¹ Ndatikya imatara swana, pukali ishili mupundi, kuku pwati chichana nu muvuya, nanga ndiye umunu umu wuso. ² Kono ana mwishi lyiya matyendisa indi bati yimina tana kakanda kushe amata bika. ³ Hapye, putali tibadana, kali tu bavuya kwi zuto zi mirawo u lyuvu. ⁴ Kono puku yiziriza kakanda kwa rukuya, Urezya aku tuma Mwana kyee, ku pakuwa ku mukazi, ku pakuwa mwishi lyumurawo. ⁵ Matarasi zopani kuyaka ibana mwishi lyu murawo, atikya tikwene ku shangana kwi qharuwa tandi abana. ⁶ Mi shuku tikya nabana, Urezya mata tuma mupupo a Mwana kyee mu mitima etu, yamani bera, ''Abba, Tatye.'' ⁷ Kali ni bavuya, kono mwana, mi ati u mwana, cware mati yora shu Rezya. ⁸ Kono mukakanda kapa, punahara chire kuyiba Urezya, nata panguwa kuba bavuya kubapa, shi qhumu awo, ka milyumo koyo. ⁹ Kono pani punaya ku yiba Urezya, kapa atikya kali nayibahara ku Rezya, shikya hape puni shuzoromuka ku zuwubbimi indi zahali ndizo naqa zi mirawo? Nati shaka kuba bavuya kakanda koko? ¹⁰ Nati lyaya mayiba, i mezi yemipiya indi zinako ni mwaka! ¹¹ Ndati ywapa atikya uyumwe mati kwana ku bberika nanwe mahara ngaho. ¹² Ndani kambiri, bakwanga, nibe tandimye, indimye ndabi tandi nwe. Kuku shibbi shina ndisi. ¹³ Kono ni yizire atikya kali ishi wutuku wu mumbiri akya ndata hweta wurumiwa kunwe ithanzi. ¹⁴ Mundi nama mwani bika pukuni qaba, amani shitye kapa kundi hindika. Kono natandi chinjira tanokoti ndi linyiroi lyu Rezya, tana nokoti Jeso Keresite yeye. ¹⁵ Ikure zi mbuyoti zenu zina apani? Ndani sumushira atikya, kambe kwaru ku kwanahara, nana kusa amesho enu mi nindi pengo. ¹⁶ Cwarehe, ndabi shira shenu shuku ni zira injahamu? ¹⁷ Bani pwera shiri atikya bani kome, kono puku ku libaka lyelyiqa. Bati shaka kuni kusa atikya nibe ibati qama zubati shaka wowo. ¹⁸ Kuqa kiw qama izuto zina libaka lyelyiqa, kaku tikya tana ndishiba nanwe. ¹⁹ Bapundi banga babadana, nagweza ndati yuvwa wutuku wuku paka kunwe tana pu Keresite isha ku panguwa kunwe. ²⁰ Ndati shaka kuba nanwe apani indi kuni yaru muna mawe anga, kakuli ndumu zierehera shanwee. ²¹ Nindi zire, yenwe inati shaka kuba mwishi lyu murawo, amana kwi kyekye ku murawo? ²² Kwata ñoruwa atikya Abburahama ana abana babiri, uyumwe ku muvuya akye yushu rwakazi mi uyumwe ku murwakazi akye. ²³ Muxiki mata pakuwa ku muvuya shi nyama, kono uyumwe mata pakuwa ku mukaza kye shisepiso. ²⁴ Izuto zopani zati kwana ku toro kuwa tandi zunguli, bakazi babiri bati yi mina wu mbiya wu biri. wuwumwe ku rundu lya Sinai mi mata paka mupundi yu muvuya. Yopani i Hagarri. ²⁵ Pani Hagarri mati yi mina lyu Rundu lya Sinai iyina Arabbia; mi ku yimina Jerusalema, mu vuya indi mwana kye akyopa. ²⁶ Kono Jerusalema iyina kwi lyiiro inja mahara, mi ndi nyinetu. ²⁷ Ku ñwara, ''Radze, yewe yuhati paka; lira indi shupwira idze, yewe yuhati shanda ku wutuku wuku paka; shuku tikya abana babakazi bara xuwa abenji ku bbara bakazi ibana babe bawo.'' ²⁸ Kono yewe, bakwanga, tandi Isaka, nabana wi sepiso. ²⁹ Ku kakanda kapa yamata pakuwa shi nyama mati shandisa yamata pakuwa shukwenda shumupupo. Kwati fwana pani. ³⁰ Kono ingahare mañoro ngati hweta? ''Kusa mukazi yumuvuya indi mwana kye. mwana mukazi yu muvuya amaku shangana shiyemba kuku yora ni mwana mukazi ywama hara.'' ³¹ Cwarehe, bakwenga, kata bana ba bakazi baba vuya, kono bati liyimina.