¹ Пенав и истина андо Христа, нана хохавав, тай ми съвест свидетелствинел манца андо Свято Духос, ² кай иси ман бари скръб тай непрестанно мъка ан ме сърцесте. ³ Соскето мангав коркоро ме те овав отлъчиме таро Христа ашал мере праленге, мере ки плът ендания, ⁴ колато си израилания, коленге принадлежинел о осиновение тай и слава, о завети тай о даване е закониескоро, о богослужение тай о обещания, ⁵ каскере си о отцидес , тай колендар бияндило ки плът о Христос, Ковато си упрал саворенде Дел, благословиме жи ко векос. Амин. ⁶ Обаче давка нана значинел, кай пропело о Божие слово. Соскето ма саворе колато проиклон таро Израил си Израил, ⁷ нито си саворе чада, понеже си Авраамово потомство; но " андо Исаак" пенгяс о Дел: " ка наименувинел пес торо потомство." ⁸ Значи, ма о чада, биянде ки плът, си Божия чада; но о чада, биянде според о обещание, считинен пес потомствоске. ⁹ Соскето давка уло варесо обещиме, понеже пенгяс: " Ка авав по давка време, тай е Сара ка овел чаво". ¹⁰ Тай ма само давка, но като и Ревека заченингяс иекестар- амаре отециестар о Исаак, ¹¹ макар кай о близнакия нана уле още биянде тай нана кердесас още варесо лачо или канило, ов, за те почивинел о Божие ко избори намерение, ма ко деловя, но Колкеске, Ковато призовинел, ¹² пенгяс пес лаке: " О по-баро ка слугувинел е по-цикнеске"; ¹³ сарто си пишиме: " Е Яковес възлюбингиом, а е Исавес намразингиом." ¹⁴ Тай чука, со? Те пенас ли, кай иси неправда андо Дел? Да не бъде! ¹⁵ Соскето пенел е Мойсейеске: '' Ка покажинав милост, карик касте ка покажинав, тай ка пожалинав, кас ка пожалинав.'' ¹⁶ Тай чука, нана зависинел калкестар, ковато мангел, нито калкестар, ковато прастал, а таро Дел, Ковато покажинел милост. ¹⁷ Соскето о Писание пенел е Фараониеске: " Именно далкеске ваздингиом тут, за те покажинав анде тут Ми сила тай те шуниол Мо алав ко цело светос". ¹⁸ Тай чука, карик касте мангел , Ов покажинел милост, тай кас мангел- закоравинел. ¹⁹ Далкесте ту ка пенес: А соске още обвининел? Кой ащи противостоинел ки воля Леске? ²⁰ Но, о, човече, ту кова синян, кай отговоринес против о Дел? О кердо варесо ка пенел ли колкеске, ковато кергяс лес: Соске чука кергян ман? ²¹ Или е грънчариес нанай власт упрал и глина, частяса тари също буца те керел съдос за почит, а авере частяса - съдос за непочтеноне употребаке? ²² Тай со ка пенас, ако о Дел при все, кай манглас те покажинел По гневи тай те изявинел Пи сила, пак понасинелас баре дълготърпениеса о съдовя, предметя Пе гневиеске, приготвиме за погубване, ²³ тай търпингяс, за те изявинел о барвалипе Пе славакоро упрал о съдовя, предметя Пе милостяке, колато приготвингяс отанглал за славаке - ²⁴ упрал аменде, колен призовингяс, ма само машкар о юдея, но машкар о езичникия? ²⁵ Сарто анди Осия пенел: " Ка наречинав Моро народос колкен, колато нана уле Моро народос, тай възлюбенона- колка, която нана сине възлюбено". ²⁶ "Тай ко също тан, кате пенел пес ленге:'' Нана синиен Моро народос, оте ка наречинен пес чада е живде Девлеске". ²⁷ А Исая пищинел е Израилеске: " Ако те овел о число е израиленгоро сар и морско поши, само остатъки лендар ка спасинел пес; ²⁸ соскето о Дел ка изпълнинел ки пув о пендо ки правда Лестар'', като извършинел лес тай свършинел сиго . ²⁹ Тай сарто о Исая пенгяс ко по-предишно тан: " Ако о Дел е силенгоро нана мукелас аменге потомство, сар о Содом ка ачовас тай на Гомор ка оприличинас амен". ³⁰ Тай чука, со те пенас? Давка, кай о езичникия, колато нана роденас правда, получинде правда, тай то правда, която си чрез вяра; ³¹ а о Израил, ковато роделас закони за те придобинел правда, нана ресло жи салке закониесте. ³² Соске? Далкеске, кай нана родел лес чрез и вяра, а десар си чрез о дела. Он препънисале ко Бар, за препъване; ³³ сарто си пишиме: " Аке, положинав андо Сион бар, анде колесте те препънинен пес, тай канара, анде колате те съблазнинен пес; тай ковато верувинел анде Лесте, нанай те лажавкярел пес".