¹ Mu'dip De' Ma'dieng Dalem Kristus Bue le o'bEn nai betie' ngEn Kristus, mEto ne je' saha empau duhue' Kristus un, ma'dong saha ta'u Allah. ² FehEmet ne fozEn de' kempau te, ento efozEn-fozEn de' tusun tane' ji. ³ O'bEn ne Eham lepek matei ngEn mu'dip cue' senuok ngEn Kristus dalem Allah. ⁴ O'bEn Kristus je' mu'dip ba'da oso e, Eham co du he ba'da dalem fenE'a femuong ngEn Ezo. ⁵ Ho'en mEhE, Eham matEi ne fozEn de' sen tusun tane' ji, di'i e heluyie', hencameng, venesep, vengobe' de' ja'et, mu'dip temue' ngEn tunok te je' deravang Tuhan. ⁶ De' mihi ne de' ozEn haie' Allah henai. ⁷ Ce tau re Eham co obEn peza'gen ne tasa mu'dip dalem me'e re. ⁸ Ba'en ne mihi pet ne E'dE muong: busie', fa'dEn, ja'et hEmet, peja'et, ngEn helaii jameng, pet ne muong de' te 'pa kam. ⁹ Enteng selap paha tEnget jo kam o'bEn maong kelonEn fu'un cam ngEn fozEn-fozEn fu'un cam. ¹⁰ HanEn ne u'dip ma'dieng, de' fenco ngema'dieng e dalem fenEsen, pehesiu, ngEn hempun de' o'bEn ozEn ilu. ¹¹ Dalem de' mihi, ta'un tene helonEn Yunani ngEn helonEn Yahudi, helonEn de' du sunat ngEn de' ta'un sunat, helonEn barban ngEn helonEn Skit, hole', ngEn helonEn de' nyaie', jo Kristus un dalem muong-muong do. Mu'dip de Ma'dieng ngEn Du Muong ¹² Ba'en ne ilu helonEn pilie' Allah, de' buie' ngEn de' ezo lesau, baliu kam un kelesau ngEn selama, ngEn lEbe' hEmet, ngEn memut dau, ngEn dene' tavai. ¹³ Fero'ei ne kam co ngEn co, ngEn nyelavEn ngempuie' ne cam jo bue atek un le de' sale' te cam. Have' ngEn Tuhan o'bEn ngempuie' Eham, Eham co'o hobe' ngempuie'. ¹⁴ Tusun muong de' un pengelesau, de' ozEn beko de' tE'a. ¹⁵ Baliu fenyaie' sen Kristus mezang hEmet kam ho'en ne mEhE du nepai Eham co le oso ngEn fenE'a ¹⁶ Baliu isiu Kristus paong dalem ihue' ngEn sangEn, ngEn muong fenEsen kam pehalai ru ngEn pehatok co ngEn co, ngEn ngetau mazmur, silun-silun tenganie' ngEn hentau-hentau rohani, muong e ngEn sangEn kuen ne penyaie' tavai dalem hEmet cam maha Allah. ¹⁷ Inu ve de' kam ozEn dalem isiu kam, ngEn fozEn cam, peza'gen ne EdE ngEn nga'dEn Tuhan Yesus, mentong kuen ne penyaie' tavai maha Allah Amai, sen ezo. Mu'dip de' Ma'dieng dalem Fengelamin ¹⁸ Leto-leto, tunok le te lahi kam mumpin jeto de' lEn ne dalem Tuhan. ¹⁹ Lahi-lahi, lesau le leto kam enteng ozEn de' ja'et te E'o. ²⁰ Anak-anak, baze' dau to'o kam dalem muong je' muong jo de' mEhE fesaie' hEmet Tuhan. ²¹ Pui lahi, enteng ne ozEn je' duhue' anak kam busie' ta'un tai felet hempangen. ²² Hole'-hole', baze' dau toEn-toEn cam de' un tusun tane ji dalem muong je' emuong. Ento ho'en do na'et disie' kam ngEn afEn do saie' disie' kam atek lEn ne ngEn tE'a hEmet ngEn tahut te Tuhan. ²³ Inu le de' kam ozEn, ozEn ne ngEn lEn le hEmet cam kue ba'en maha Tuhan ngEn ento e maha helonEn, ²⁴ o'bEn ne kam tEsen bue sen Tuhan Eham ke ala tolEt seleket tonang kam. Kristus Tuhan ne de' kam le feto'bo. ²⁵ O'bEn ne helonEn de ozEn je' sale he ala seva penyale' de' o'bEn zo ozEn ngEn ta'un un de' du nyerepie'.