¹ Пралален, моро сърдечно желание тай ми молба карик о Дел си за о спасение е Израилескоро. ² Соскето свидетелствинав за ленге, кай лен иси ревност за е Девлеске, само че нанай според о пердо знание. ³ Понеже, сарто нана жанен и правда, която си таро Дел, тай манген те поставинен пери, он нана покорисале е правдаке таро Дел. ⁴ Понеже о Христос изпълнинел и цел е закониескири, те оправдинел пес секой, ковато верувинел. ⁵ Соскето о Мойсей пишинел, кай о мануш, ковато керел и правда, която си чрез о пазиба е закониескоро, ка живинел чрез лате. ⁶ А и правда, която си чрез вяра, хоратинел чука: " Тена пенес ан те сърцесте: Кой ка възкачинел пес ко небес, демек, те ухлавел Христа? ⁷ или : Кой ка ухлел анди бездна, демек, те икалел Христа таро муле?" ⁸ Но со пенел ой? Пенел, кай, " о словос си паше жи туте, анде те мосте тай ан те сърцесте", демек, о слово е вяракоро, ковато проповединас. ⁹ Соскето ако изповединес те моса, кай о Исус си Дел, тай повервинес те сърцеса, кай о Дел възкресингяс Лес таро муле, ка спасинес тут. ¹⁰ Соскето сърцеса о мануш верувинел тай оправдинел пес, тай моса керел изповед тай спасинел пес. ¹¹ Соскето о Писание пенел: " Никой, ковато верувинел анде Лесте, нанай те посрамингьол". ¹² Понеже нанай разлика машкар юдеиесте тай гръкосте, соскето о също Дел си Дел саворенге, барвало карик саворенде, колато призовинен Лес. ¹³ Соскето, " секой, ковато призовинел е Девлескоро алав, ка спасинел пес". ¹⁴ Но, сар ка призовинен Калкес, анде Колесте нана повервинде? Тай сар ка повервинен анде Калкесте, за Колеске нана шунде? А сар ка шунен би проповедникиескоро? ¹⁵ Тай сар ка проповединен, ако нанай бичалде? Сарто си пишиме: " Кити си прекрасна о пире калкенгере, колато благовестинен о лачипе!". ¹⁶ Но ма саворе шунде о благовестие; соскето о Исая пенел: " Господи, кова амендар повервингяс колкесте, ковато шунгям"? ¹⁷ Тай чука, о верувиба си таро шуниба, а о шуниба - таро Христово словос. ¹⁸ Но пенав: Он нана шунде ли? Наистина шунде: " Ки цело пув иклило ленгоро гласос, тай ленгере думес- жико краища е вселенаке". ¹⁹ Но пак пенав: О Израил нана ахалило ли? Ахалило, соскето първо о Мойсей пенел: " Ме ка раздразнинав тумен жи ко ревнувиба калкенца, колато нанай народос; несмисленоне народоса ка разгневинав тумен". ²⁰ А о Исая смело те пенел: " Аракло улом колкендар, колато нана роденас Ман; явно ачилом колкенге, колато на пученас Манге"; ²¹ а е Израилеске пенел: " Простиринавас Ме васта цело диес карик народосте непокорно тай упорито".