¹ Muma yiba a Johani Mukorobezi akuya ku kutaza mwi shumwe a Judeya aku tikya, ² ''Ni bakye, shuku tikya mu wuso wulyiro wuna shufupi.'' ³ Ndishata hwetuwa ku muporofita Isaya, aku tikya, lyiyi lyi xiki ilyata shupura mwishumwe, 'Ni shiyamise injira a Shikati, ni ware makituro akye''' ⁴ Johani pani aku rara ziraro zata tswumuwa pu waya wi mbongolo indi mutsunga ukakabi mushuwuno. Zu lyuwa zakye kali imba nqesi indi zi nyishi. ⁵ Cware Jerusalema, indi Judeya koyo indi raro kozo kuzungura murwanga a Jodani baku dzwara kukye. ⁶ Baku korobezwa kukye mu murwanga a Jodeni, ku bashera zibe zawo. ⁷ Kono pukaru ku mwana uwinji wa Bafalisi indiba Saduki batiya kukye kuku korobezwa, aku tikya, ''Nwee abana wu zubbobbuma iyani imani ziri zuku tiya ku ywapa ku menga ikwa tiya. ⁸ Ni bikye zi pata iza tiqe ku baka. ⁹ Nisiye ku yanakana zu ku hweta mwikyo lyenu, 'Tina Abburahama shetu.' Zi ndani ziri atikya Urezya mati kwana ku tambusa abana ba Abburahama ku dzelyira pumawee ngapani. ¹⁰ Kembe kabika kare pu zizi zu muti. Ku tikya kowo muti iwa hati bika zipata zeziqa wu shawirwe peshi nduwi kyamina mu munduro. ¹¹ Ndani korobeza shuka baka. Kono ya matiya mulyuqo una iqumu kundi bbara, ama ndaku kwana nanga ku yisa zi shangu zakye. ndiyi shaya kuni korobeza shumupupo wo muchena indi munduro. ¹² Lyutundu yakye lina mulyanja lyakye kuvuura muyungu indi ku shanganisa zuvuma mushixandi. Ndisha ku pisa muyungu shumunduro wa hati mana.'' ¹³ Cware Jeso aku dzwa ko Galileya kwenda ku murwanga Jodani kuka korobeza ku Johani. ¹⁴ Kono Johani aku lyika ku muyimika aku tikya ''ndati shaka ku korobezwa kuwe, hape yewe, ndukuya kumye?'' ¹⁵ Jeso aku muzwara aku tikya, nditi shira papani, ku shiyama ku yiziriza kozo zezi chena. ''Cware Johani aku muti shira. ¹⁶ Pukaru kumana ku mukorobeza, Jeso aku pwera ku kakumuka ku dzwa mwami, mi lyiro lyaku muyazu shira. Aku mwana mupupo Urezya wa tiya peshi tandi ukyiri wa kuya ku sikama pwi lyiro lyakye. ¹⁷ Ni mwene, lyiyi lya ku dzwa kwi lyiro lya tikya, ''Yopa ndi mwananga indati shaka. Indati dze shakye.''