¹ ba kwanga, iti yuyumwe mapatuwa ku wubbi kowo, yenwe inina mu mupupo wo muqa nati swanera ku mushusiza mu mupupo wo mushayama. Ni libbiraere indinwe, atikya ni siye ku likuwa. ² Tili yakure ku wuzuwo kwetu, mi tiyi zirize murao a Keresite. ³ Muyeyi kwekye yamati yanakana atikya asitye achumwe kono munjemwa, matili kitaka. ⁴ Kwekya ngaho alyayi sise misebezi akye, mi libaka likuli kakura izakye yekye kanu yuyumwe. ⁵ Muyeyi kwekye shayise injira akye yekye. ⁶ Yamati zirwa lyiyi mati swanera kuli yaya izuto kozo zeziqa ni yamati zi ruta. ⁷ Nisiye ku kita kuwa, Urezya ka lyukuwa, kocho shu muyeyi amati kuna, ndishisha vuna. ⁸ Yamati kuna zitanga shaye ngaho mwi nyama, mwi nyama sha vune ku sinyiwa. Yamati kuna zi tanga shu mupupo, ku mupupo sha vune wuparo wa hamana. ⁹ Tisiye kuba ibati bbiraera kwisi zeziqa, mu kakanda kakaqa shati shangane muku vuna, ati kamuni shati sire pakati. ¹⁰ Cwarehe, puti shina ni kakanda, tirasi wuqa ku bayeyi kowo, mani tandi kubati berwa kwi njuwo i tumero. ¹¹ Ni mwene mañoro nga menji ngundata ni ñwera shi linja lyanga. ¹² Wowo ibati shaka ku panga miyana kano yemiqa yi nyama bati lika kuku panga atikya ni njene mu mupato. Bati anga zopa ku ywasa ku shandu suwa shu shifapano sha Keresite. ¹³ Indi puba njeni mu mupato amaba ku mamera mirawo, kono bati shaka atikya indinwe ninjene mu mupato atikya bali kakwire mu mbiri enu. ¹⁴ Kono amanda kuli kakura tana shi shifapano sha shikati etu Jeso Keresite, shu lyuvu lyatandi bambirapo, indime ku lyuvu. ¹⁵ Kapa unju mupato hali ka nju mupato, shati lya yuwa ku panguwa shica. ¹⁶ Kowo ibati para kwendi lira shu wuparo wo pani, kototura indi rusuno rube pwi lyiiro lyawo, nangi ipwi lyiro lya Isiraele Urezya. ¹⁷ Ku zwa apani kuku yamati swenera kundi kataza, ndayisa mu mbiri anga imaka a Jeso. ¹⁸ Rusuno rwa Shikati Jeso Keresite rube nuru pupo rwenu, bakwanga. Amen