¹ Kudzwa pu Jeso karu ku pakuwa mo Betelehema iya Judeya mumayiba aShikati Heroda, Barwa baba tsauka kudzwa ku wudzero bakuya mo Jelusareme ba kutikya, '' ² Ikure ana Shikati a ma Juda yamata pakuwa? Tata mwana zinyata kozo kuwudzero mi taya kuku murapera.'' ³ Shikati Heroda pukaru kuyuywa akyo, zaku mwiguni, indi Jelusarema nakye. ⁴ Heroda aku lyeta kowo ma purisita ba bakuru indi banoli wa bayeyi, akuba wuza, ''Ikure ana Keresite ya mapakuwa?'' ⁵ Baku tikya kukye, '' Mo Beterehema iya Judeya, zopani ndizata noruwa kuba porofita, ⁶ 'Cware yewe; Beterehema, mu muvu a Juda, ka mwikyo lyenu ba yendisi ba Juda, kamo kunwe isha mudzwa muyendisi aba yeyi ba Isiraere.'' ⁷ Cware Heroda kurupati aku bera baba barwa sauka kuya kuba wuza atikya kakanda kare i nyata ya mwanahara. ⁸ Akuba tuma ko Beterehema, atikya, ''Nakwenda nika lyaye-lyaye naqa mupundi. Punaka mushangana, nika lyetye lyiyi atikya indimye ndiye ku murapera.'' ⁹ Pubaru mana ku yuvwa shikati, baka kyita injira awo, mi inyata ibata mwana muwu dzero yakwenda puwuso wawo tana kuya ku yima papa pumupundi karana. ¹⁰ Pubaru ku mwana inyata, bakwidze nanyina. ¹¹ Ba kwenda mwi njuwo ka mwana mupundi indi Maria nyina. Ba kuwa peshi indi ku murapera. Ba kuputurura mi kwatana indi ku mutsipa zi tsipa zi gawuda, indi zati nuka nanyina. ¹² Urezya akuba Chikisa mwi toro awo ku shuka ku Heroda, baku kawu hana ka kyita kumavu awo shizi njira zawo. ¹³ Pubaru kakyita, linyiroi lya shikati lyaku mwanahara ku Josefa mwi toro lyaku tikya, ''Tambuka, yisa mupundi indi nyina, mi utire ko Egepita. Uka sikame koo tana pushanda kuku zira, kakuli Heroda shashakye mupundi atikya amu bbure.'' ¹⁴ Masuku maxiki Josefa aku yisa mupundi indi nyina baka kyita ko Egepita. ¹⁵ Aka sikama koo tana rufu rwa Heroda. Zopa ku yiziriza shi Shikati amata hweta sha ba porofita, ''Kudzwa mo Egepita ndata bera mwananga.'' ¹⁶ Cware Heroda, pukaru ku mwana atikya mapanguwa wubbi kubarwa baba sauka, akwixa nanyina. Aku tuma atikya ku bburuwe kowo bapundi baba nyina mo Beterehema indi zibaka kozo ibana zu mwaka zimbiri, shukwenda shika kanda kubata muzilira barwa baba sauka. ¹⁷ Kwaru ku yizirizwa ishata hwetuwa ku muporofita Jeremia, ¹⁸ ''Lyiyi lyata yuvwahara mo Rama, ku lira shulyuro sheshi kuru, Rahere aku lira abana bakye, aku shita kutotuzwa, shuku tikya bamana.'' ¹⁹ Pu Heroda kali kufwa, nimwene, linyiroi lyaShikati lyaku mwanahara ku Josefa kuturo mo Egepita lya ku tikya, ²⁰ ''Tambuka mi uyise mupundi indi nyina nakwenda kulyuvu lya Isiraere, shuku tikya ibaru ku shaka kuyisa wuparo wu upundi kali bafu.'' ²¹ Josefa aku tambuka, aku yisa mupundi indi banyina, ba kwenda kulyuvu lya Isiraere. ²² Kono pukaru kuyuvwa atikya Arkelausi kali mati para mo Judeya mushi baka sha shee Heroda, aku ywapa kwenda koo. Kudzwa pu Rezya kali ku mukalimera mwi toro, aku siya shibaka sha Galileya. ²³ Aka kyita kuka para mumurenenyi Nazareta. Yopani ku yizireza ishata hwetuwa shaba porofita, atikya isha bweruwe mu Nazarena.