹ O lenei o'u uso e, ia outou nanau e perofeta ane, ae aua fo'i ne'i taofia se tasi mai le tautala i gagana eseese. ⁴⁰ A ia faaatulaga lelei le faatinoina o mea uma.