¹ Shitu kuruho Keresite matati ruku rura. Niyimi shuku gipa, cwarehe, nangweza nisiye ku bikuwa mwi lyi njendiso ujokwe uwu vuya. ² Nilyaye, Mye, Paulusi, ndatikya kunwe ati natili bika nwabyenwe mu mupato, Keresite ku njemwa shaku shangana kunwe mwi njira koyo. ³ Ndani zira nagweza kwekye murwa ikakuli tishira ku njena mu mupato nduku tikya ara qama mirawo koyo. ⁴ Natsuruwa ku Keresite, yenwe ishani cheniswa shu murawo; kanishiba namano ushi shemo. ⁵ Shumupupo, i Tumero, tatini tyeya atikya ni lyindire i sepo ichena. ⁶ Moku Jeso Keresite kapa unju mupato hali kanju mupato ku njena shiyati toroka, kono itumero ngaho yati sebeza shuru suno. ⁷ Naru kutiya naqa. I yani mata ni kusa ku kwi qama injahamu? ⁸ ku susuweza kopa ama kwakudzwa ku kyee yamata ni bera! ⁹ Mu mena wo muche wati kwana ku zimbisa mi kamu. ¹⁰ Ndati tishira nanyina ku Shikati atikya ni siye kuyisa mu lyairo wuwumo. Yamani guni mbwa life muramdu, kapa iyani. ¹¹ Bakwanga, ati ndishi hweta zu mupato, shikya pundi shi shandiswa? Mwi zuto izaru kundi chiya ku shifapano zata gusuwa. ¹² Tandi ku bapa ibani guni, Ndaru ku shaka atikya bali tsure wa byenwe! ¹³ Yenwe nata beruwa kwi tukuruho, bakwanga. Kono siye kwisi kawo kuruku ruha kwenu atikya ibe injira iyi wubbi; ibe, shuru suno kuyaka yuyumwe. ¹⁴ Mirawo koyo yati yiziruzwa mu murawo muxiki: ''Shaka mukwe tandi shimatili shaka.'' ¹⁵ Kono ati natili rumata mi indi kuli yimina, nilyaye kwinje atikya kaniba kuba bamwe. ¹⁶ Kono ndatikya, niyendye shumupupo mi kamuni ni yise zitakazo zi shibe. ¹⁷ Shuku tikya zitakazo zi shibe zati rwenisa mupupo, mi zitakazo zu mupupo zati rwenisa mimbiri yi shibe. Zopani zatili rwenisa, atikya nisiye kwisi izuto zinati shaka. ¹⁸ Kono ati natyendisuwa nu mupupo, nibaku mwishi lyu murawo. ¹⁹ Pani musebezi umu mbiri ushibe wati mwanahara: wushashi, wubbi, wuchunu. ²⁰ Ku rangara ni bakazi babayeyi, wurwezi, shutoyo, zi fapano, lifufa, zikhani, ku tsukana tsukana, ku menga, muna, wuzyu. ²¹ Wubbi, wudakwa, wudakwa pu mikiti, indi zizimwe izati fwana zopani. Ndani kweshira tandi shindata ni kweshira kare, bapa ibati panga izuto zangahopani kamuni shaba njene muwuso u Rezya. ²² Kono zipata zu mupupo rusuno, kwidze, ku totiza, ku linda, wushiyama, wuqa, itumero. ²³ Kuli kyeta, kuli kuma; kurwenisa izuto zangahopa paku murawo. ²⁴ Bapa ibati wulya ku Jeso Keresite ba bambuwa ni mimbiri yi shibe ni miyanakano awo indi zibati shaka. ²⁵ Ati tati para shu mupupo, tikwezire tyendye shu mupupo. ²⁶ Tisiye ku lyu mwana, kwi guni ba bamwe, kuli fwera muna.