¹ Jeso mata tumuwa ku mupupo omuchena kwanda mu linkanda kuka lyu kuwa koku Satani. ² Pukali kulyi yi mina zulyuwa shi mayiba ama shumi anee indi masuku anee, matafwa injara. ³ Muliki akuya kukye akuya ku mutyeya atikya,'' Ati umwana Urezya, zira mawee ngapani ngabe ichira.'' ⁴ Cware Jeso aku muyaru muna atikya, ''shukuru kunwara, muyeyi muqhu kupara ichira chekye kono indi mayi inga tidzwa mu muromo Urezya.''' ⁵ Nduku tikya Satani aku mutwera mu murenenyi wo muchena kuma menisizi ama yuwo, Aku tikya kukye, '' ⁶ Ati umwana Urezya, uwulye peshi, shuku tikya kwata noruwa atikya, mbwazire manyiroyi akye aku baba lyere.'' Indi kutikya mbonga ku kakwire mwilyiro sha manja atikya makondo aye ngasiye kuli zipa pu mawee.''' ⁷ Jeso aku tikya kukye, '' nangweza siya kwi xyaba Shikati Urezya aye.'' ⁸ Nangweza satani aku mutwara pwi kakumuko yindee kamwiqe kowo muwuso ulyivu indi wuqa wawo. ⁹ Aku tikya, ''kozo zopani izuto izinamo ndati kupazo, ati nduwulye peshi ku ndirapera.'' ¹⁰ Ku dzwapo Jeso aku tikya kukye.'' dzwa ukwenda kuna shire, Satani! Shiku tikya ku nwara, atikya ukubamere Shikati Urezya aye. ¹¹ Mi satani aku musiya, numwene, manyiroyi ngakuya ku muyaka. ¹² Papa ngaho Jeso pukaru kuyuvwa atikya Johani kali mapatuwa, akudzwa Galileya. ¹³ Akudzwa Nazareta kwenda aka sikama mo Kapenauna, lyina kurupati lyi lyiwate ilya Galileya mumuwuso iwa Zebbulani indi Naphatani. ¹⁴ Chopani ndi shata rasisini ku yiziriza shi porofita sha Isaya shamata hweta. ¹⁵ Lyuvu ilya Zebuluni indi lyuvu ilya Naphatani, shufupi ni lyi wate ku wuso wa Jodani, Galileya iba machaba. ¹⁶ Abato ibata sikama muka rema bata mwana rumwenyi rorukuru, indi barasise muzi baka indi minzire yu rufu kwaku zukuka rumwenyi pumaso awo'' ¹⁷ Mukakanda kapa Jeso aku xhitika kwenda ku kutaza, ''Nibakye muwuso ulyiro kali waya shufipi.'' ¹⁸ Pukaru kwenda ku lyuwate lya Galileya, aku mwana banyina babiri, Simone ikaru ku beruwa Pitorosi, indi Andiriasi muzatakye, baru kutyeya kanyandi mulyu wate, papa kali bazyambizi. ¹⁹ Jeso aku tikya kuwo, ''Nakuya, nindi qama, yeme mbondini pange bazyambizi ibati yamba bayeyi. ²⁰ Shuku pweraka baku siya tunyandi twawo baku muqama. ²¹ Pu Jeso kali kushera shera aku mwana barwa babiri, Jakowo mwana Zebediya, indi Johani muzatakye. Barana muwoto indi Zebediya shawo karuku tandaura kanyandi. Aku babera, ²² Shuku yangasa bakusiya uwoto indi shawo baku mwiqama. ²³ Jeso akwenda lyuvu kolyo ilya Galileya, kwenda ku ruta mi minzi indi mumaraperero, kuruta lyiyi lyu muwuso indi ku pwelisa matuku-tuku ngama chichana-chichana indi mimashiro mwikyo lya bayeyi. ²⁴ Imbuzakye ya kuyira yira lyuvu lya Siriya, bayeyi baku lyeta kukye kowo ibarana muwuzuwo wa matuku-tuku indi ku masiza, indi barana mi pupo yemibbi ya madimona, iabruku kukutira indi kugogobera. Jeso akuba pwelisa. ²⁵ Uwunji wa bayeyi baku mwi qama kudzwa ku Galileya, Dekapolisi, Jerusarema indi Judeya indiko kyo lya Judeya.