¹ Pu Jeso karu ku mwana bayeyi babenji, aku kakuka pu lyi rundu. Pwamata kasikama, barutiwa bakye bakuya kukye. ² Aku yashama kuba zira, atikya, '' ³ Bana maso ibana peshi mu mupupo, kakuli shichawo muwuso ilyiro. ⁴ Bana maso ibati fwerwa, inkaba katotuzwa. ⁵ Bana maso babawa zidziba, kakuli inkya ba kapewe lyuvu. ⁶ Bana maso babafu injara indi lyinata shukuchena, kakuli shaba puwe zukulya. ⁷ Bana maso ibana kaxumakawo kakuli shiba kara xumuwa. ⁸ Bana maso wi mitima yemi chena, kakuli inkya baka mwene Urezya. ⁹ Bana maso ibati pwelisa wubbi, kakuli inkya baberuwe abana wuRezya. ¹⁰ Bana maso ibati shisizwa wuqa kakuli lyiiro indyawo. ¹¹ Maso ingu muyeyi yamati shandisuwa indi tukuwa indi ku hweta kukye izuto zezibbi zimbuzi shilyi baka lyanga. ¹² Ni radze na nyina, shanika tswupuwe shukuru mu lyiiro. Yopa injira yati fwana bayeyi bata shandisa ba porofita bata para indanzi kunwe. ¹³ Nwee ndu nchwanga ulyivu. Ati unchwanga kali muqu munati, ingahare utyeri kwisi atikya abe unchwanga nangweza? Inkya kafwa ngweza kuba naqa kwi chuto kocho tana kumwikyi ngaho muma kondo abato balyatire pakye. ¹⁴ Nwee ndu nchwanga ulyivu. Munzi wa pulirundu kuku yukuwu zika. ¹⁵ Kuqu muyeyi yuku mwenika i rambi ndukuyi cheka rukumbu, tana kuyi bika pukankandara, atikya bayeyi kowo bayi mwene mwi njuwo. ¹⁶ Ni siya rumwenyi rwanu rumwenishire bayeyi mwi njira yopa bamwene zisi zenu zeziqa mi indi ku kambira Sheenu ya mu lyiiro. ¹⁷ Kanaka yanakana atikya ndataya ku manisa mirawo indi ba porofita. Yemwe ama ndiye kuku zimanisa, kono kuya kuziyi ziriza. ¹⁸ Ndatini zira nanyina atikya lyivu indi lyiiro inkya zimane, tindi muxiki ushawu maniswa ku mirawo, tana izuto kozo ishaza kwi sisini. ¹⁹ Sha zopa kwekye yushu vunja murawo muxiki womuche nanyina indi kwiqe akyopa babamwe ankya beruwe yomudana mu muwuso ilyiiro. Kono yushu yibika kapa kwaha yivunja indi ku yiqe shaberuwe yomukuru mu muwuso akwi lyiiro. ²⁰ Ndati ku kweshira atikya zisi zenu zeziqa nakana pusheku bbara zisi zeziqa zaba noli indi ba Falisi, kamuni shani njene mwi njendiso ilyiiro. ²¹ Nata yuvwa atikya kwata sumushira katanzi, ''Siya ku bbura,' Kwekye ya mati bbura shabe muwuzuwo wukuya turuwa.' ²² Kono ndati nityeya atikya kwekye ngaho yamati menjira mukwakye shabe mu wuzuwo wuku yaturuwa; hape kwekye yamati tyeya mukwakye atikya, paqu shumutu yewe!' ana muwuzuwo niba yendisi; hape kwekye yama tikya, 'Umugigi!' ana mu wuzuwo wumunduro mu lyihere. ²³ Ndaku tikya ati matipa ipo aye pwi alutare indi ku yanakana atikya kuna mukwe yana sheshibbi nawe, ²⁴ Siya ipo aye puwuso wi alutare, mi ukwenda injira aye. Piri uka shusize mutima nakye, nduka shuka kuya kutsipa. ²⁵ Upwerakye kayu vana puni shina paxiki mwi njira kwenda kushu