¹ Впрочем, пралален, мере, лошанен андо Дел. Манге нанай досадно те пишинав туменге са също, ов тумен предпазинел. ² Пазинен тумен таро безнравствена учителя*, пазинен тумен таро зла работникия, пазинен тумен таро хохавно обрязване*, ³ соскето аме синям о обрежиме, колато е Божие Духоса кланинас амен тай хвалинас амен е Христаса е Исусеса, тай нана уповинас амен е плътяке. ⁴ При все кай ме ащи е плътякеда те уповинав ман. Ако декой авер мислинел, кай ащи уповинел пес е плътяке , то ме още по бут, ⁵ като овав обрежиме ко осмо диес, таро Израилево роди, таро Вениаминово племес, евреини таро евреи, ко закони фарисей, ⁶ ки ревност гонители е кангерякоро, ки правда, която си таро закони- непорочно. ⁷ Но давка, ковато сине манге придобивка, сар загуба счетингиом лес ашал о Христа. ⁸ А още всичко считинав сар загуба ашал далке превъзходноне варесоске - о познаване мере Девлескоро о Исус Христос, за Колеске нашалгиом всичко тай считинав всичко за измет, само е Христас те придобинав, ⁹ тай те аракловав анде Лесте, без те овел ман за мере правдаке койка, която си таро закони, а койка, която си чрез и вяра андо Христа, демек, и правда която си таро Дел въз основа е вяраке, ¹⁰ за те пенджарав Лес, и сила Лескере възкресениескири тай о общение андо споделиба Лескере страданиескере, като ачовав уподобиме Лесте андо Мериба Леске, ¹¹ тай дано десар те ресав о възкресение е муленгоро. ¹² Ма кай сполучингиом вече, или кай ачилом вече съвършено; но гонинав, дано уловинав давка, за колеске меда улом уловиме таро Христа Исуса. ¹³ Пралален, ме на считинав, кай вече уловингиом лес, но иек керав - като бистрав со си палал манде тай стреминаман силно карик далкесте, ковато си англал манде, ¹⁴ мукаман карик и прицелно точка за е наградаке е Божие мере упрал призваниеске андо Христа Исуса. ¹⁵ Тай чука, аме, колато синям зрела, нека мислинас чука; тай ако мислинен туме варесо аверяче, о Дел ка откринел туменге лесда. ¹⁶ Само нека иси амен правилоске те живинас според далкесте, анде колесте реслам тай о също те мислинас. ¹⁷ Пралален, подражинен манге тай дикен калкен, колато живинен чука, сарто аме диням тумен примери. ¹⁸ Соскето мнозина, за коленге бут дром пенгиом туменге, а акана роибнаса пенав туменге, живинен сар враговя ко Христово кръстос; ¹⁹ коленгири сетнина си погибел, каскоро дел си о воги тай каскоро хваление си давка, ковато си лажакоро, колато отден пе гогя е пувякере букиенге. ²⁰ Соскето амаро гражданство си ко небеса, катар жанас Спасителес, е Девлес о Исус Христос, ²¹ Ковато чрез и сила, коласа покоринел всичко Песа, ка преобразинел амаро унижиме телос, за те ачол съобразно Лескере славноне телоса.