¹ Le au uso e, ou te le manao toute nofo le malamalama i meaalofa faaleagaga. ² Ua outou iloa a o outou nofo faapaupau, sa taitaina sese outou i tupua e le mafai ona tautatala mai, i le tele o auala na latou taitaiina ai outou. ³ O lenei, oute manao ia outou iloa, e leai se tasi e tautala mai le Agaga o le Atua ma faapea ane, "O Iesu o le malaia". E leai fo'i se tasi e fai ane "O Iesu o le Alii" se i vagana ua aumai le Agaga Paia. ⁴ E eseese meaalofa, ae tasi lava le Agaga e aumai ai. ⁵ E eseese ofisa ua valaauina ai, ae tasi lava le Alii e aumai ai, ⁶ ma e eseese foi ituaiga galuega ua totofiina ai, ae tasi lava le Atua o lo o galue i mea uma, i totonu o tagata uma lava. ⁷ Ua taitoatasi ona foaina atu i ai le mana o faailoga vaaia o mea mai le Agaga Paia, mo le manuia o tagata uma. ⁸ O le tasi ua foaina atu i ai le Upu o le Poto mai le Agaga, a o le tasi ua foaina atu i ai le Upu o le Malamalama mai le Agaga lava e tasi. ⁹ Ua foaina atu i le tasi le Faatuatua mai le Agaga, a ua foaina atu i le tasi meaalofa e faamalolo a'i ma'i e le Agaga. ¹⁰ Ua foaina atu e le Agaga i le tasi na te fai vavega, a o le tasi ua foaina atu i ai e le Agaga o le faaperofeta ane. Ua foaina atu i le tasi e le Agaga le mana na te mafaia ai ona ia iloa ma faaalia agaga lelei ma agaga leaga, a ua foaina atu i le tasi gagana eseese mai le Agaga, a o le tasi ua foaina atu i ai le faaliliuina o gagana ese mai le Agaga. ¹¹ O galuega uma nei a le Agaga lava e tasi, na te foaina atu meaalofa i tagata taitoatasi, e tusa ma lona lava finagalo. ¹² Aua e faapei o le tino ua tasi, ae tele ona itu tino, ae o sui uma i latou o le tino e tasi. E faapena fo'i ia Keriso, ¹³ Aua e tasi lava le Agaga na papatisoina ai uma i tatou ina ia tasi le tino, o se Iutaia po o se Eleni, o se pologa po o se saoloto, na faia lava ina ia tatou inu uma i le Agaga e tasi. ¹⁴ Aua o le tino e le o se itu tino e tasi ae peita'i o itu e tele. ¹⁵ Afai e fai mai le vae, "Ona e le o a'u o le lima, e le o a'u o se vaega o le tino", ae peita'i e le avea lea ma mea e manatu faatauvaa ai le vae, e le o ia o se vaega o le tino. ¹⁶ Ma afai fo'i e fai mai le taliga, "Ona e le o a'u o le mata, e le o a'u o se vaega o le tino" e le avea lea ma mea e manatu faatauvaa ai le taliga e le o ia o se vaega o le tino. ¹⁷ Afai o le tino atoa e na o le mata, e faapefea la ona faalogo?. Afai o le tino atoa e na o le taliga, e faapefea la ona sogisogi?. ¹⁸ Ae peita'i ua tofia e le Atua itu tino uma taitasi, o i latou uma taitoatasi, e avea ma vaega o le tino e tusa ma lona finagalo. ¹⁹ Afai la e tutusa uma itu tino nei, e faafefea la ona i ai se tino? ²⁰ O lenei o i latou uma o itu tino e tele, ae tasi lava le tino. ²¹ E le mafai ona fai atu le mata i le lima, "Ou te le manomia oe". E faapena fo'i ona le mafai e le ulu ona fai atu i le vae, "Ou te le manaomia oe". ²² Ae peita'i o itu tino o le tino e foliga mai e vaivai e matua taua lava. ²³ e faapea fo'i ma vaega o le tino tatou te manatu e faatauvaa, ia sili ona tatou ave i ai o la tatou faataua, e oo fo'i i itu tino uma e foliga mai e leai so latou taua, e sili atu lo latou aoga. ²⁴ O lenei e le o i ai se faafitauli i itu tino o lo o malolosi i le vaai. Ae ua pulea e le Atua o le tino, ma Ia faasilisli ona Ia ave atu o le faaataua i itu tino ua sili ona vaivai. ²⁵ Na ia faia lenei mea ina ia aua lava ne'i i i ai se fevaevaea'iga i totonu o le tino, a ia mafai e itu tino uma ona fetausia'i ma le alofa. ²⁶ Afai e tiga le itu tino e tasi, e tiga faatasi uma itu tino. Afai fo'i ae faaeaina se itu tino e tasi, e olioli faatasi uma itu tino. ²⁷ O lenei o outou o le tino o Keriso, o ona itu tino taitasi uma fo'i outou. ²⁸ Na totofiina e le Atua i lana ekalesia muamua o aposetolo, lua o perofeta, tolu o faiaoga, o i latou e fai vavega, ona sosoo lea ma meaalofa faamalolo ma'i, o i latou e tuuina atu le fesoasoani, o i latou e fuafuaina ma faatinoina le faia o galuega, faapea ma i latou e i ai le meaalofa o le tautala i gagana eseese. ²⁹ O i latou uma ea o Aposetolo? O i latou uma ea o faiaoga? O i latou uma ea e fai vavega. ³⁰ O i latou uma ea e i ai le meaalofa o le faamalolo ma'i? O i latou uma ea e tautatala i gagana eseese? O i latou uma ea e faaliliu i gagana ese? ³¹ Ia sili ona outou naunau e saili meaalofa sili, ae peita'i o lenei, oute faailoa atu ia te outou le auala e silisili.