kwata, ati shire kwaha kutwara kuba malinda zikanga, malinda zikanga takupa kumuyendisi, tukali shangana mabikuwa mwi torongo. ²⁶ Ndati ku kweshira atikya, umuqu kudzwa moo nakana ishuku mana ku shara marwapa kongo ngu murandu aye. ²⁷ Mayuvu atikya kwata hwetuwa, 'Siya ku shanganwa ni mukazi yahali unjwa.' ²⁸ Kono ndati nizira atikya yamati lyaya mukazi shuku mushashira mu moyo kali mashangana nakye mu moyo. ²⁹ Ati ilyisho lywe lya makhamu lyati ku lyetiza wuzuwo, lyikusamo ulyikyi shire nawee. Mi ku shiyama atikya shirama shixiki pumumbiri aye shishinyehe kufitera mumbiri kowo wura kiwa mu lyi here. ³⁰ Ati lyanja lywe lyamankhamu lyati ku kataza lyi tsurako indi kulyiki shire nawee. Mi ku shiyama atikya shirama shixiki pu mumbiri aye shishinyehe ku bbara mu mbiri aye kowo wu yendye mulyi bbimbiro. ³¹ Kwata hwetuwa hape atikya, yamat tsukana ni mukazakye, amupe lyunoro limu tsukana.' ³² Kono ndatikya kunwe kwekye yamati tsukana ni mukazakye, ati kazuwu shashi, mati mupangisa wu shashi. Kweekye yushuka murowura mulyuqo mati ka mupangisa wu shashi. ³³ Hape, nata yuvwa atikya kwata hwetuwa kuba kulyiqo, 'Siya ku kwaka shimbuzi, kono uhwetye ngaho injahamu ku Shikati.' ³⁴ Kono ndatikya kunwe, siya ku kwaka nanga kaxenine, nanga ishi lyiiro shuku tikya masuso Urezya; ³⁵ Nanga ishi lyiiro, kakuli ndima lyaturo akye, kapa sha Jerusalema, kakuli ndumunzi aShikati mukandu. ³⁶ Siya kukwaka shumushoro, shuku tikya amu ku kwana ku hwesa nanga rushishi kapa kusipisa ruxiki. ³⁷ Kono shihweta chee 'I eye, eye; kapa Aaa, aa; kocho shoshu kuru kubbara chopanishatidzwa kuyo mubbi ngaho. ³⁸ Nata yuvwa atikya kwata hwetuwa atikya, 'Ilyisho ni lyisho, indi lyino ni lyino.' ³⁹ Kono ndatikya kunwe, Nisiye ku shitira yo mubbi kwekye. Yamati kwizipa kulipama lywe lya makhamu, zoromuka rupati urumwe. ⁴⁰ Ati kuna yamati shaka ku kuzekisa kapa ku yisa ubbaki aye, umupye indu ukawuso aye. ⁴¹ Kwekye ya mati ku hambereza atikya umu sindi kize shibaka, umusindi kize nanyina. ⁴² Upe kwekye yamati ku rwamba, hape usiye kwahara kyekye yamati shaka ku kalima ichuto kuwe. ⁴³ Nata yuvwa atikya kwata hwetuwa, 'Nishakye ibana puru pati rwenu indi ku twaya yina hati rumarana nakye. ⁴⁴ 'Kono ndatikya kunwee, ni shakye zira zenu indi ku raperera ibati ni shandisa. ⁴⁵ Nduku tikya niraqho abana ba shenu ya mulyiiro. Kakuli matidzisiza liba lyekye bababbi indi babaqa, ndiku tumina ivura akye baba shiyama indi bahali bashiyama. ⁴⁶ Ati mati suna ngaho ibaku suna, shikya mati shanganapo? Nanga iba tyelisa zizuto zati fwana barasi? ⁴⁷ Ati nikoti tambusa ngaho bakwe, shikya matisi kubbara babamwe? Tananga iwu lyivu bati kwana ku zisi? ⁴⁸ Cware hee nibe baba shiyama, tandi shenu ya kwi lyiiro shali mushiyama.